Read Komrem JEREMIAH 22 Bible Online

JEREMIAH 22 - Komrem bible

JEREMIAH 22

¹David sōn leh pâr Judah rengpa innpuia kavasena sik a, khana ka-om reng, aṭōnpui karônhei, khana Jerusalem mihei hneng RŌNGPU ṭonghri kha anrangeina sik a, avakahri sik RŌNGPU’n amanthei eng:

³“RŌNGPU, ke’n akadik leh a’ntlun kha nantlona sik ṭong kapek chei. Mi tahōn mathlâk inkhat kha akahōn inthlâkpa inphut huksōt ruh. Miram mihei, nu leh pa kaneimak hei, renghmeihei kha êngset a tlomak hei ruh; khana hiva hmun inthenga hin ṭhena kaneimak hei kha that mak hei ruh.

⁴Ke’n tlo ruh tia ṭong kapek chei kha nantlo’nchu David sōn leh pâr he’n reng kachang ṭhak sik hei. Khana anmani’n, anṭōnpui karônhei leh anmihei inṭhōia hiva reng-innpui sōngkot-hei hin shakor chunga leh gâri chunga kalônle ṭhak sik hei.

⁵Tâk-kha kaṭong pek nanjuimak inchu, ke’n nanhnenga a’ntep eng kae, hiva reng-innpui hi akatlu inhmang sik kae. RŌNGPU ke’n kahri jo.

⁶“Kei hnenga chu Judah reng-innpui hi Gilead kapōhrep a khana Lebanon tlânghei kapōhrep a akaṭha kae, tâk hiva hmun hi akarōksai, tûte omakna kamanchang sik kae.

⁷Hiva hmun kasuk inram sik a mi katir sik hei. Anmani’n anhreicha anheichoia cedar thing kacho kaṭhahei kha antuktan sik, khana hmeishunga anhlon sik hei.

⁸“Khava sō leh miram a mi katamtak he’n hiva hmun anhro pha, heijâra mo RŌNGPU ke’n hiva khōpui kalen hi hinga kasukset jo ti hi khat leh khat inder lele sik hei.

⁹Khava pha anmani’n insôn sik hei khachu nangni’n nan-Pathen kei leh ni-intepna kha donmak cheia pathen hlop nankamuk a nanrazen jâr heia kae anti sik.”

¹⁰Judah mihei, reng Josiah sik a ṭap mak ruh; ama thi jâra ralûm demak ruh. Tâk-kha asapa Joahaz sik a rahnak a ṭap ruh, ama kha ahong inle hêrmak sik a anṭhōi jo, a’ntetna ram inhmu hêrmak jo ning.

¹¹ RŌNGPU’n Josiah sapa Joahaz, apa kahlang kathlenga Judah reng kachang, achungchânga ahri, “Ama hiva hmun a inphut ahei tik a ahong inlemak sik a kase jo.

¹²Ama anṭhōina ram a khan kathi sik, khana hiva ram hi vōi khat hmu nôk mak jo ning,”

¹³Akadik mak vânga inn kasak, khana malung intheng loa a-inn inlensa, heite kahnemmak sik a amihei ṭōn intlo, anhlo chu pek hnōmlo, khava mi kha inhmanga ka-om sik.

¹⁴“Kei sik a innpui kalentak chungden akalendôm hei kasak sik kati mi kha a’nhmang sik kae.” Khana ama’n thlikot-hei amandoa, cedar thing vânga kot khâr asyem khana akasen lâr akano.

¹⁵Cedar thing vânga innhei nasak inchu, mihlop-hei kanek a inn kaṭhachet nasak jâra khava khan akaṭhachet reng amanchang che mo? Napa’n hringkhō pui katluktak kha ahmang. Ama chu ahei tik a akadik leh akaṭha atlo, khana atlona rakip a khangsōtna aleinei.

¹⁶Sarahei kadiktak a ṭong atanpek hei, mi rakip leh kahōitak a le’nṭhōi hei. Khavakha kae RŌNGPU manhret inti kha.

¹⁷Tâk-kha nang chu nabinga phâmrai setna rōk kha nahmu; ṭhena kaneimak nathat hei khana namihei hnuk kasetak a nasuk manrim hei. RŌNGPU’n ahri jo.

¹⁸Khava jâra, RŌNGPU’n Josiah sapa Jehoiakim, Judah reng chungchânga ahri, “Tûte’num ama thining ralûm demak hei ning khana hinga anhri sik, ‘Heituk a ṭit ka-om jo mo, kaṭhōnpa, heituk a ṭit ka-om jo mo!’ Ama sik a tûte’m ṭap mak hei ning, khana hinga ôngmak hei ning, ‘Ka-RŌNGPU! Kareng!’

¹⁹Shakōrtung kathi kajana malârna kapōa ama kha ankeisôn sik, Jerusalem hmesō kot vângting anhlonsōt sik.”

²⁰Jerusalema mihei, Lebanona se una va-ông ruh, Bashan ram a se una vapeng ruh; Moab tlâng heia inphut behei ruh, ajârchu nansap changpui senghei kha hmaimôk anhmu joa kae.

²¹Nangni’n nanhōilai RŌNGPU’n nanhnenga aleihri jo, tâk-kha nangni’n leirangei mak chei. Nanhringkhō seia nanṭōn tlo kha khavakha kae; nangni’n ahei tik a’m RŌNGPU ṭong kha juimak jo tin chei.

²²Nanhlam kakeihei kha thli’n atlen sik jo hei, nangni leh nanta’nthlop pui hei kha rehringa ankei sik hei, nankhōpui kha hmaimôkna leh inzakna anpek sik, nangni’n akaṭhamak nanheitlo kara kae.

²³Lebanona inphut anta heirôn cedar thingkâra kamōnga inhnga che; tâk-kha nat in abôm che pha heituk a lungset ka-om sik jo che mo, nuhmei naiha phut ka-ang sik che.

²⁴ RŌNGPU’n Judah reng Jehoiakim sapa Reng Jehoiachin hneng ahri, “Kei akahring Pathen kachang jâra, nang hi kachangtinga mêrchîkna kutkhi nalei chang inum karadoksōt sik che kae,

²⁵khana nang in naṭit mihei, nakathat hnōm hei hneng kapek sōt sik che kae. Babylon rengpa Nebuchadnezzar leh aremihei hnenga kapek sōt sik che.

²⁶Nang leh nanu rumhrat tak a kahnong sōt sik chei. Nang leh nanu intet makna ram a kase sik chei, khava hmun a khan nangni kathi sik chei.

²⁷Hiva ram hi nangni’n nanhmu hnōm nôk sik, tâk-kha ahei tik a’m hong inlemak tin chei.”

²⁸Ke’n kahri, “Reng Jehoiachin kha mi tamadumak, antahlonsōt jo jube kakōi kapō akachang jo mo? Khava jâra mo kae ama leh asahei kha antamanhret hêrmak ram a rehring sura avaka-om hei?”

²⁹O, ram, ram, ram! RŌNGPU’n heimo ati hi rangei roh:

³⁰“Hiva mi hi asahei inhmangna sik katlunga, chung sōkna aneihêr mak sik a maset a’npek jo kae. David kahlanga Judah ram a vai karôn sik sōn leh pâr neimak ning. RŌNGPU ke’n kahri jo.”