Read Komrem JEREMIAH 15 Bible Online

JEREMIAH 15 - Komrem bible

JEREMIAH 15

¹Khana RŌNGPU’n kahnenga ahri, “Moses leh Samuel hei kapha’num hin anngira kahnenga anmani sik anngek inum, ke’n hiva mihei chunga lungsetna inkhatbek manhmu mak jo hei ning. Manse jo hei roh, kahmit hmua inphut mansesōt jo hei roh.

²Anmani’n ansena sik hmun ander che pha, kaṭong hri hi manthei hei roh: Ṭhahrep hrise nat a kathi sik hei khavakha ansena sik hmun a kae! Ṭhen khat rea kathi sik hei khavakha ansena sik hmun a kae! Ṭhahrep khat vonṭâma kathi sik hei khavakha ansena sik hmun a kae! Alak-hei kha khum sik a anṭhōisōt sik hei, khavakha ansena sik hmun a kae.

³RŌNGPU ke’n ṭit ka-om ṭōnse inlak 4 hi anchunga mathlung sik a kamantluk jo: anmani rehmun a antha sik hei; ankalōng uihe’n ankei radâk sik hei; vahe’n ansâk sik hei, ramsha he’n a’nhleibanghei kha ansâk sik hei.

⁴Judah reng Hezekiah sapa Manasseh in Jerusalema aleitlo ṭōn jâra, ke’n raleichunga mi rakip hei hi anhnenga ṭit ka-om tak kamanchang sik jo hei.”

⁵RŌNGPU’n ahria, “Eh Jerusalem mihei, nangni tu’n mo alungset sik chei, tu mo nansik a amalung a’nrim sik? Heikhonga alaka-om che mo tia ani kader sik a, tu mo akasôt hlok akangir sik?

⁶Mipui nangni’n kei adonmak jo chei; nankahnung nansungsi jo eng. Khava jâra kabân karajit a karachi rachen chei ajârchu kahnuknat ka’nkhâmna kachâm jo eng.

⁷Ram shunga khōpui rakip a ke’n sapôt kapōa thlihrâng kâra kakathek chei. Kami nangni kasuk manset chei, nansahei kathat hei ajârchu nanṭhat makna hlam hro kha bângmak chei. Ke’n nansahei kathatpek chei.

⁸Nanram shunga renghmei katamchet jo hei tuipui panga nêrdi ja kanek a. Ke’n nanrether hei ankhangdông lai kathat hei, annuhei inrimna kamande hei. Ke’n thōk hlana leh ṭit-inpirna vânga khan anchunga sōkphutrōia kajem hei.

⁹Asa 7 a’nhmang jo hei nu khachu insam hla jo, akaphu insam jo. Amanu sûnṭim kha, jân khō inthim kachang jo; ama inzak jo, amalung kana jo. Tûn katlunga alakahring nangni ke’n nankadōihei kalamanthat sik chei. RŌNGPU ke’n kahri jo kae.”

¹⁰Heituk-hrep a akahōi mak mi eng mo kei hi! Kanu’n raleichunga hin heisik a mo alei manhring eng? Ke’n ram shunga hin mi rakip ka’nnâkpui sik leh ka-in khepui sik a kasōk jo. Ke’n tûte sêr pûkmak eng a-emak leh bat heite neimak eng, tâk mi rakip in anhâksêr eng.

¹¹RŌNGPU, nang sepa kaṭha karazen mak che’nchu, khana kakadōi hei kha bōina leh inrimna anratō pha ankahlanga nahnenga kangekpek mak he’nchu, anmani hâksêrna hei seng kha kachunga tlung rasoh? (

¹²Tûte’n thir kha dorthlektor mak, achung chôna sak tinga thir leh sum-êng manheina kha).

¹³RŌNGPU’n kahnenga ahri, “Kami he’n ram pumpui shunga anset jâra karâkna, annei leh ankarōi kachomsōt sik a an-inrepuihei kajōngtir sik hei.

¹⁴Anmani’n antamanhret hêrmak ram a ankadōihei sepa kamantlo sik hei, ajârchu kahnuknat hi hmei kapōa kasûk, khana ahei tik a kakâng ṭhak sik a kae.

¹⁵Khava pha ke’n kahri, “RŌNGPU, nang in namanhret. Kei amandonsōt roh khana abôm roh. Kei kasuk inrim hei chunga phu amanhlō roh. Anmani’n kei antha torna sik eng katlunga khan en-hnâm mak jo hei roh. Kei in inzakna karatō hi nang sik jâra kae ti hi mandonsōt roh.

¹⁶Nang in kahnenga nahri, nahri rakip ke’n karangei. Kei nangta eng kae, RŌNGPU Akahratpen Pathen, khana naṭong hei kalungria inpâk leh kahōia kasip a kae.

¹⁷Ke’n milak-hei leh kapha, kahōia leh manui pum a hmangmak eng. Nang ṭongpek juina kabing rōk a ka-om enga hnuknat in kasip eng.

¹⁸Heijâra mo a’nreng ṭhak eng? Heisik a mo ka’ntônna bi akadam theimak? Heisa mo kanatbi akadam mak sik hei? Khō kanglaia kavadung akachâr kapōa ka’nhōrna atlangna sik narei eng mo?”

¹⁹Hiva ṭong hi RŌNGPU’n amasôn, “Nang nahe’n le’nchu, kalo manhlut nôk sik che, nang kasōk kachang nôk sik che. Ṭong kahnemmak nahri kanek a, akahnem ṭong thangkōi navahri le’nchu, nang kasân kathem kachang nôk sik che. Mipuihei nahnenga hong inle sik hei, nang in anhnenga vase sik rangei mak ning.

²⁰Anmani dōina sik a ke’n nang sum-êng rape bang kahnettak kapōa kasyem sik che. Anmani’n re antuk sik che, tâk ator mak hei ning. Ke’n nang kahrung sik a ka’nṭhōipui sik che, kahuk sik che.

²¹Mikaṭhamak-hei ratha neina leh mi inphin heia inphut kahuk sik che. RŌNGPU ke’n kahri jo kae.”