Read Komrem LEVI-DÂN 4 Bible Online

LEVI-DÂN 4 - Komrem bible

LEVI-DÂN 4

¹Israelhei hneng hripek sik a, RŌNGPU’n Moses hneng ṭong aleipek,

²tlo sik intluk loa setna atloa RŌNGPU ṭongpek akasuk khōi tu achang inum, hiva dânhei hi ajui sik kae.

³Thempu Kalen khan setna atlo joa mipui themmô amanrôn jo’nchu, ama’n sehrat chete nōrna kase inkhat atōk a, aset inthengna sik RŌNGPU hneng a’nṭhōi sik kae.

⁴Sehrat chete kha Pōn-inn kot hma aṭhōia, alu chunga akut ada a, RŌNGPU omna khan athat sik kae.

⁵Khava pha Thempu Kalen khan sehrat thisen ajing aloa Pōn-inn shunga achoi sik kae.

⁶Akutpâr hmor kha thisena khan aphuma, a’ntheng pinden kha vōisari akathing thlōn sik kae.

⁷Khava sōa Pōn-inn shunga bero inthoina maichâm rakir manlia araki kasonghei kha, thisen akano sik hei kae. A’nhlei thisen khachu Pōn-inn hlutna hma romanvâm inthoina maichâm matungna kunga abun sik kae.

⁸Hiva seche athai seng, ashung alaia athai kakop seng,

⁹amake leh athai, amathin akaṭhapen ṭhahrep alo sik hei kae.

¹⁰Inloikhôm inthoina atlo kapōhrep a, thempu khan athai hei hi achoia romanvâm inthoina maichâma khan aro sik hei kae.

¹¹Tâk avun, atakravōi seng, alu, akehei, ashung alaia hei leh akari kha alo sik hei,

¹²rephōr kurlangting bekdâna hmun intheng ravut bunna hmun khan achoisōt a, khana khan thing vâng aro sik kae.

¹³Khana Israel mi pumpui in RŌNGPU ṭongpek inkhat manhret loa ansukkhōia ṭhena anchen jo’nchu,

¹⁴khava sōa anset tlo kha anmanhretsōt lim leh, anmani seng in sehrat chere inkhat set-inthoina sik anta heichoi sik kae. RŌNGPU omna Pōn-inn hma anta heikei sik kae;

¹⁵mipui hlamkakeihei khan selu chunga ankut antada sik kae, khana khan antathat sik kae.

¹⁶Thempu Kalen khan se thisen ṭhahrep aloa Pōn-inn shunga achoi sik,

¹⁷akutpârhei kha thisen shunga aphum sik, pinden hmating vōisari akathing sik kae.

¹⁸Pōn-inn shunga bero maichâm rakir manlia araki kasonghei kha thisen akano sik, a’nhleiseng kha romanvâm inthoina maichâm matungna kunga abun sik kae.

¹⁹Khava sōa athai seng aloa maichâm chunga aro sik kae.

²⁰Hiva seche hi set-inthoina seche atōk kapōhrep a atlo sik kae, khang’khan mipuihei set-inthoina anei sik, khana anmani rangei mandam kachang sik hei.

²¹Khava sōa seche kha rephōr kur vângting achoia ama bing set-inthoina kapōa khan avaro sik. Hivahi mipuihei setna losōtna inthoina kha kae.

²²Vaikarôn inkhat in manhret loa RŌNGPU ṭongpek inkhat asuk khōia ṭhena achen jo’nchu,

²³aset tlo kha amanhret sōtak leh, keche nōrna kase inkhat a’nthôina sik aheikei sik kae.

²⁴Keche luchunga khan akut ada a, maichâm sak intonga romanvâm inthoina ran thatna hmun a khan athat sik. Hivahi set losōtna sik a inthoina kae.

²⁵Thempu khan ran thia khan akutpâr aphuma, maichâm rakira ahmor kasonghei kha akano sik, khana a’nhleiseng kha maichâm matungna kunga abun sik kae.

²⁶Khava sōa athai seng kha inlôikhômna inthoina ranthai a’nro kapōhrep a maichâm chunga aro sik kae. Hing’hin thempu khan vaikarôn kha asetna jâra athôi sik, khana ama rangei mandam kachang sik.

²⁷Micham inkhat in RŌNGPU ṭongpek inkhat manhret loa asuk khōia setna atlo achang jo’nchu,

²⁸asetna kha amanhretsōt lim leh, nōrna kase ke rala inkhat a’nthôina sik aheikei sik kae.

²⁹Alu chunga akut ada sik khana romanvâm inthoina ran thatna hmun a maichâm sak intonga khan athat sik kae.

³⁰Thempu khan ran thisena akutpâr aphuma, maichâm rakir kasonghei kha akano sik, khana a’nhleiseng kha maichâm matungna kunga khan abun sik kae.

³¹Khava sōa athai hei seng kha inlôikhômna inthoina ranthai seng a’nlosōt kapōhrep a alosōt a amarim khan RŌNGPU tlaina sik maichâm chunga aro sik kae. Hing’hin thempu khan mi inkhat set-inthoina anei sik kae, khana ama rangei mandam kachang sik.

³²Mi inkhat in kemōng inkhat set-inthoina sik aheikei inchu, nōrna kase arala akachang sik kae.

³³Alu chunga akut ada a ro-inthoina ran thatna maichâm sak ting sira khan athat sik kae.

³⁴Thempu khan ran thisena akutpâr aphuma Maichâm rakir kasonghei kha akano sik, khana a’nhleiseng kha maichâm matungna kunga abun sik kae.

³⁵Khava sōa athai seng kha inlôikhôm inthoina kemōng thai inlosōt kapōhrep a alosōt a maichâm chunga RŌNGPU hnenga thlai inthoina kha leh inṭhōia, aro manvâm sik hei kae. Hing’hin thempu khan misetna jâra inthoina atōk sik, khana ama rangei mandam achen sik kae.