Read Komrem JEREMIAH 20 Bible Online

JEREMIAH 20 - Komrem bible

JEREMIAH 20

¹Bek-inn ṭōnpui karônpen Immer sapa thempu Pashhur khan kaṭong hri manthangle kha athei pha,

²kei avōk enga Bek-inn shunga Benjamin Kekot hnenga thîrhrui vâng akhit eng.

³Abân kani jîngkâra, Pashhur in thirhruia inphut amasō eng pha, ke’n ahnenga kahri, “RŌNGPU’n nang rahming hi Pashhur tia phō mak jo. Ama rahming phō che khachu, ‘Hmuntina Ṭit-inpirna’ ti hi kae.

⁴RŌNGPU khet in ahri, “Ke’n nang nabi binga leh naṭhōnhei ṭit-inpirna kamanchang sik che, khana nang in mi rakip an-indōipui he’n chemjâm vâng antathatsō hei kha nahmu sik. Judah mi rakip Babylonhei ratha neina thōia kada sik hei; ama’n ṭhahrep athat sik hei, ṭhahrep rehringa aramting aṭhōi sik hei kae.

⁵Khana ke’n an-indōipui hei kha hiva khōpui shunga ankarōi, annei rakip kamanchom sik hei, Judah renghei karōihei kapha khana neinâk rakip Babylon ting anrôn sik.

⁶Khana Pashhur nang sik a chu, nang leh na-innshung mi ansur sik cheia kha Babylon ting anṭhōi sik chei. Sova hmun a nang kathi sik che khana anvûm sik che, nang leh naloihei maleisei ṭong hingja nahri pek hei seng leh.”

⁷RŌNGPU, nang in kei nahōn jo eng, nahōn mathlâk jo eng. Nang chu kei kanek a kahrat che, nang in kei nator jo eng. Mi rakip in sem antlo eng; sûn nilun anmanuisō eng.

⁸Ke’n ṭong kahri kataia, ka-ông sik eng, kapeng sik eng, “Intuk intha! Insukset!” kati sik. RŌNGPU, naṭong kahri manthangle jâra, kei anrasei eng khana andei kapek eng.

⁹Tâk-kha ke’n hinga, “RŌNGPU hi kamahngi sik jo arahminga ṭong hri nôk mak jo ning,” kati pha, naṭong hin kashunga hmei kapōa inhnak a akâng ri eng. Torchena sip katia dena sik katlo, tâk-kha akasôt detor mak eng.

¹⁰Ke’n mi rakip ṭonghri kachōr kha kathei, “Hmun rakip a ṭitna ka-om! Khava jâra vaikarôn ṭong kaneihei hneng ama maher rih!” anti. Kaṭhōn marit hei kapha’n, kathōi tlâk sik kha anhngâk eng. Anmani’n anhri, “Ama nihōn mathlâk tor sik; ama hi nisur sik khana achunga phu nihlō thei sik.”

¹¹Tâk-kha RŌNGPU, nang chu kei langa ka-om che, akalen leh akahrat che kae, kei kasuk inrim hei chu katlu sik hei. Anmani ahei tik a hmaimôkna anchen sik, ajârchu anmani’n chung sōkna nei tor mak hei. Anmani nuisō chen kha mahngi thei chang hêrmak ning.

¹²Tâk-kha Chunghnung RŌNGPU nang in mihei kadiktak a na-enmansin hei; nang in anmalung leh anmandonna kha namanhret. Khava jâra kei ani kadōihei chunga phu nahlō kha hmu che rong, ajârchu kei inphinna ṭong hi nakut a kapek jo che kae.

¹³RŌNGPU hneng hla sak ruh! RŌNGPU kha manpâk ruh! Ama’n suk manrim hei kha mikaṭhamak-hei ratha neina inphut ahuksōt hei.

¹⁴Ka’ntet ning kani kha hâksêr chang rasoh! Kanu’n amatet ning kani kha mahngia om rasoh!

¹⁵Kapa hneng ṭong inthlung, “Sapa inkhat nanei jo! Pasenai kae!” tia ama inpâkna kapek mi kha hâksêr chang rasoh!

¹⁶Ama kha RŌNGPU’n lungsetna kasea asuk manhmang khōpuihei kapō kha chang rasoh. Ama’n jîngkâra inrengna kapeng rasa, sûn pha re ka-ông rasa kha thei rasoh,

¹⁷ajârchu ama’n kei ka’ntet mak hma aleithat mak a kae. Kha achang inchu kanu nairabu kha kathlân aleikachang sik kae.

¹⁸Heisik a mo kei ale’nte eng? Khōdengthei leh inreng kade sik hrep a, hmaimôk chenpuma hringkhō akachai hrep sik enga mo?