Read Komrem LEVI-DÂN 8 Bible Online

LEVI-DÂN 8 - Komrem bible

LEVI-DÂN 8

¹RŌNGPU’N Moses hneng ahri,

²“Ka-omna Pōn-inn kot hma Aaron leh asapa heiṭhōi hei roh, khana thempu invonna, thai inthi sik, set thôina sik sehrat chere, kemōng chere 2, khana che philo buhlom hrai kha heichoi hei roh.

³Khava sōa mi rakip heibe mantûp hei roh.”

⁴Moses’n RŌNGPU ṭongpek dungjuia aleitlo, mipuihei anhong intûp pha,

⁵anhnenga, “Tûn ke’n katlo sik hi, RŌNGPU ṭongpek kha kae,” ati.

⁶Moses’n Aaron leh asapahei kha hmating aheiṭhōisōt heia khana bekdâna tui insi sik a ahri pek hei.

⁷Khana ama’n Aaron kha zakkō leh zakkō inse amanhak, khōnkhit akhit pek. Zakkō bong amanhak, kaṭhatak a a’nkhông khōnkir hrui kha akir pek jo.

⁸Khana ôm-mârsha a-ôp a amanneia, Urim leh Thummim ashunga athun pek.

⁹Khana lukôm alua amankôm, inpek sōtna a’ntheng mêrchîkna, sanaret kha RŌNGPU’n ṭong apek dungjuia lukôm hmating amankop pek.

¹⁰Khava pha Moses’n sahrik kha aloa RŌNGPU omna Pōn-inn shunga ada khana heirakip ada manhlut jo, khang’khan heirakip RŌNGPU hneng amantheng jo.

¹¹Khahei kha RŌNGPU hneng mantheng sōtna sik a, ama’n sahrik kha ṭhahrep aloa maichâm chunga vōisari akathing thlōn, khan chu ahmangchâk seng leh thlengkông leh amatungna hei akathing thlōn hei.

¹²Sahrik kha Aaron luchunga ajing asunthlōna mantheng sōtna anei jo.

¹³Abâna, RŌNGPU ṭongpek dungjuia, Aaron sahei kha hmating aṭhōisōt heia zakkō amanhak hei, ankhônna tumsui, anlua lukôm amannei hei.

¹⁴Set-inthoina sik a Moses’n se chere inkhat avakei, khana Aaron leh asa he’n selu chunga khan ankut anda.

¹⁵Moses’n athat a, athisen ṭhahrep aloa maichâm suk manthengna sik thisen kha akutpâr vâng aloa maichâm rakir kasonghei kha akano hei. Khana a’nhlei thisen kha amatungna kunga asunthlōn. Hing’hin asuk manthenga atōksōt.

¹⁶Moses’n ashung alaia kakop athai seng leh amathin kaṭha seng leh amake leh athai aloa, maichâm chunga aro manvâm hei.

¹⁷RŌNGPU ṭongpek dungjuia, Moses’n sehme alakseng, avun, aravōi, leh akari hei seng kha rephōr kur vângting aro manvâm hei.

¹⁸Abâna, romanvâm inthoina sik akemōng che inkhat avakei, Aaron leh asa he’n kemōng luchunga khan ankut anda.

¹⁹Moses’n kha athat a athisen kha maichâm asir manlia akathek thlōna kae.

²⁰Kemōng kha arachen a ashung alaia leh arakō hei kha tui vâng asôp mantheng. RŌNGPU ṭongpek dungjuia, alu, athai khana ahme seng kha maichâm chunga aroa kae. Hiva ro-inthoina hi thlai inthoina kae, amarim hi RŌNGPU tlaina kae.

²²Khana thempu suk manthengna 2 tlukna kemōngche kha avakei, Aaron leh asa he’n kemōng luchunga ankut anda a kae.

²³Moses’n kha athat a athisen ṭhahrep alo, Aaron changting kōr hmora leh akutpui, akepui akano pek hei.

²⁴Khana, Aaron sahei hmating aṭhōi heia anchang tinga ankōra, ankutpuia, ankepui heia thisen kha akano pek hei. Khava sōa Moses’n thisen kha maichâm rakir manlia aleimathlâk a kae.

²⁵Athai, arahmeibe thai, ashunga athai seng, amathin kaṭha seng, amake leh athai intōm khana achang tinga arakō alo hei.

²⁶Khana RŌNGPU hneng a’ntōk che philo buhlom pheng khat, thai vâng ansyem buhlom pheng khat, buhlom kasin inkhat aloa, sharakō leh shathai chunga khan ada hei.

²⁷Hiva thlai seng hi Aaron leh asapahei kut chunga adapek hei, anmani’n, RŌNGPU hneng ahlopdet a tōkna anvaneia kae.

²⁸Khava sōa ro-inthoina achung pena, mantheng sōtna inthoina inkhat a Moses’n anmani kut chunga inphut thlai kha aloa maichâma aroa kae. Hivahi ro-inthoina kae, amarim kha RŌNGPU tlaina kae.

²⁹Khava sōa Moses’n sha ôm kha aloa RŌNGPU hneng ahlop kutchoi inkhat a avatōk. Khavakha suk manthengna kemōng ravōi Moses chentum kha kae. RŌNGPU ṭongpek dungjuia Moses’n heirakip aleitlo.

³⁰Moses’n maichâm chunga sahrik manthi sik kha leh thisen ṭhahrep aloa Aaron leh asapahei kha anpōn ander leh akathing thlōn jo hei. Hing’hin RŌNGPU hneng anmani leh anpōn ander kha asuk mantheng jo hei.

³¹Moses’n Aaron leh asapahei hneng ahri, “RŌNGPU omna Pōn-inn hlutna kot kunga hme so sōng ruh! RŌNGPU ṭongpek dungjuia manthengna inthoina hrai shunga buhlom leh sâk manchun ruh.

³²Sâkbang hme leh buhlom seng kha ro manvâm ruh.

³³Nangni suk inthengna rōi a’nchai hma ni 7 shunga kotkung kha dahlon mak ruh.

³⁴Nanset losōtna sik, tuninga nitlosōt hei hi RŌNGPU’n tlosōt sik a ṭong apek me kha kae.

³⁵RŌNGPU ṭong pek me kha tlosōtna sik a Pōn-inn hlutna hnenga khan ni 7 sûn leh jân aka-om nger sik chei kae. Nan-om mak inchu, akathi sik chei kae. Hivahi RŌNGPU ṭongpek eng kha kae.”

³⁶Khava jâra Moses hneng RŌNGPU ṭongpek dungjuia, Aaron leh asapa he’n heirakip antloa kae.