Read Komrem JEREMIAH 17 Bible Online

JEREMIAH 17 - Komrem bible

JEREMIAH 17

¹RŌNGPU’n ahri, “Judah mihei, nansetnahei kha thir kolôm vânga inzet jo; khavakha nanmalung ria hira kangeijap vânga hem inbek jo, namaichâm rakira inhem inbek jo.

²Maichâm chunga leh thingkung in-êm bur rakip hnenga khana hmebung chung heia Asherah pathennu lim antamatung hei kha

³khana ramhânga hmebung heia khan nami he’n ankamuk a kae. Nanram pumpuia nangni’n setna khaseng nantlo jâra khan ke’n nan-inrepuihei kha nannei leh nankarōi rakip kamanlosō sik jo hei.

⁴Kapek chei ram hi nantamasō sik kae, khana nangni’n nantamanhret hêrmak ram a nan-inrepuihei sepa kamantlo sik jo chei, ajârchu kahnuknat hi hmei kasûk kapō kae, ahei tik a kasûk ṭhak sik.”

⁵RŌNGPU’n ahri, “Kei hnenga inphut a’nhesōt, mihring chunga, akathithei mihring ratha neina chunga, taksenna kanei mi kha masetna kamanchen sik kae.

⁶Ama kha nêrdiram a kahar bur, ramhâng kachâr hmun a akakek, heite kekmakna chi tamna raleichunga aka-om kapō kha kae.

⁷“Tâk-kha kei chunga taksenna kanei mihei kha mahâmṭhatna kapek sik hei.

⁸Anmani khachu kavadung panga thingkung kakek arajung tui omna katlunga akaṭhō kapō kae. Khōlum kha ahong pha ṭitna heite neimak, ajârchu abōhei kha in-êm ṭhak heia kae; khōtui asûrmak inum lung dongna neimak; kara inra ṭhak a kae.

⁹“Tu’n mo mihring malung amanhret tor sik? hiva kapō mikahōn alak heite om mak, hiva nat mandam sik hi inri hêr jo.

¹⁰ RŌNGPU ke’n, mihring mandonna kajong hei, mihring malung ka-enmansin heia kae. Ke’n mi inkha-khat hi an-omchen dungjuia anṭōntlo dungjuia karazen hei.”

¹¹Malung intheng loa sêr kahao mi kha, ratui chu thlâkloa valak-hei ratui aka-o, va inkhat kapō kha kae. Ahringkhō aṭima anei kha amanhmangsō sik, a’nchaina ama kha heite emak ning, tâk-kha mikamo kachang sik.

¹²A’nphutbia inphut tlângbung inshâng chunga kangira, ni-Bek-inn hi reng in-ongna kalûrtak inkhat kha ka-anga kae.

¹³RŌNGPU, nang chu Israelhei inhōrna che kae; nang kadahlon rakip hei kha inzakna anchen sik. Anmani vaiphin chunga rahming nimazet kapōa inhmang sik hei, ajârchu tuiripût insim RŌNGPU nang kha andahlon jo che.

¹⁴RŌNGPU, amandam roh khan chu pui katluk a kahōi sik eng; ahuk roh khan chu pui katluk a inhrung sik eng. Ke’n kamanpâk kha nang che kae!

¹⁵Mihe’n kahnenga anhri, “RŌNGPU’n eini dōina sik asyem maṭhitna hei kha khō jo hei mo? Tûnhin heitlosōt jo hei rasoh!”

¹⁶Tâk-kha, RŌNGPU, kei chu ahei tik chen’um anchunga khōdeng theina ajōngna sik ngekmak che eng; Anmani sik a inrengna pha ajōng sik kha madu mak eng. RŌNGPU, kei ṭonghri hi nang in namanhret a kae.

¹⁷Kei inpirna kha achang pek mak roh; inrengna ahong pha leh ka’nthupna hmun kha nang che kae.

¹⁸Kei kasuk inrim hei inzakna pek hei roh, tâk-kha kei chu aṭhensōt roh, RŌNGPU. Ṭitna khan mansip hei roh, tâk-kha kei chu amanṭit mak roh. Anchunga inrengna masō roh khana ahar-ahak a vōk manchim hei roh.

¹⁹RŌNGPU’n kahnenga ahri, “Jeremiah, Judah renghei hlutna leh sōkna Mipui Sōngkot intia khan se ina kaṭong hi vahrisōt roh; khava sōa Jerusalem sōngkot-hei senga vase roh.

²⁰Judah renghei leh mipuihei khana Jerusalema ka-om hei leh hiva kot a akahlut mi rakip hnenga kaṭong hri hi anrangeina sik manthei hei roh.

²¹Anmani’n anhringkhō anlungset inchu, serning phur heite anta’nrôn mak sik kae; Jerusalem sōngkot shunga heite antarôn manhlut mak sik kae

²²achangmak leh an-ina inphut serning neinâk heite antachoisōt mak sik kae. Châmhngat kani ning ṭōn atatlomak sik, anpu sōnhei hneng kaṭong pek hei kapōa kani intheng inkhat a antaser sik kae.

²³Anpu anpa he’n kaṭong rangei mak hei khana heitea teimak hei. Khava kanek a, anracham kasea, kaṭong juimak hei, keia inphut inthem chûkmak hei.

²⁴“Hiva mihei hi kaṭong pek rakip antajui nger sik kae tia manthei hei roh. Anmani’n serning hiva khōpui sōngkot shunga heite phur anta’nrôn manhlut mak sik kae. Anmani’n serning hi kani inthenga antanit a heite antatlo mak sik kae.

²⁵Khava sōa renghei leh rengsa he’n, Jerusalem sōngkot heia khan, kahlut sik hei khana David in reng ratha aleinei kapōhrep a antanei sik kae. Judah mipuihei leh Jerusalem mi inchun heia, shakor gâri leh shakorhei anchōng sik a kha Jerusalem khōpui hi mi akasip tlit sik hei kae.

²⁶Jerusalem kimvea khōhei leh Judah ram a khōpui heia mihei kahong sik hei; anmani Benjamin ramṭhen a, hmebung kea leh tlâng chunga inphut khana thlâng intong Judah ram a inphut kahong sik hei. Anmani’n ka-Bek-inna ro-inthoina leh ran tōk sik hei, hmuchi leh marim katui khana inpâkman tōksōt sik hei kha anheichoi sik hei.

²⁷Tâk-kha anmani’n kaṭong antajui nger sik kae, khana serning kani kha kani intheng inkhat a antaser nger sik kae. Anmani’n khava ning khan phurhrik heite sōngkot a anta’nrôn manhlut mak sik kae, anheirôn manhlut inchu, ke’n Jerusalem sōngkot-hei kha hmei vâng karo sik hei kae. Hmei khan Jerusalem innpuihei kakâng sik hei, tûte’n hmei kha thator mak hei ning.”