Read Komrem JEREMIAH 26 Bible Online

JEREMIAH 26 - Komrem bible

JEREMIAH 26

¹Josiah sapa Jehoiakim in Judah reng aheichang tak leh sôt loa,

²RŌNGPU’n kahnenga ahri, “Bek-inn sumpuk a ngir roh, khana Judah khōpui heia inphut khava hmun a kamukna sik a akahong mi rakip hei hnenga nahri sik a ṭong kapek che rakip hei kha phôngsōt pek hei roh.

³Mihei khan ṭong anrangeia an-omchen kaṭhamak kha anhei masō khâk theia kae. Anmani’n khanga antlo’nchu, anṭōntlo ṭhatmak jâra ke’n suk manset sik heia kamantluk kha kamalung kathleng sik.”

⁴Mihei hnenga kahri sik kha RŌNGPU’n amanthei eng, “RŌNGPU ke’n kahri jo kha kae ti chu, nanhnenga kapek chei mantheina seng kha nantajuia,

⁵kasōk sânkathem kahei tir ṭhak hei ṭonghri chunga nanmalung nantamanhlut a kei hi nantajui nger sik eng kae. Anmani ṭonghri kha juihêr mak hei cheia kae.

⁶Nangni’n khanga juiloa nan-om ṭhak inchu, ke’n Shiloa katlo kapōa hiva Bek-inna hin katlo sik kae, raleichunga jât rakip in hiva khōpui rahming hi inhâksêrna inkhat a antahmang sik jo kae.”

⁷Thempuhei, sânkathemhei khana mipui he’n Bek-inna kaṭong hri kha anlei rangeia kae,

⁸RŌNGPU’n hri sik a ṭong apek hei seng eng kha kahrisō lim leh, anmani’n ansur enga ka-ông hei, “Hiva jâra nang tha sik chea narahōi kae!

⁹Heisik a mo RŌNGPU rahminga Bek-inn hi Shilo kapō hong kae sik khana khōpui hi inhmang sik khana tûte om mak hei ning nati?” Khava sō leh mipuihei khan ankakekhum tlit jo eng.

¹⁰Heimo akasōk jo kha Judah hlamkakei he’n anthei pha, reng-innpuia inphut inrangtak a Bek-inna kahong heia kekot ther a anhmun anhlō joa kae.

¹¹Khava sōa thempu leh sânkathemhei khan hlamkakei leh mihei hneng anti, “Hiva mi hi that sik a rahōi kasōk jo, ajârchu ama’n nikhōpui kadōia ṭong ahria kae. Nangni’n nankōr khet a nanthei jo.”

¹²Khava pha ke’n kahri, “Hiva Bek-inn leh khōpui dōina kaṭong hri nantathei kha RŌNGPU’n akaphôngsōt sik a ajōngtir eng kae.

¹³Nangni’n tuna nan-omchen khana nanchôn dânhei nantathleng sik kae, RŌNGPU nan-Pathen ṭong kha nantajui sik kae. Khanga nantlo’nchu, ama’n nanchunga inhmangna ahei choi sik a aleihri kha, amandonna kha athleng sik kae.

¹⁴Kei sik a chu, nanratha neina shunga ka-om eng! Nangni’n kadik, kaṭha tia nantamandon kha heitlo ruh.

¹⁵Tâk-kha hiva hichu manhret ruh: nangni’n kei nanthat eng inchu, nangni leh nankhōpui hi ṭhena kaneimak mi nanthat jâra ṭhena nanchen sik, ajârchu hiva ṭong-gîkna hi akahri sik anijōng katir kha RŌNGPU kae.”

¹⁶Khava sōa hlamkakeihei leh mipui he’n thempu leh sânkathemhei hneng anhri, “Hiva mipa hin ni-Pathen RŌNGPU rahminga nihnenga ṭong ahri; ama hi that sik changmak.”

¹⁷Khava sōa, upa ajing kangirsōt heia mipui ahong intûp hei hneng anhri,

¹⁸“Hezekiah’n Judah reng achanglai, Moresheth a sânkathem Micah’n mipuihei hneng Chunghnung RŌNGPU ṭonghri kha aleimanthei hei, ‘Hleipuk kapōa Zion kha ankhōi sik; Jerusalem kha sukset neinâk-hei manbukna hongkachang sik, khana Bek-inn hmebung kha ratu ramhâng hongkachang sik.’

¹⁹Reng Hezekiah leh Judah mihe’n Micah kha leithat mak hei. Khava kanek a, Hezekiah’n RŌNGPU kha kajana aneia ama lungsetna chenna sik aleitlo. Khana RŌNGPU’n anchunga inrengna kamasō sik aleiti kha amalung athleng jo. Tûnchu eini’n nibinga ṭit ka-om tak khōdengthei kha nichunga nihei rôn sōt sik jo kae.” (

²⁰Khana khan mihlop inkhat, Kiriath Jearima inphut Shemaiah sapa Uriah, RŌNGPU rahminga hiva khōpui leh jât-hei dōina Jeremiah taleihri kapōa akahri inkhat leika-om.

²¹Rn Jehoiakim leh aremihei leh aṭōnpui karôn he’n Uriah tahri kha anthei pha, rengpa’n thatna sik a aleitlo jo. Tâk-kha Uriah’n khavakha aleitheia, aṭit a Egypt ting katlân jo.

²²Kha achang inum, Reng Jehoiakim in Achbor sapa Elnathan leh mi ajing Egypt a Uriah kasur sik a aleitir hei.

²³Ama kha Reng Jehoiakim hneng anheiṭhōia ama’n amanthat jo hei khana ataksa kha mipui hrena thlân hmun a anvahlon jo.)

²⁴Tâk-kha kei chu Shaphan sapa Ahikam inthōpuina kachen jâra, mipuihei hneng apek manhlut mak hei khana athat mak heia kae.