Read Komrem JEREMIAH 11 Bible Online

JEREMIAH 11 - Komrem bible

JEREMIAH 11

¹RŌNGPU’n kahnenga ahri,

²“Ṭongtep chungchânga kha rangei roh. Judah leh Jerusalema mipuihei hneng manthei hei roh

³khachu Israelhei RŌNGPU Pathen ke’n hiva ṭongtep chungchânga akajuimak rakip chunga hâksêrna kada jo kae.

⁴Hivahi anmani hei sik a hmei taro mankâng kapō ram, Egypt a inphut kaheiṭhōisōt lai hei anpu sōnhei leh kaleisyem jo intepna kha kae. Anmani’n kaṭong anjuina sik a khana kaṭong pek rakip antlosōtna sik a kalei manthei hei. Anmani’n kaṭong anjui inchu, anmani kami kachang sik hei, kei an-Pathen kachang sik eng, tia kahri pek hei.

⁵Khava sōa, tuna antachen jo kara ṭhatna leh ram thai omna hi anpu anpahei hneng pek sik a kalei intepna kha hui kamathlung sik kae.” Ke’n kati, “Ôk, RŌNGPU.”

⁶Khava sōa RŌNGPU’n kahnenga ahri, “Judah khōpui heia leh Jerusalem hlamdung heia vase roh. Kaṭong hi vahri manthang roh khana ka ṭongtep chungchâng kha anrangeia anjuina sik manthei hei roh.

⁷Ke’n anpu sōnhei Egypt a inphut kaheiṭhōisōt lai hei khan, kaṭong anjuina sik a kaṭhatak a kamanse hei, khana tuning katlung mipuihei kalamanse ṭhak heia kae.

⁸Tâk-kha anmani’n kaṭong rangei mak hei, khana juimak hei. Khava kanek a, mi rakip anracham kase chet heia ṭhatmak antlo chet jo. Intepna kha anjuina sik a ṭong kaleipek hei, tâk anmani’n hnōm mak hei. Khava jâra intepna shunga karâkna rakip kha anchunga kahei rôn sōt jo kae.”

⁹Khava sōa RŌNGPU’n kahnenga ahri, “Judah leh Jerusalem mihe’n kei dōina ṭōn anmantluk.

¹⁰Anmani’n, kaṭong hri akahnōm mak, anpu sōnhei setna ting khan inle jo hei; pathen hlop ankamuk jo hei. Israel leh Judah he’n, anpu sōnhei leh kaleisyem intepna kha anvōkkhōi jo.

¹¹Khava jâra tûnchu, RŌNGPU ke’n, anmani antlânsōt tor makna sik a, anchunga insuk inhmangna kajōng rôn sik jo kae tia gîkna kapek hei. Khana anmani’n kahnenga inthōpuina sik a anṭap inum rangei pek mak jo hei ning.

¹²Khava sōa Judah leh Jerusalem mihei kha inthoina antatōkna pathen ralak-hei hneng khan kase heia inthōpuina kader sik a kaṭap sik jo hei. Achang ravâng hiva inhmangna hi ajōng pha khan chu khava pathenhei khan huk tor mak hei ning.

¹³Judah mihe’n khōpui antanei kapō jahrep a pathen annei heia kae, khana Jerusalema aka-om mihe’n khōpui shunga hlamdung aka-om jahrep a mater ka-om Baal pathen hnenga inthoina sik a maichâm ansyemsōt a kae.

¹⁴Jeremiah, hiva mihei kahlanga kahnenga ngekna heinei mak roh. Anmani an-inrim pha, inthōpuina sik kahnenga ander eng pha, rangei pek mak hei ning.”

¹⁵RŌNGPU’n ahri, “Ke’n kalungset mihei khan ṭōn kaṭhamak kha antlo jo. Kabek-inn shunga ratha anneina sik heimo aka-om sik jo? Anmani’n ṭong intepna ansyem leh ran inthoina annei leh inrengna hi kanting tor sik tia antamandon mo? Khava khan amanhōitor sik hei mo?

¹⁶Ke’n pha khat a olive thingbō inbur, kara kaṭhatak a a’nra hei tia kaleiphō hei, tâk tûnchu, khō inri kapōa abōhei kha hmeia kamankâng sik hei, khana abâk-hei kha kamathlek sik jo hei.

¹⁷Chunghnung RŌNGPU ke’n, Israel leh Judah hi kaphun jo hei kae; tâk-kha tûnchu, khōdeng theina vânga maṭhitna kanei jo hei. Anmani’n akadik mak antlo jâra hivahi anbinga anta’nrôn sōt kae; anmani’n Baal hneng inthoina antōk jâra kahnuk antamannat kae.”

¹⁸Kaka-en kada he’n kei dōina ṭōn antamantluk kha RŌNGPU’n kei aleimanthei eng.

¹⁹Kei kha taksenthei kemōngte inkhat that sik a antakeisōt kapōa, anmani’n kei dōina ṭōn kaṭhamak antamantluk kha ke’n leimanhret mak eng. Anmani’n anhri, “Eini’n thingkung inkhat hi ahme aṭhat laitak hin lâkkhōi jo rih, tûte’n ama anmandonsōt makna sik that jo rih.”

²⁰Khava sōa ke’n kader, “Chunghnung RŌNGPU, nang chu akadik ṭongkatan che kae; nang in mihringhei malung leh antamandon na-enmansin kae. Kei chunga ṭong ka-om hei hi nakut a kapek che, khava jâra hiva mihei chunga phu nahlō pek sik eng kha ke’n en che rong.”

²¹Anathoth mihe’n kei anthat hnōm jo eng, kahnenga anhria ke’n RŌNGPU ṭong hi kahri manthang ṭhak inchu antathatsōt sik eng kae anti.

²²Khava jâra Chunghnung RŌNGPU’n ahri, “Ke’n anmani karâkna kapek sik hei! Anrether hei rehmun a anthat sik hei; ansahei vonṭâma kathi sik hei.

²³Ke’n Anathoth mihei chunga inrengna mathlungna sik pha katep jo, khavakha ajongtlung pha, anmani tûte hringmak jo hei ning.”