Read Komrem JEREMIAH 14 Bible Online

JEREMIAH 14 - Komrem bible

JEREMIAH 14

¹RŌNGPU’n kahnenga, khōtui kakang sik chungchânga ahri,

²“Judah hi ṭajai asuia ka-om; akhōpuihei kha kathi de-de hei, amihei malung inrima raleia kaje hei, khana Jerusalem in inthōpuina amadua kaṭap.

³Mikanei he’n ansōk hei tui kajong sik antir hei, anmani tuikhura kase hei, tâk-kha tui hmumak hei; anmani antuibe karōk a he’nle hei. Katlasam hei inhmak hei, anhmai anmakhua ka-om hei.

⁴Ajârchu khō asûrmak jâra, ram a ralei kachâr jo, hlei kathlōhei, anmalung kana, anhmai anmakhua ka-om hei.

⁵Hlei laia shakhipui in ate kadông kha adahlon ajârchu khava hmun a khan phi kadông om mak a kae.

⁶Ram shakōrtung hei kha hmebung chunga kangir hei ram-ui kapōa thli anmahâp a anhnar anrakhōng; anhmit kajing jo hei ajârchu thlai sâk sik neimak heia kae.

⁷Kamihei kahnenga kaṭap hei, ‘Kansetna he’n amanṭhe unga achang inum, naṭong tepna kapōa, a’nthōpui roh. Keini pha katamtak nanga inphut katlânsōt jo ung, nang kadōia setna kanleitlo jo.

⁸Israelhei inhōrna nang rōk che kae; thi inhmangna inphut kankahuksōt kha nang che kae. Heisik a mo kanrama khōhme kapōa, hlam kahrole inkhat jân khat rōk akarek kapō kha akachang che?

⁹Heisa mo nang hi mi inkhat manhret manloa antasur jo kapōa, inthōpui torna ratha kaneimak remi inkhat kapōa aka-om che? Kadik khet a, RŌNGPU nang in na-ompui ung! keini nami ung kae; keini adahlon mak roh.’”

¹⁰RŌNGPU’n hiva mihei chungchânga ahri, “Anmani’n kahnenga inphut tlânsōt sik anmadu, khana anmani anbibinga inkhimtor mak hei. Khava jâra anchunga kamalung tlaimak. Antlo ṭhena kha kamandonsōt sik, ansetna chunga karâkna kapek sik hei.”

¹¹RŌNGPU’n kahnenga ahri, “Hiva mihei inthōpuina sik kahnenga adermak roh.

¹²Anmani’n thlai anhngōi inum inthōpuina sik a anṭapna kha theipek mak hei ning; anmani’n ro-inthoina leh hmuchi inthoina atōksōt inum, anchunga tlaidek mak ning. Khava kanek a, ke’n re leh vonṭâm leh hrise vânga kaṭha manram sik hei kae.”

¹³Khava pha ke’n kahri, “Chunghnung RŌNGPU, sânkathem he’n mihei hneng re leh vonṭâm om mak ning, ajârchu nang in ṭongtepna nanei jo kae anti, khana kanram shunga mōngna rōk ka-om sik anti.”

¹⁴Tâk-kha RŌNGPU’n amasôn eng, “Sânkathemhei khan karahminga maleisei antahri kae; ke’n tir mak hei eng, anhnenga ṭongpekna heikhat achangmak leh mi hnenga ṭong inkhat avakahri sik pek mak hei eng. Anmani’n hnunga kasōk sik omchen antahrisōt kha kei hnenga inphut changmak, hmangna kase anmandonna kha antahrisōt kae.

¹⁵RŌNGPU ke’n katir mak sânkathemhei hnenga heimo katlo sik ti kha nahnenga kahri jo, hiva ram a re leh vonṭâm sōk mak ning tia karahminga akahrisōt hei kha, re leh vonṭâma kathasōt sik hei kae.

¹⁶Khava ṭong antahri pek mihei kha’m, anmani leh in-anga that sik hei kae. Ankalōng hei kha Jerusalem hlampui heia hlonsōt sik hei, khana ankahre sik tûte om mak hei ning. Hivahi mi rakip chunga kasōk sik — annuhmei, ansapa, ansanuhei inveisa sik hei. Anmani ṭhatmak jâra hivahi a’npe sik hei kae.”

¹⁷Kamalung inrengna hi mi hnenga akahri sik a RŌNGPU’n amanse enga ahri: “Sûn leh jân kahmit rathli lōng rasoh, kaṭana bângmak rasoh, ajârchu kamihei intôn hêr jo hei khana inhnaktak a natbi anrôn jo.

¹⁸Kei hleiheia kase pha, re shunga antatha hei mihring kalōng kahmu hei; khōpui heia kase pha, sâk loa akathi mi kahmu hei. Sânkathemhei leh thempu he’n anṭōn tlona insaler hei, tâk-kha anmani’n heimo antatlo manhret mak hei.”

¹⁹RŌNGPU, Judah hi pui katluk a nahlon sōt jo mo? Zion mihei hi namater jo hei mo? Keini kandam tor makna sik hrep a heisik a mo sungbi namanrôn ung? Keini’n mōngna sik kan-en, tâk heite akaṭha sōk mak; keini’n damna sik a inhōr ung, khava nek a, ṭitna jôk kahong.

²⁰RŌNGPU, nang kadōia setna kantlo jo, kansetna hei leh kanpu kanpahei setna kha insir jo ung.

²¹Naṭongtep kha mandonsōt roh, donloa adamak roh; nang len in-ongna kalûrtak hmun, Jerusalem chunga hmesetna heirôn mak roh. Keini leh ni’ntepna kha makhōimak roh.

²²Jât-hei limsyem inkhatbek inum khōtui mansûr tor mak ning; bōirōk inum abinga khōtui mansûr tor mak. O, RŌNGPU, kan-Pathen, nang chunga keini inhōrna kannei, ajârchu hiva rakip akatlo hi nang che kae.