Read Komrem LEVI-DÂN 24 Bible Online

LEVI-DÂN 24 - Komrem bible

LEVI-DÂN 24

¹RŌNGPU’n Moses hneng

²Israel mipuihei hneng ṭong pek sik kha aleimanthei: Pōn-inn shunga thaihmei sik a olive thai a’nthengtak heichoi ruh, thaihmei kha insûk injônna sik.

³Khōhlei kataia Aaron in thaihmei hei kha adet ṭhak sik hei khana jîngkâr katlung insûk sik hei, Hmun Inthengpen shunga, Intepna Bôm hma aka-om pinden vângtinga RŌNGPU omna khan.

⁴Sana intheng thaihmei sung chunga thaihmei hei kha Aaron in a-ensui sik hei, RŌNGPU omna andet ṭhakna sik a-en sik hei.

⁵Jâmdi kilograme 12 loruh buhlom 12 kachep ruh.

⁶Buhlomhei kha agôr manlia da ruh, RŌNGPU omna aka-om sana intheng vâng a’ntōm dokhâng chunga khan.

⁷Bero intheng ajing agôr rakip chunga inda ruh khava khan buhlom kahlânga thlai inthoina RŌNGPU hneng tōkna akae sik kae.

⁸Châmhngat kani kataia, apha rakip a, RŌNGPU omna khan buhlom kha daṭhak sik kae. Hivahi aheitik a sik a Israelhei ṭōn kae.

⁹Buhlom kha Aaron leh asōnhei ta sik kae, hmun inthenga antasâk sik kae, ajârchu hivahi thempuhei sik RŌNGPU hneng thlai inthoina tōkna a’ntheng hêr ṭhensōt thlai kha kae.

¹⁰Mi inkhat leika-om, apa chu Egypt anu chu Israel, Dân phunga Dibri sanu arahming in Shelomith. Rephōr shunga hiva mipa hin Israel inkhat leh lei innâk hei. Innâkna shunga ama’n Pathen alei hâksêr, khava jâra anmani’n Moses hneng anleiṭhōi,

¹²anhngak a anda, achunga heimo tlo sik kha RŌNGPU ṭong mantheina anleihngak.

¹³RŌNGPU’n Moses hneng ati,

¹⁴“Mipa kha rephōr vângting ṭhōisōt ruh. Ama’n hâksêrna ahri kha akathei rakip in aṭhe tia malârna, mipa luchunga ankut anda sik khana mipui in hlung vâng antadeng hlon sik kae.

¹⁵Khava sōa Israel mipuihei hneng, tu achang inum Pathen kahâksêr kha inrengna kara athōk sik

¹⁶khana that sik kae tia hripek hei ruh. Israel leh jât-hlop Israelhei kâra ka-om tu inkhat RŌNGPU kahâksêr kha mipui in hlung vâng denghlon sik kae.

¹⁷“Tu achang inum mikathat kha that sik kae,

¹⁸mihei ran kathat mi khan khava kahlanga apek sik kae. Sedân hi hringkhō inkhat sik a hringkhō inkhat kha kae.

¹⁹“Mi inkhat in mihlop inkhat sungbi amanrôn inchu, ama taleitlo mama kha achunga tlo sik kae.

²⁰Miru inkhat amathlek inchu ama ru inkhat kha’m mathlek sik kae; hmit inkhat amancho’nchu ama hmit inkhat kha’m mancho sik kae; ha inkhat asuk mathlek inchu ama ha inkhat kha’m sukmathlek sik kae. Mi asukset kapōhrep a ama’m sukset sik kae.

²¹Ran kathat mi khan akahlânga apek sik kae, tu achang inum mihring kathat chu ama’m that sik kae.

²²Hiva dân hi nangni Israel leh nankâra aka-om jât-hlop hei nankhenga chunga manse sik kae, ajârchu kei nan-Pathen RŌNGPU eng kha kae.”

²³Moses’n hivahi Israel mipuihei hneng ahri pha, mipa kha rephōr vângting ankeisōt a hlung vâng andenghlon jo. Hing’hin RŌNGPU’n Moses hneng ṭong apek kha Israel mipui he’n anleitlosōt a kae.