Read Komrem JEREMIAH 12 Bible Online

JEREMIAH 12 - Komrem bible

JEREMIAH 12

¹“RŌNGPU, kachunga ṭong kasōk hi nahnenga kahei rôn sōt inchu nang in akadik kha namanchên sik. Kha’num, ṭongdik chungchânga ṭong kader hi sik che. Heisa mo malung kaṭhamak he’n hingtuk hrep a akahao hei? Heijâra mo malung intheng mak he’n chung sōkna antanei tor?

²Nang in naphun hei, anmani’n rajung anṭhō; kakek heia inra hei. Anmani’n naṭong kahōitak a anhri, kha’num kadiktak a antadon che chu changmak.

³Tâk-kha, RŌNGPU, nang in kei namanhret eng; heimo katlo heituk a kalungset che mo ti kha nahmu. Hiva mikaṭhamak-hei hi kemōng rachen sik hei kapōa keisōt hei roh; antuk thatna sik pha kha atluk mak hma seng hrung hei roh.

⁴Heituk kasôt mo kanram akachâra aka-om sik, hlei rakip a kahar akachâr sik hei? Ranhringhei leh vahei kathi jo hei, kanmihei ṭhatmak jâra, ‘Eini tatlo hi, Pathen in hmumak, tia akahri mipuihei kha.’”

⁵RŌNGPU’n ahri, “Jeremiah, mihei leh tlân in-er hi nachâm inchu, heikhonga mo shakorhei leh in-erna kha nator sik? Ramhânga hmen nangir tor mak inchu, Jordan tuipanga ratu shunga heikhonga mo akangirtor sik che?

⁶Na-innkō shunga mihei, nasōpui kapha he’num anhōn jo che; nang dōina buhluna khan inchunpet jo hei. Ṭim leh re kapōa ṭong anhri che’num, taksen mak hei roh.”

⁷RŌNGPU’n ahri, “Ke’n Israel kha kadahlon jo; ke’n kakadei jât-hei madu mak jo eng. Ke’n kamalungset mihei kha, an-inrepuihei ratha neina thōia kapek sōt jo hei.

⁸Kakadeisōt mihe’n kakadōia inhe jo hei; ramthip a shabakkai kapōa kahnenga inhrung jo hei, khava jâra kamater jo hei.

⁹Ke’n kakadei mihei kha va inkhat kapōa, hmukhai he’n akir rakip a inphut anmanlōi jo. Ramshahei kha revei sâktlânga anhongna sik bek hei roh.

¹⁰Ram hlop a vaikarôn katamtak he’n kavomhrui rahōn ansuksetsō jo; anmani’n kahlei kha anchōn rachi jo; kamaner ram kha nêrdiram anmanchang jo.

¹¹Anmani’n ramhâng anmanchang jo; kahmai kunga kadaih ngera ka-om jo. Ram pumpui kha nêrdiram kachang jo, tûte’n donmak jo hei.

¹²Nêrdiram pumpuia hmun inshâng heia inphut mihei kha akasukset sik a kahong hei. Ram shung pumpui kasukset sik a ke’n re kha kajōngtir, tûte inkhat kamōnga om tor mak ning.

¹³Kami he’n gehu anvor, tâk-kha kahar rōk anlōk. ṭōn inhnaktak a antlo, tâk-kha heite hmumak hei. Kahnuk anat rei jâra, anhmuchi inramak a kae.”

¹⁴RŌNGPU’n ahri, “Ke’n kami Israel kapek hei ram akasukset, Israel inhnaipui hei hneng hri sik ṭhahrep kanei. Ke’n khava mikaṭhamak-hei kha anram shunga inphut, kahar phoisōt kapōa kalosōt sik hei, khana Judah kha anmania inphut kahuksōt sik a kae.

¹⁵Tâk-kha ke’n anmani kaṭhōisōt sō hei pha, anchunga kalungset sik hei; khana jât rakip ke’n anram et a kaṭhōi male sik hei.

¹⁶Anmani’n kamihei bekdân hi anmalung pumpuia anrahlânga, kamihei kha pha khat a Baal rahminga intepna sik a antamanthei hei kapōa, hinga an-intep inchu, ‘RŌNGPU ahring jâra,’ khan chu anmani kha’m kamihei kâra ṭhen khat kachang sik hei khana hong kakhangtou sik hei.

¹⁷Tâk-kha jât inkhat in kaṭong ajuimak inchu, arajung kaphôisōt pet sik khana kasuk manhmang sik. RŌNGPU ke’n kahri jo.”