Read Komrem JEREMIAH 24 Bible Online

JEREMIAH 24 - Komrem bible

JEREMIAH 24

¹Bek-inn hmatak a theichang hraithuk 2 RŌNGPU’n amanhmu eng. (Khavakha Babylon Reng Nebuchadnezzar in Jehoiakim sapa, Judah reng Jehoiachin kha Judah mi hlamkakeihei, thingṭōn katlohei khana kut kathemhei leh Jerusalema inphut Babylona khummia da sik a aṭhōisōt hei kahnunga akasōk kae.)

²Ahma kakei hraithuk a khan theichang kaṭha hmatak a akahmin hei kha ka-om; ahlop hraithuk a khan akaṭhamak theichang, sâk aja hêrmak kha ka-om.

³Khava sōa, RŌNGPU’n kahnenga ati, “Jeremiah, heimo nahmu?” Ke’n kamasôn, “Theichang. Akaṭha hei kha kaṭha hêr hei, akaṭhamak-hei kha ṭhahêr mak hei, sâk thei changmak hei,”

⁴Khava jâra RŌNGPU’n kahnenga ati,

⁵“Israelhei Pathen, RŌNGPU ke’n kamandon khachu Babylona antakei mihei kha theichang kaṭha kapō hei kae, khana ke’n anmani kha lungset a karazen sik hei.

⁶Ke’n anmani kha ka-ensui sik hei, khana hiva ram a kaheiṭhōi male nôk sik hei. Ke’n anmani kasyemsōt sik hei, sukset mak hei ning, kaling sik hei, khana phôisōt mak hei ning.

⁷Anmani’n kei hi RŌNGPU eng kae tia manhret hnōmna malung kha kamannei sik hei. Khana anmani kami kachang sik hei, khana kei anmani Pathen kachang sik eng, ajârchu anmani’n anmalung pumpuia kahnenga hong inle sik jo heia kae.

⁸“Judah reng Zedekiah, khana ahnenga ka-om vaikarônhei khana Jerusalem mihei, hiva hmun a aleika-om achangmak leh Egypt a akase jo hei sik a khan chu, RŌNGPU ke’n anmani kha sâk sik a akaṭhamak jo theichang kapōa karazen sik hei.

⁹Anchunga inhmangna kamasō sik, khavakha raleichunga jât rakip he’n anṭit a inpir sik hei. Mihe’n sem tlona anhmang heia manuina annei sik hei, anmanuisō sik hei, anmani kaman chek-chaina hei hmun rakip a anrahming kha inhâksêrna inkhat a anhmang sik hei.

¹⁰Anmani kha anpu anpahei leh anmani hnenga kaleipek hei ram a khan mi inkhatbek a’m ahring makna sik a anchunga re, natset khana vonṭâm kamasōpek sik hei.”