Read Komrem JEREMIAH 33 Bible Online

JEREMIAH 33 - Komrem bible

JEREMIAH 33

¹Kei sumpuk a khuma ka-omlai khan, RŌNGPU ṭong kahnenga avea kajōng nôk a kae.

²Ralei kasyem, ahme leh achâng kasyem khana ahmun a akada RŌNGPU’n kahnenga ahri. Arahming RŌNGPU intipa khan ahri,

³“Kei eibe roh, ke’n kamasôn sik che; namanhret hêrmak a’nlak tatak kahri pek sik che.

⁴Israel Pathen RŌNGPU ke’n kahri kae, Jerusalema innhei khana Judah reng-innpuihei kha buhlu leh kekhuma a-om jâra khan suksetpet sik hei kae.

⁵Ṭhahrep chu Babylon mihei leh re intuk sik hei, kahnuknat leh kahnuk inthakna jâra kavōk manjâm sik mihei kalōng khan innhei kha anmansipsō sik hei.

⁶Achang inum hiva khōpui leh amihei hi kaman dam sik hei khana antaksa kalamanṭhat nôk sik hei. Anhnenga lung mōngna leh inhukna katluk a kalamanhmu sik hei.

⁷Ke’n Judah leh Israel kamanhao sik hei, hmalaia kapōa kalasyemsōt sik hei.

⁸Kei dōina anset tloa inphut kaman theng sik hei, khana andōina eng leh ansetnahei karangei mandam sik hei.

⁹Jerusalem hi kei sik a, inpâkna, kajana khana inlensakna jōng sōkna kha akachang sik kae; khana Jerusalem mihei chunga ṭōn kaṭha katlohei khana khōpuia kamanhao hei kha anhmu pha raleichunga jât rakip in anṭit sik a kha innok sik hei.”

¹⁰RŌNGPU’n ahri, “Mihe’n anhria, hiva hmun hi nêrdiram kapōa kachi jo, mihring leh sha om mak jo hei anti. Antahri kha kadik; Judah khōpuihei leh Jerusalem hlampui hei kha akarōkpet a ka-om hei; ramsha leh mihring tûte om mak jo. Kha’num hiva hmun heia hin nangni’n nanthei nôk sik

¹¹inpâkna leh hōina ông rasa khana hmōiṭhōi revei mahring rasa hei. Mipui he’n ka-Bek-inna inpâkna tōkna anheichoi pha hla antasak kha nanthei sik; anmani’n hinga anti sik, ‘Chunghnung RŌNGPU hneng manpâkna pek ruh. ajârchu ama akaṭha kae, alungsetna kha kumleikōa kae.’ Ke’n hiva ram hi hma kapōa kamanhao nôk sik. RŌNGPU ke’n kahri jo kae.

¹²Chunghnung RŌNGPU’n ahri, “Hiva ram, nêrdiram kapō, mi leh sha om makna hmun a hin, kemōng kakhem he’n ankemōng khemna sik ramhâng alaka-om sik kae.

¹³Hmebung chunga khōpui heia, hmebung kunga, Judah thlang intonga, Benjamin ram shunga, Jerusalem kimvea khōheia, Judah khōpui heia, kemōng kakhem he’n ankemōng aja anlatei nôk sik heia kae. RŌNGPU ke’n kahri jo kae.”

¹⁴ RŌNGPU’n ahri, “Ke’n Judah leh Israelhei hnenga ka’ntepna kha katlo mathlukna sik pha kha kajōng jo.

¹⁵Khava pha ke’n David sōna mikadik inkhat renga kakadei sik. Khava reng khan ram pumpuia akadik leh akaṭha kha atlo sik.

¹⁶Judah leh Jerusalem hei kha ahuksōt sik hei, inhuk a ka-om sik hei. Khōpui kha, ‘Eini Hukmanhringna RŌNGPU,’ inti sik.

¹⁷RŌNGPU kei intep eng, ti chu Israel reng akachang sik a ahei tik a David sōn inkhat aka-om ṭhak sik kae

¹⁸khana kei ani inzen sik leh ro-inthoina, hmuchi inthoina khana ran inthoina akatōk sik a Levi phunga thempu aka-om ṭhak sik kae.”

¹⁹RŌNGPU’n kahnenga ahri,

²⁰“Ke’n sûn leh jân hei leh intepna kasyem jo, anpha hrep a anhongna sik a; khana khava intepna kha ahei tik a kōimak ning.

²¹Kha leh in-angtlinga kasōk David hneng, reng ahong kachang sik sōn leh pâr ahei tik a aneina sik a intep jo eng, khana Levi phunga thempuhei hneng, kei anrazen ṭhakna sik enga intep jo eng; khava intepna hei kha kōithei hêrmak ning.

²²Ke’n kasōk David sōn leh pâr khana Levi phunga thempu anja kamanpung sik hei, marvân ârsi leh tui-ôngpui panga nêrdi hei kapōa anja tei torlo kamanchang sik hei.”

²³RŌNGPU’n kahnenga ahri,

²⁴“Ke’n kakadei innshung 2, Judah leh Israel kahlonsōtna hei ṭong mihe’n antahri kha namanhret jo mo? Khava jâra anmani’n kamihei hi hnōi anse heia, jât inkhat hei kae tia mandon mak jo hei.

²⁵Tâk-kha, RŌNGPU ke’n, sûn leh jân hei leh intepna inkhat kanei, raleichung leh chungvân vai karôn sik dân kasyem hei.

²⁶Khana khavahei kha sôilo jen a katlosōt kapōa, kasōk Jacob sōn leh pârhei hneng khana kasōk David hnenga ka ṭongtep kha kamathlung nger sik kae. Ke’n Abraham, Isaac khana Jacob sōn leh pârhei chunga vai karôn sik David sōna inphut mi inkhat kakadei sik kae. Ke’n kamihei chunga lungset maritna kanei sik khana akanei akahao kamanchang nôk sik heia kae.”