Read Komrem JEREMIAH 21 Bible Online

JEREMIAH 21 - Komrem bible

JEREMIAH 21

¹Judah reng Zedekiah’n Malchiah sapa Pashhur leh Maaseiah sapa Zephaniah thempu kha hiva ngekna hi leh kahnenga ahei tir hei:

²“Lungsettak a RŌNGPU hneng keini sik a ahri pek roh, ajârchu Babylon rengpa Nebuchadnezzar leh aremi he’n kankhōpui anvakimve tlit joa kae. RŌNGPU’n keini sik a ṭōn-inlak inkhat atlopek unga Nebuchadnezzar kha rumhrat a aramting amanle theia kae.”

³Khava sō leh RŌNGPU’n kahnenga ajōng hri, khana ke’n kahnenga ahe’ntir hei hneng kahri pek hei,

⁴Israel Pathen RŌNGPU’n Zedekiah hnenga antahri pek sik kha hinga ati, “Zedekiah, Babylon rengpa leh aremihei chunga re katuk sik naremihei kha hmaimôk kapek sik hei. Khōpui alaiṭima nanremihei re hmangchâk-hei kha kabuk mansip sik.

⁵Ke’n kator chenna, kahnuk natna, kahrângna, kahnuk inthakna leh inṭhōia nang kadōia re katuk sik che.

⁶Hiva khōpuia ka-om rakip kathasō pet sik hei; mihring khana ranhringhei in-angtlinga hrise nat a kathi sik hei.

⁷Tâk-kha nang sik a chu, naṭōn karônhei, khana rea, vonṭâma, hrisea a’nphesōt heia akahring hei sik a chu, Reng Nebuchadnezzar leh nang kathat hnōm naremi kalen he’n ansur sik chei. Nebuchadnezzar in nang athat sik che. Ama’n nangni inkhatbek chunga lungsetna, maritna, lungkhamna neimak chei ning. RŌNGPU, ke’n kahri jo kae.”

⁸Khava sōa mipuihei hneng manthei sik a RŌNGPU’n amanthei eng, “Rangei ruh! RŌNGPU ke’n thina hlam mo khana hringna hlam mo nantakadei sik a kapek chei.

⁹Tu-tu achanga khōpuia ka-om mi kha rea achangmak leh ṭâm, achangmak leh hrisea akathi sik kae. Tâk-kha tuna re heikatlo Babylonhei hneng avakahlut a a’npek sōt mihei khachu thasōt mak hei ning; anhringkhō rōk chu inhuk sik hei.

¹⁰Ke’n hiva khōpui hi hukmak sik, tâk-kha suk manhmang sik a intluk jo eng. Hivahi Babylon rengpa hneng kapek sōt sik jo, khana ama’n aro manvâm pet sik jo. RŌNGPU, ke’n kahri jo.”

¹¹RŌNGPU’n kahnenga hiva ṭong hi David sōn leh pâr Judah reng inna mihei hneng hri sik a amanthei eng, “RŌNGPU ke’n kahri hi rangei ruh. Ani kataia akadik intlo kha hmu ruh. Mi inkhat in mi inkhat ahōn mathlâkpa kha huk ruh. Achangmak inchu akaṭhamak nantlona khan kahnuk amannat a that torlo hmei kakâng kapōa hong kakâng sik.

¹³Jerusalem nang, phaicham chunga inshângtak a in-ong che, hlungpui inkhat in phaicham chunga ahei kasōk kapōa. Tâk-kha nang dōina re katuk sik. Nang in tûte’num abuhlu tor mak ning, achangmak leh narekur vōkkhōi tor mak ning nati.

¹⁴Tâk-kha naṭōn leitlo hei jâra ke’n nang karâkna kapek sik che. Nareng-innpui hmeia karo sik, khana hmei in akimvea ka-om rakip akângsō pet sik. RŌNGPU, ke’n kahri jo.”