Read Komrem JEREMIAH 30 Bible Online

JEREMIAH 30 - Komrem bible

JEREMIAH 30

¹RŌNGPU, Israel Pathen in

²kahnenga ahri, “Ke’n nahnenga kahri pek che rakip kha lekha a mazet roh,

³ajârchu kami Judah leh Israelhei kalo manhlutna sik pha kha kahong jo. Anpu anpahei hneng kaleipek ram a kaheiṭhōi male sik hei khana anmani’n avea anchen nôk sik. RŌNGPU ke’n kahri jo kae.”

⁴RŌNGPU’n Judah leh Israel mihei hneng ahri,

⁵“Ṭit leh inpir ka-om ṭap rasa, ṭit ka-om, mōngna rasa kachangmak pengna kha kathei.

⁶Tûn inhnga roh khana mandon roh! Pase’n naite amatet phung mo? Heijâra mo mi rakip in anvon antamatua nuhmei naiha kaphu aka-ang hei? Heijâra mo mi rakip akadângper hei?

⁷Ṭit ka-om tak kani kha kahong jo; kani ralak leh tekâkthei changmak kamihei sik a inrengna pha kha kae, tâk-kha anmani kahring sik hei.”

⁸Chunghnung RŌNGPU’n ati, “Khava kanihei kha ahong pha leh, ke’n anhrak a rîngke kha kasuk mathlek pek sik hei, khana ankhōpna thîrhrui hei kha kalosōtpek sik hei, khana anmani ram hlop mihei sōk changmak jo hei ning.

⁹Khava kanek a, ke’n reng inkhat a kamatung sik David sōn leh pâr he’n, RŌNGPU an-Pathen, kei hi anrazen sik jo eng.

¹⁰“Kamihei, ṭimak ruh; Israel mihei, inpir mak ruh. Khava ram kahlatak a inphut kurkhum a nan-omna inphut kahuksōt sik chei. Nangni inna hong inle sik cheia kha kamōnga ka-om sik chei; nangni inhuk sik chei tûte’n maṭhitmak chei ning.

¹¹Kei nanhnenga kahong sik eng khana kahuk sik chei. Ke’n kachai kathekna chei ram a jât rakip ankhenga kasuk manhmang sik hei, tâk-kha nangni chu suk manram mak chei ning. Ke’n nangni karâkna pek loa damak chei ning; tâk-kha karâkna kapek chei pha, injentak a katlo sik. RŌNGPU ke’n kahri jo kae.”

¹²RŌNGPU’n amihei hneng ahri, “Nankôkna bi kha damthei mak ning, nan-intônna bi kha dam tor mak ning.

¹³Nangni ka-ensui sik tûte om mak, nankhōihli damna sik om mak, nandamna sik a inhōrna om mak a kae.

¹⁴Nan-inlungset he’n anmahngi jo chei, anmani’n adonmak jo hei. Ke’n nangni inrepuihei kapōa kabuhlu chei; nankarâkna kha inhnak ajârchu nansetnahei katam hranghra khana nanṭhat makna kalen hêr.

¹⁵Nan-intônna jâra inphin mak ruh; nangni sik damna om mak jo. Ke’n hing’hin karâkna kapek chei kae, ajârchu nansetna katam hranghra khana nanṭhat makna kalen hêr.

¹⁶Tâk-kha tûnchu, nangni kasuset rakip hei kha sukset sik hei kae, nankadōi rakip hei kha kura khum sik a ṭhōi sik hei kae. Nangni kasuk inrim rakip hei kha suk manrim sik hei kae, nangni kachom rakip hei kha chom sik hei kae.

¹⁷Ke’n ṭhatchômna kamannei nôk sik chei; nankôkna bi kaman dam sik, nankadōi he’n, ‘Zion hi hnongsōt jo kae, tûte’num donmak jo hei,’ anti’num leiti hei rasoh. RŌNGPU ke’n kahri jo kae.”

¹⁸RŌNGPU’n ahri, “Kamihei kha anrama kaman om nôk sik hei, innshung rakip kalungset sik hei; Jerusalem sakmanther nôk sik kae, areng-innpui matung nôk sik kae.

¹⁹Khava hmun a ka-om he’n choi ka-ânna hla anlasak sik. Inpâk a laka-ông sik hei. Kavângpek hei jâra anmija lahong kapung sik; kavângpekna khan kajana anlachen sik.

²⁰Ke’n hiva jât hi tenlaia aratha neina kha kalapek nôk sik kahnettak a avea kalaphun nôk sik. Anmani kasuk inrim rakip hei kha karâkna kalapek sik hei.

²¹Anmani jât shunga inphut vaikarôn hong kasōk sik hei, anmi heia inphut anreng sapa hong kasōk sik. Ke’n kabek pha ama kha kahong sik, ajârchu bekloa tu mo akahong ngam sik a? Anmani kami kachang sik hei, khana kei an-Pathen kachang sik eng. RŌNGPU ke’n kahri jo kae.”

²³RŌNGPU hnuknat khachu thlipui kae, mikaṭhamak-hei luchunga inhnaktak a kahrâng sik. Ama’n tlo sik a a’ntluk kha atlo mak hma seng haimak ning. Ami he’n akahong sik kani heia khavakha inchênna anhong manhret sik.