Read Komrem JEREMIAH 19 Bible Online

JEREMIAH 19 - Komrem bible

JEREMIAH 19

¹Kei kavase leh bephu inkhat kava rachôkna sik a RŌNGPU’n amanthei eng. Ama’n upa ṭhahrep leh thempu upa ṭhahrep khat kaṭhōisa sik heia ahri pek eng,

²khana Hinnom Phaichama sōksōtna Behar Kot a hongsena sik ati eng. Khava hmun a ajōng pek sik eng ṭong kha ke’n kavahri sik kae.

³RŌNGPU’n kahri sik kha amanthei eng, “Judah renghei khana Jerusalem mihei, Chunghnung RŌNGPU, Israel Pathen ke’n heimo kahri sik hi rangei ruh! Ke’n hiva hmun a khōdeng theina kamasō sik kae, khava ṭong kathei rakip inhmakban sik hei.

⁴Ke’n hivahi katlo sik kae ajârchu mipui in kei andahlon enga hiva hmun a hin pathen ralak hnenga inthoina antōk a anmanbōk jo, anmani leh anpu anpa he’n khana Judah reng he’num antamanhret phakmak pathenhei hnenga inthoi hei. Hiva hmun hi khō inhret mak hei thisen vâng anmansip phet jo,

⁵khana ansahei kha inthoina anro manvâm heina sik, Baal sik a maichâm ansyem heia kae. Ke’n hivahi antlona sik ṭong pek hêrmak hei eng; kamalunga’m hongsōk mak a kae.

⁶Khava jâra hiva hmun hi Topheth achangmak leh Hinnom Phai antimakna sik pha kha lakahong sik. Khava kahlanga Inthatna Phai tia inhret sik jo.

⁷Hiva hmun a hin Judah leh Jerusalema mihei lungdo kha hui mathlung mak ning. An-indōipui hei kamantor sik hei, khana rehmun a kamanthat sik hei. Ankathi kalōnghei kha ramshahei leh vahei tasâk sik a kapek sik hei.

⁸Ke’n hiva khōpui chunga hin ṭit ka-om tak suk mansetna kamasō sik, ahnenga avakase mihei khan andet-hla sik khana inlak ansak sik.

⁹Ankadōi he’n khōpui kha ankakekhum sik, khana amihei kha thatna sik antlo sik hei. Antakakesi omchen kha ṭit ka-omhêr sik khachu khōpui shunga mihei kha anmani inkhat leh inkhat khana ansa khet hei kha ansâk sik jo hei.”

¹⁰Khava sōa RŌNGPU’n bephu kha kei ta’nṭhōipui hei hmaikunga vōkkhōina sik a amanthei eng,

¹¹khana anmani hneng hripek sik ṭong kha Chunghnung RŌNGPU’n ahri, “Ke’n hiva mipuihei leh khōpui hi kavōk-khōi sik hei, khahei kha hiva syem nôk thei kachangmak jo bephu kakōi kapō kachang sik hei. Ankathi kalōnghei kha Topheth shunga katlunga invûm sik hei, ajârchu inhrena sik hmun om mak jo ning.

¹²Ke’n hiva khōpui leh ashunga ka-om hei hi Topheth kapōa kasyem sik hei tia intep jo eng.

¹³Jerusalem innhei, Judah renghei innhei, khana innphu chunga ârsihei hnenga marim katui karo rakip leh pathen hlop hei hnenga inthoina ju kasun hei, ankhenga Topheth kapōa intheng mak hei ning.”

¹⁴Khava sōa RŌNGPU’n aṭong kahrilena sik atirna eng hmun Topheth kha kadahlon jo. Kei kase enga Bek-inn lâmtea kangir enga mi rakip hnenga

¹⁵Chunghnung RŌNGPU, Israel Pathen in ahri kha kamanthei jo hei, “Ke’n hiva khōpui leh ahneng vena khō kalenhei chunga karâkna pek sik heia kalei ti rakip kha katlosōt sik, ajârchu anmani anracham kase, khana kaṭong rangei mak heia kae.”