Read Komrem JEREMIAH 23 Bible Online

JEREMIAH 23 - Komrem bible

JEREMIAH 23

¹RŌNGPU mihei kasukset a ankavor inchek vaikarônhei chunga RŌNGPU ṭong tan sik hi heituk a ṭit ka-om mo!

²Amihei ka-ensui ankatinta sik rahōi kasōk vaikarônhei chungchânga, Israel RŌNGPU Pathen khan ahri kha hi kae: “Nangni’n kamihei, tinta mak chei; nanhnong kachek heia, nanchai dâk jo hei. Hiva ṭhatmak nantlo jâra tûn ke’n karâkna kapek sik chei kae.

³Ke’n kami ralak-hei, kakathek manchaina hei ram a inphut, kabek mantûp sik hei, anmani innrama kaṭhōi male sik hei. Sa katamtak annei sik, kapung sik hei.

⁴Anmani ka-ensui sik vaikarôn kakadei pek sik hei. Kamihei kha ṭit leh inpirna neimak jo hei ning, khana avea karâkna pemak jo hei ning. RŌNGPU ke’n kahri jo kae.”

⁵ RŌNGPU’n ahri, “David sōn mikadik inkhat reng sik a kakadeina sik pha kha kahong jo. Khava reng khan ram pumpui chunga kasing tak a akaṭha leh akadik vânga vai arôn sik kae.

⁶Ama rengchang pha, Judah mihei kha inhuk sik hei, Israel mihei kha kamōng tak a ka-om sik hei. Ama kha ‘Eini Huk manhringna RŌNGPU’ inti sik.

⁷RŌNGPU’n ahri, “Egypt ram a inphut a Israelhei anhei kaṭhōisōt akahring Pathen tia, karahminga an-inhâksêr makna sik pha kha kajōng jo.

⁸Khava kanek a, anmani’n sak ting ram a leh kalei manchek chaina ram ralak rakip a inphut Israel mihei anhei kaṭhōisōt akahring Pathen tia karahminga intep sik jo hei. Khava sō leh anmani’n anrama ka-om sik jo hei.”

⁹Kei kamalung kakōi jo, khana karatha innok jo. RŌNGPU jâra aṭong intheng sik jâra, Ju inrui ka-ang jo eng, mi inkhat ju katamtak ka-in kha kapō jo.

¹⁰Ram shung hi RŌNGPU hnenga taksenthei kachangmak mi kasip jo hei; anmani akaṭhamak hringkhōa ka-om hei khana anratha neina kha ṭhatmak a anhmang jo. RŌNGPU’n ahâksêr jâra ram khan ṭajai asui, ramhâng hei kha kachârsō hei.

¹¹RŌNGPU’n ahri, “Thempuhei leh sânkathemhei kha pathen kaneimak hei kae; Bek-inn shunga ṭōnse antatlo kha kasursōt hei.

¹²Antajui hlam kha inne sik khana inthim sik, ke’n anmani kamanpai sik hei, khana kapûr sik hei. Ke’n anchunga ṭōnse kamasō sik; anmani karâkna anhmuna sik pha kajōng jo. RŌNGPU ke’n kahri kae.

¹³Ke’n Samaria sânkathemhei setna kahmu jo: anmani’n Baal rahminga ṭong anhri, khana kamihei hlamlea anṭhōi jo hei.

¹⁴Tâk-kha Jerusalema sânkathem he’n akaset chet antlona kha kahmu jo: kajông heia maleisei ṭong anhri; akadik mak tlona kha tûte inkhat in anbâng makna sik, akadik mak tlona sik a mi an-inthōpui hei. Kei sik a chu anmani seng hi, Sodom leh Gomorrah kapōa ṭhamak hei.

¹⁵Khava jâra Akahratpen RŌNGPU ke’n, Jerusalema sânkathemhei chungchânga kahri kae: anmani tasâk sik a ramsai kakhatak, leh tûr anta-in sik a kapek sik hei, ajârchu anmani’n ram pumpuia khōvel omchen kha ramtina anmanpung joa kae.”

¹⁶Chunghnung RŌNGPU’n Jerusalema mihei hneng ahri, “Sânkathemhei ṭonghri kha rangei mak ruh; akadik mak inhōrna vâng anmansip chei. Anmani’n kei tahri kha hrimak hei, anmani tamandon kha anhri pek cheia kae.

¹⁷Kei ṭonghri inngei hnōm mak hei khan, heirakip injenpet sik antipek hei. Khana racham kase hei hneng inrengna khan tônhêr mak hei ning tia mi rakip hneng anhri pek hei.”

¹⁸Ke’n kahri, “Hiva sânkathem inkhatbek in, RŌNGPU mandonna in-ip kha manhret phâkmak hei. Mi inkhatbek inum asânsōt ṭong kha theimak jo hei khana manhret mak hei, rangei mak hei khana aṭong hri kha donpek mak jo hei.

¹⁹Ama hnuknat kha thlipui kae, mikaṭhamak-hei luchunga amaher sik hnuk kasetak thli kha kae,

²⁰khana ama’n atlohnōm seng kha atlosō mak kârseng bângmak ning. Kani hnung kakhôr ning khan ama mihe’n hivahi inthengtak a anhong manhret sik.”

²¹RŌNGPU’n ahri, “Ke’n hiva sânkathemhei hi tir mak hei eng, kha’num anbinga akasesōt hei kae. Ke’n sânsōt sik ṭong pek mak hei eng, kha’num karahminga ṭong anhria kae.

²²Anmani’n kamandonna in-ip kha anmanhret inchu, kaṭong kha kamipuihei hneng anhrilea akaṭhamak hringkhōa an-omna kha anmanhai sik hei khana mihōnna ṭōn antlona hei kha leikabâng sik jo heia kae.

²³“Kei hmun khat rōk a changloa hmun rakip a ka-om Pathen eng kha kae.

²⁴Kahmu tor makna sik hmun a tûte’n inthup tor mak ning. Marvân leh ralei hmun rakip a ka-om eng ti hi amanhret mak chei mo?

²⁵Khang khava sânkathem he’n anrahmanga sânsōt ṭong ke’n kajōng pek hei tia karahminga maleisei akahri, sânkathemhei ṭonghri hei kha ke’n kamanhret.

²⁶Khava sânkathemhei khan heituk chenmo maleisei antasyemsōt vânga kamihei hlamlea antalaṭhōi sik hei?

²⁷Anpa he’n kei anmahngi enga, Baal kahnung antajui kapōa khan, anmani’n anrahmang antahri pek hei vânga khan kami he’n kei anmahngi tor sik eng tia anmandona kae.

²⁸Rahmang kanei sânkathem khan hiva hichu rahmang hrep kae ati sik, rahmanga ahmu hrep rōk kha hri rasoh, tâk kaṭong kathei sânkathem khan chu taksen theitak a ṭong kha ahri manthang sik kae. Sahûm leh sapôt tekâk kha heimo aṭhatchômna ka-om?

²⁹Kei ṭong hichu hlungpui ahar-ahak a kavōk-khōi hmei inkhat leh hembung inkhat kapō kae.

³⁰Khava sânkathemhei kha inkhat leh inkhat ṭong inlo hei khana kei ṭong kapōa akahrile hei kha ke’n kadōihei.

³¹Khan chu khava sânkathemhei anbing ṭong kahrihei khana keia inphut ṭong akajōng kae tia kahri hei kha’m kadōihei.

³²RŌNGPU kei ṭonghri hi rangei ruh! Rahmang kanei sânkathemhei, maleisei kasiptak kahri hei kha ke’n kadōihei. Anmani’n khava anrahmang kha anhria, maleisei leh inlensak pum a, kamihei hlamlea anṭhōi manhmak hei. Anmani ke’n tir mak hei eng khana ansena sik a ṭong pek mak hei eng, anmani mipui sik a hnemna kase hei kae. RŌNGPU ke’n kahri jo kae.”

³³RŌNGPU’n kahnenga ahri, “Jeremiah, kami inkhat in a-emak leh sânkathem inkhat in, a-emak leh thempu inkhat in nahnenga, ‘RŌNGPU ṭong kha heimo?’ tia aderche’nchu, nang in hinga nahri sik kae, ‘Nang RŌNGPU sik a phurhrik che kha kae, khana ahlon sōt sik jo che kae.’

³⁴Kami inkhat in a-emak leh sânkathem inkhat in, a-emak leh thempu inkhat in, ‘RŌNGPU phurhrik,” ti ṭong hi ahmang inchu, ke’n ama leh an-innshung karâkna kapek sik hei kae.

³⁵Khava kanek a, anmani inkhat et in anṭhōn et hei hneng leh an-innkōhei hneng, ‘RŌNGPU’n heimo amasôn? RŌNGPU’n heimo ahri,?’ tia tijôk hei rasoh.

³⁶Khava jâra anmani’n, ‘RŌNGPU phurhrik,’ ti ṭong hi hmangmak hei rasoh, ajârchu mi inkhat in ahmang inchu, kaṭong hi ama sik a rônkahrik khet kamanchang pek sik heia kae. Mipui he’n akahring Pathen, an-Pathen, Chunghnung RŌNGPU ṭong hi akaletting anhmanga kae.

³⁷Jeremiah, sânkathemhei kha, ‘RŌNGPU’n heimo amasôn chei? RŌNGPU’n heimo ahri?’ tia der hei roh.

³⁸Khana anmani’n kaṭong pek hi anjuimak a, “RŌNGPU phurhrik,” ti ṭong hi anhmang inchu, nang in manthei hei roh,

³⁹ke’n anmani kamatu heia, khana anmani leh anpu anpa kaleipek hei ram, ankhōpui leh inṭhōia kahnenga inphut kahlatak a kahlonsōt sik hei kae.

⁴⁰Anchunga ahei tik chenna mahngi theimak sik inzakna leh hmaimôkna kamathlung sik kae.”