Read Komrem JEREMIAH 29 Bible Online

JEREMIAH 29 - Komrem bible

JEREMIAH 29

¹Jerusalema inphut Babylona Nebuchadnezzar in rehringa aṭhōi thempuhei, sânkathemhei, mipui hlamkakeihei khana aralak-hei hneng chithi kamazet a kaleimanrôn hei.

²Chithi kha reng Jehoiachin, anu, reng-innpuia ṭōnpui karônhei, Judah leh Jerusalema hlamkakeihei, thing leh hlunga ret kahem rabek hei, kut kathem ṭōn katlohei kha rehring sura anṭhōisōtsō hei kahnunga kamazet kae.

³Chithi kha Judah rengpa Zedekiah’n Babylon reng Nebuchadnezzar hnenga aleitir Shaphan sapa Elasah leh Hilkiah sapa Gemariah hnenga kaleipek hei.

⁴Akahratpen RŌNGPU Israel Pathen in hnōm pekna aneia, Nebuchadnezzar in Jerusalema inphut Babylona khuma da sik a aṭhōisōt mipuihei hnenga ahri:

⁵‘Inn sak hei ruh khana om ruh. Rahōn thlō ruh khana hmuchi thlai nanling leh sâk ruh.

⁶Hmōi ṭhōi una sa leh nai nei ruh. Nansahei kha’m nuhmei-puise nei hei sona anmani’n sa leh nai neinôk hei rasoh. Nanmija nantamanpung sik kae, mantlâk yamak.

⁷Kurkhum a katirna chei khōpuihei lensōtna sik a ṭōn tlo ruh. Anmani sik a kahnenga derna nei ruh, ajârchu anmani ankhangsōt inchu, nangni’m kakhangsōt sik chei.

⁸RŌNGPU, Israel Pathen ke’n gîkna kapek chei kae, nankâra ka-om sânkathem he’n achangmak leh hnungṭong kansânsōt thei kati he’n nangni hōnmathlâk mak chei rasoh. Anmani rahmang heia khan nanmalung pek mak ruh.

⁹Anmani’n kei rahminga nanhnenga maleisei antahri kae. Ke’n anmani heitir mak hei eng. Chunghnung RŌNGPU, ke’n kahri jo kae.’

¹⁰“RŌNGPU’n ahri, ‘Babylona kum 70 atlang pha, ke’n nangni sik kamandon kha kamanhmu sik chei, khana nangni inna kaheiṭhōi nôk sik chei tia ka ṭongtep kha ke’n katlosōt sik kae.

¹¹Nangni sik a kei mantlukna, inrengna sik changloa khangsōtna sik ṭōnmantluk khana hnunga sik nan-inhōrna mantlukna hei kha kei rōk in kamanhret.

¹²Khava sōa nangni’n kei nanbek sik eng. Nangni kahong sik chei, kahnenga nander sik eng, khana ke’n kamasôn sik chei.

¹³Nangni’n nanjong sik eng khana nanhmu sik eng, ajârchu nangni’n nanmalung pumpuia nanjong sik jo enga kae.

¹⁴Ôk, ke’n kahri kae, nangni’n nanhmu sik eng, khana ke’n nanrama kaman om nôk sik chei. Ke’n kahnong manchekna chei ram leh hmun rakip a inphut kakhôm manchun sik chei, khana ke’n nangni katirsōtna ramheia inphut kaheiṭhōi male nôk sik chei. RŌNGPU, ke’n kahri jo kae.’

¹⁵“Babylona RŌNGPU’n sânkathemhei apek ung nanti.

¹⁶Hiva khōpuia ka-om mipuihei, nangnihei innshunghei, nangni leh inṭhōia kurkhum a antaṭhōisōt mak hei, khana David vairônna rengram a vaikarôn reng chungchânga RŌNGPU’n heimo ahri kha rangei ruh.

¹⁷Chunghnung RŌNGPU’n ahri, ‘Ke’n anmani chunga re, vonṭâm khana hrise kamathlung sik hei, anmani kha sâk ayamak akaṭop theichang kapō kamanchang sik hei.

¹⁸Anmani kha re, vonṭâm, leh hrise vânga kamanloi sik hei, vânhnōia akahmu jât rakip in ṭit-inpir sik hei. Hmuntina kakathek chai sik hei, anhnenga akasōk omchen kha mihei malung tônna leh inpirna annei sik. Mihe’n anmanuisō sik hei, khana anrahming kha inhâksêrna annei sik.

¹⁹Ke’n kasōk sânkathem heia inphut ṭong kapek ṭhak hei kha anjuimak jâra anchunga hivahi akasōk sik kae. Anmani’n rangei hnōm mak heia kae.

²⁰Babylona rehringa katirsōt chei nangni nankhenga RŌNGPU ke’n kahri hi rangei ruh.’

²¹“Chunghnung RŌNGPU, Israel Pathen in, ama rahminga nanhnenga maleisei akahri Kolaiah sapa Ahab leh Maaseiah sapa Zedekiah chungchânga ahri jo. Ama’n anmani kha Babylon reng Nebuchadnezzar kut a apek manhlut sik hei, nanhmit hmua athatsōt sik hei.

²²Jerusalema inphut Babylona kurkhum a ṭhōisōt jo hei khan mi inkhat anhâksêr hnōm pha, anmani’n anti sik, ‘Nang um Zedekiah leh Ahab Babylon rengpa’n anhring pum a hmeia aro hei kapōa RŌNGPU’n ro che rasoh!’

²³Hivahi anmani mahâmsetna kha kae, ajârchu anmani’n ṭit ka-om tak setnahei kha antlo, kajông hei khana RŌNGPU rahminga maleisei anhria kae. Hivahei hi RŌNGPU lungdo changmak; anmani ṭōntlohei kha ama’n amanhret, khana ama’n anmani dōina sâkhi kachang. RŌNGPU’n ahri jo.”

²⁴Nehelama ka-om Shemaiah, atak-khet rahminga Jerusalema mi rakip hei hneng leh Maaseiah sapa Zephaniah thempu hneng leh thempu rakip hnenga chithi aleikatirpa sik a Chunghnung RŌNGPU Israel Pathen in kahnenga ṭong apek eng. Hiva chithia hin Shemaiah’n Zephaniah hneng hinga amazet.

²⁶“RŌNGPU’n Jehoiada kahlânga thempu amanchang che, khana tûnchu Bek-inna akalenpen ṭōnkarôn kachang jo che. Tu-tu anchanga sânkathem ung tia a’nhlem hei kha nasur heia anhrak a thirhrui naman-or sik hei kha naṭōn kae.

²⁷Mihei hnenga sânkathem inkhat kapōa ṭong akahriṭhak Anathoth a Jeremiah hnenga hivahi heisa mo natlo mak?

²⁸Ama kha khâm sik kae, ajârchu ama’n Babylona ka-om mihei hneng kurkhum a pha kasôttak ka-om sik hei, inn leh hlei insyem hei rasoh, khō sât hei rasoh, rahōn syem hei rasoh, antaling hei kha sâk hei rasoh tia amanthei heia kae.”

²⁹Zephaniah’n chithi kha kahnenga atei pek eng,

³⁰khava sōa RŌNGPU’n kahnenga amanthei eng,

³¹Babylona kurkhum a aka-om rakip hei hneng Shemaiah chungchânga ṭong hi tirna sik a amanthei eng: “RŌNGPU ke’n Shemaiah khana ama sōn leh pâr rakip hei kha karâkna kapek sik hei. Ke’n ama kha tir mak eng, tâk-kha ama’n nangni hneng sânkathem kapōhrep a ahria khana amaleisei kha nangni amantaksen cheia kae. Nankâra ama sōn leh pâr neimak ning. Kamihei sik a ṭōn kaṭha katlo pek sik hei kha ahmu theina katlunga ama chu hringmak jo ning, ajârchu ama’n mihei kha kei dōina sik a amanthei heia kae. RŌNGPU ke’n kahri jo kae.”