Read Komrem LEVI-DÂN 3 Bible Online

LEVI-DÂN 3 - Komrem bible

LEVI-DÂN 3

¹Mi inkhat in aserup a inphut inlôikhômna tōkna anei pha sehrat ache achangmak leh apui nōrna kase akae sik kae.

²Ranhei chunga akut ada sik khana RŌNGPU omna Pōn-inn hlutna hnenga athat sik. Aaron innshunga thempu he’n thisen kha maichâm asir manlia ankathek sik

³khana RŌNGPU hneng athōia shahei taksa bâk hei hi thlai tōkna nei sik kae: ashung alaia athai rakip,

⁴amake leh athai kakop, amathin kaṭhapen hei kha kae.

⁵Hihei rakip hi ro-inthoina leh inṭhōia thempu he’n maichâm chunga antaro sik kae. Hiva thlai tōkna marim hi RŌNGPU tlaina kae.

⁶Kemōng a-emak leh kehei inlôikhômna tōk sik a-enchu ache a-emak leh apui nōrna kase sik kae.

⁷Mi inkhat in kemōng atōk inchu,

⁸alu chunga akut ada sik Pōn-inn hmaikunga athat sik. Thempu he’n thisen kha maichâm asir manlia ankathek sik

⁹khana RŌNGPU hneng aṭhōia shahei taksa bâk hei hi thlai tōkna annei sik: athai, arahmei bea tuktana athai seng, ashung alaia kakop athai seng,

¹⁰amake leh athai kakop hei, khana amathin kaṭhapen hei kha kae.

¹¹Rōikaver thempu khan hihei seng hi maichâm chunga RŌNGPU hneng thlai tōkna aro sik kae.

¹²Mi inkhat in ke atōk inchu,

¹³ke luchunga akut ada sik khana Pōn-inn hmaikunga athat sik kae. Rōikaver thempu he’n thisen kha maichâm kha asir manlia ankathek sik

¹⁴khana RŌNGPU hneng aṭhōia shahei taksa bâk seng thlai tōkna annei sik: ashung alaia athai hei,

¹⁵amake leh athai kakop hei, amathin kaṭhapen hei hi kae.

¹⁶Thempu’n hihei seng hi maichâm chunga RŌNGPU tlaina sik thlai tōkna aro sik kae. Athai hei seng hi RŌNGPU ta kae.

¹⁷Israel inkhatbek inum athai a-emak leh thisen sâk theimak ning; hivahi Israel mi rakip in ahei tik a hmuntina an-omna antajui sik kae.