Read Komrem JEREMIAH 27 Bible Online

JEREMIAH 27 - Komrem bible

JEREMIAH 27

¹Josiah sapa Zedekiah’n Judah reng aheichang lim bât leh RŌNGPU’n kahnenga

²Savun hrui leh thinga rîngke kabinga kasyemna sik khana karînga ka-orna sik amanthei eng.

³Khava sō leh Edom, Moab, Ammon, Tyre khana Sidon renghei hnenga ṭong mathlungna sik, khavakha Reng Zedekiah inhmupui sik a Jerusalema akahong anpalâi hei hneng manrônna sik a RŌNGPU’n amanthei eng.

⁴Chunghnung RŌNGPU, Israel Pathen khan anrenghei hneng antavahri sik a ke’n ṭong pekna kaneina sik hei amanthei eng, RŌNGPU’n ahri:

⁵“Karatha inhnak leh kahratna vânga khan ke’n vânhnōi ralei, mihring, khana raleichunga aka-om ranhring rakip kasyema kae; khana ke’n kakadei mihei hneng khavahei kha kapek hei.

⁶Kasōkpa, Babylona Reng Nebuchadnezzar ratha thōia hiva jât-hei seng ankada inhlut kha kei eng kae, khana ramshahei kapha’m ama sepa inzen sik a kamanṭang hei.

⁷Jât rakip in ama anrazen sik, ama khet jât-hei nammathlûkna pha kha ahong tlung mak kârseng, anmani’n asahei khana atu hei katlunga anrazen sik hei. Khava sō leh ratha kaneitak jât-hei khana reng kalentak hei kha ama jât he’n anrazen nôk sik hei.

⁸“Tâk-kha jât inkhat achangmak leh rengram inkhat in ama vairônna thōia ahlutmak inchu ke’n khavahei kha rea, vonṭâma khana hrise nat a karâkna kapek sik heia kha Nebuchadnezzar in amanrampet mak hei kârseng anthōk sik.

⁹Nansân kathemhei achangmak leh hnungṭong kanhrisōt tor kati hei, rahmanga achangmak leh akathi rathla bekna achangmak leh hmitphedôi kantlotor kati hei ṭong kha rangei mak ruh. Anmani ankheng in Babylon rengpa hneng hlutmak ruh anti cheia kae.

¹⁰Anmani’n anhōn chei khana nanrama inphut ram kahlatak a anman ṭhōisōt sik jo cheia kae. Ke’n nangni kahnong sōt sik chei, khana nangni karampet sik jo chei.

¹¹Tâk-kha tu jât achanga Babylon Rengpa thōia anhlut a ama anrazen inchu, ke’n anmani kha anrama kaman om sik hei khana anhleihei mama an-inthlō sik, khana khan ka-om sik hei. RŌNGPU ke’n kahri jo kae.”

¹²Hivatak hi Judah rengpa Zedekiah hnenga kavahri, “Babylon rengpa hneng hlut roh. Ama leh amihei kha ansepa tlo roh, khan chu nang kahring sik che.

¹³Heisik a mo nang leh nami he’n rea, nat leh sat a, vonṭâma akathi sik chei? Babylon rengpa hnenga akahlutmak tu jât-hei chunga akasōk sik a RŌNGPU’n ahri kha hivahi kae.

¹⁴Babylon rengpa hneng hlutmak ruh katia akahri sânkathemhei ṭong rangei mak ruh. Anmani’n antahōn chei kae.

¹⁵RŌNGPU atak-khet in anmani kha tir mak hei eng, ama rahminga nanhnenga maleisei antahri kae ati. Khava jâra ama’n nangni ahnong sōt sik chei, khana nangni leh sânkathem khava maleisei kahri hei seng kha anthat sik chei.”

¹⁶Khava sōa ke’n thempuhei leh mihei hnenga RŌNGPU tahri hei kha kahri pek hei, “Bek-inna sêr leh sum ale’nchoisōt hei kha Babylona inphut inranga anheichoi male sik jo kati hei ṭong kha rangei mak ruh. Anmani’n nanhnenga maleisei antahri kae.

¹⁷Anmani ṭong kha rangei mak ruh! Babylon rengpa hneng hlut ruh, khan chu kahring sik chei! Hiva khōpui hi heisik a mo, akakōi neinâk-hei manbukna akachang sik?

¹⁸Anmani kha akadiktak sânkathem anchang inchu khana kaṭong kha anhnenga a-om inchu, Bek-inna leh rengpa innpuia ka-om sêr leh sum kha Babylona anchoi makna sik a RŌNGPU Akahratpen kei hneng ader hei rasoh.”

¹⁹(Reng Nebuchadnezzar in Judah reng Jehoiakim sapa Jehoiachin, khana Judah leh Jerusalem hlamkakeihei Babylona aṭhōilai hei khan ama’n kachohei, sum-êng tuikhur, gâri khana Bek-inn karōi ṭhahrep adahlon hei.)

²¹“Bek-inna leh Jerusalema reng-innpuia antadahlon karōihei chungchânga Chunghnung RŌNGPU, Israel Pathen in heimo ahri hi rangei ruh:

²²Anmani kha Babylona anchoi sik hei, ke’n khavahei sik a kamalung kapek mak kârseng khana khan ka-om sik hei. Khava sō leh hiva hmun a kahei choi nôk heia kada sik hei. RŌNGPU ke’n kahri jo kae.”