Read Komrem JEREMIAH 1 Bible Online

JEREMIAH 1 - Komrem bible

JEREMIAH 1

¹Hiva lekha hi Benjamin ram shunga Anathoth khōa thempuhei kâra inkhat Hilkiah sapa Jeremiah ṭonghri kha kae.

²Judah reng Amon sapa Josiah reng changna kum 13 tluk kum a Jeremiah hneng RŌNGPU’n ṭong aleihri pek,

³khana Judah rengpa Josiah sapa Jehoiakim pha shunga ahnenga ṭong ajōng hri nôk a kae. Khava sōa, Josiah sapa Zedekiah reng changna kum 11 katlunga ahnenga RŌNGPU’n hmun katamtak a ajōng hria kae. Khava kum a thla 5 tlukna shunga khan Jerusalem mipuihei kha rehringa anleikei heia kae.

⁴RŌNGPU’n kahnenga ati,

⁵“Hringkhō kapek mak hma che khan ke’n kakadei jo che kae, khana na-intet mak hma khan jât rakip sik a sânkathem inkhat a kakadei jo che kae.”

⁶Ke’n kamasôn, “Chunghnung RŌNGPU, heikhonga mo ṭonghri sik kei lamanhret mak eng; naipangtek lakachang eng.”

⁷Tâk-kha RŌNGPU’n kahnenga ati, “Naipangtek lakachang eng timak roh, ke’n katirna che mihei hnenga vase roh, navahri sik a kaṭong pek hei seng che kha vahri pek hei roh.

⁸Anmani kha ṭitmak hei roh, ajârchu nakahrung sik a ke’n ka-ompui che. RŌNGPU ke’n kahri jo hi kae!”

⁹Khava pha RŌNGPU’n akut ahei kabâna kabei ajōng sit, khana kahnenga ati, “Rangei roh, nang in nahri sik ṭonghei kha kapek jo che.

¹⁰Tuning ke’n jât rakip leh rengramhei anrajung kaphôisōt sik, kakei inthlûk sik, akasuk inhmang sik, akahlonsōt sik, akaphunsōt sik leh akasyemsōt sik a ratha kha nang kapek jo che kae.”

¹¹RŌNGPU’n ader eng, “Jeremiah, heimo nahmu?” Ke’n kamasôn, “Almond thing bâk inkhat kahmu.”

¹²RŌNGPU’n ati, “Nang kadik che, khana kaṭong hri hei hi hui ajōng tlung sik kha ke’n kahngâk a, ka-ena aka-om eng kae.”

¹³Khava sōa RŌNGPU’n kahnenga ahri nôk, “Heimo alak nahmusa?” Ke’n kamasôn, “Sak ting bephu inkhat tui kachōr inkhat kahmu, khana hiva langting hin akaphi inthla sik a ka-om jo.”

¹⁴Ama’n kahnenga ahri, “Hiva ram shunga aka-om rakip chunga suk mansetna kha sak tinga inphut jōng kalōng inhlut sik,

¹⁵ajârchu ke’n sak tinga aka-om jât-hei seng anjōngna sik a kabek jo hei. Anmani renghei khan Jerusalem sōngkot heia khana kurbang rape kimve heia leh Judah khōpui kimve heia reng in-ongna antamatung sik hei kae.

¹⁶Kami he’n setna antlo jâra karâkna kapek sik hei kae; anmani’n kei andahlon jo eng, pathen ralak hnenga inthoi hei, lim ansyema ankamuk heia kae.

¹⁷Intluk roh, Jeremiah; nahri sik a kapek che ṭonghei hi anmani vahri pek jo hei roh. Tûnchu anmani ṭitmak hei roh, naṭit he’nchu nang anmani kâra na-om pha naṭit chet heina sik a nachunga maṭhitna kahei tlo sik kae.

¹⁸Rangei roh, Jeremiah! Hiva ram shunga mi rakip-Juda renghei, ṭōnkarônhei, thempuhei khana mipuihei seng in nang antadōi sik che kae. Tâk-kha tuning ke’n nang anmani inhngetpui torna sik a ratha kapek jo che; kurpui kahnettak, thir chopui, sum-êng bangrape khōpui inkhat kapō kachang sik che. Anmani’n nang tor mak hei tin; ajârchu nakahrung sik a ka-ompui sik che. RŌNGPU ke’n kahri jo kae.”