Read Komrem JEREMIAH 36 Bible Online

JEREMIAH 36 - Komrem bible

JEREMIAH 36

¹Josiah sapa Jehoiakim in Judah reng achangna kum 4 tlukna khan, RŌNGPU’n kahnenga ahri,

²“Lekha inze inkhat lo roh, khana ke’n Judah leh Israel khana jât-hei chungchânga kahri rakip mazet manhlut roh. Josiah reng achang laia inphut tûn katlung, nahnenga ṭonghri kaphut laia kamanthei seng rakip kha mazet hei roh.

³Judah mihei chunga ṭōnse masō sik a kamantluk hei hi anmani’n anthei pha, anṭhatmakna hlam heia inphut he’nhesōt thei khet sik heia kae. Khan chu anmani ṭhatmakna hei leh ansetnahei kha karangei mandam sik hei.”

⁴Khava jâra ke’n Neria sapa Baruch kabek a, RŌNGPU’n kahnenga ahri rakip kha kahri pek jo. Khana Baruch in khava rakip kha lekha inze rabua amazet manhlut jo hei.

⁵Khava pha ke’n Baruch hneng hinga kamanse: “Kei Bek-inn shunga hlut sik hi ahnōm pek mak jo hei.

⁶Tâk-kha abâna mipui thlai hngōi pha, nang chu kamanse hnōm che. RŌNGPU’n kahnenga ahri seng kha, ke’n nahnenga kahria namazet rakip kha, anmani’n antheisō petna sik nateipek sik hei kae. Mi rakip in khana Judah mi ankhōpui et a inphut akahong hei kha’num anthei etna sik hmun inkhat a vateisōt roh.

⁷Anmani RŌNGPU hnenga andera anṭhatmakna hlam a inphut hong inhe thei khet sik heia kae, ajârchu RŌNGPU’n hiva mipuihei hi ama ṭit ka-om tak leh ahnuk inthakna vâng khan amaṭhit jo heia kae.”

⁸Khava jâra kamanthei kapōtak a Baruch in RŌNGPU ṭonghei kha Bek-inn shunga avateia kae.

⁹Jehoiakim in Judah reng achang kum 5 thla 9 atluk pha, mipui he’n RŌNGPU lungset chentheina sik a bu anhngōia kae. Hiva buhngōi hi Jerusalema ka-om seng leh Judah khōpui heia akahong seng in annit a kae.

¹⁰Khava pha, mi rakip in anrangei pha, lekha inze shunga kahri rakip hei kha Baruch in ateisōt a kae. Hivahi Bek-inn shunga, reng inna lekha inzetpa, Shaphan sapa Gemariah innden shunga atei kae. Ama innden kha Bek-inn Kekot Ther hlutna chunga sumpuk hnenga kae.

¹¹Shaphan tupa, Gemariah sapa Micaiah in RŌNGPU ṭonghri kha, lekha inze shunga inphut Baruch in atei kha athei jo.

¹²Khava pha ama reng-innpuia, reng inna lekha inzetpa innden a vakase, khana khan ṭōnkarôn rakip le’ntûp hei. Reng karôt a ṭong inzetpa Elishama, Shemaiah sapa Delaiah, Achbor sapa Elnathan, Shaphan sapa Gemariah, Hananiah sapa Zedekiah, khana alak ṭōnkarôn seng leika-om hei.

¹³Micaiah in mipuihei hneng Baruch tateisōt athei rakip kha ahri pek hei.

¹⁴Khava pha ṭōnkarônhei khan Jehudi (Kushi tusōn, Shelemiah tupa, Nethaniah sapa) kha Baruch hneng antira mipuihei hneng ateisōt lekha inze kha ahei choi sik a anva manbek. Baruch in lekha inze kha ahei choi pek hei.

¹⁵Anmani’n “In-ong roh, kanhnenga lekha inze kha heitei roh,” anti. Khan chu Baruch in atei jo.

¹⁶Ama’n ateisō pha, anmani inkhat leh inkhat kaṭi jo heia in-entō jo hei khana Baruch hneng anti, “Hiva ṭong hi rengpa hneng nimathlung nger sik kae.”

¹⁷Khava pha anmani’n ahnenga ander, “Tûn, amanthei roh, hiva ṭong rakip hi heikhong inmo nalei mazet? Jeremiah’n ahri pek che mo?”

¹⁸Baruch in amasôn hei, “Jeremiah’n ṭong rakip ahri pek eng, khana khavakha muk vânga hiva lekha inzea hin kamazet manhlut hei kae.”

¹⁹Khava pha anmani’n anhri pek, “Nang leh Jeremiah akasesōt cheia a’nthup nger sik chei kae. Nan-omna kha tûte’n manhret mak hei rasoh.”

²⁰Karôt lekha inzetpa Elishama innden shunga khan lekha inze kha ṭōnkarônhei khan anda, khana anmani rengpa karôt a kase heia ṭong rakip kha thang anvakōi jo.

²¹Khava pha rengpa khan Jehudi kha lekha inze kalo sik a aleitir. Ama’n Elishama innden a lekha inze kha avaloa rengpa leh aṭōn karôn akimvea kangir hei seng hnenga ateisōt pek jo hei.

²²Khavakha phebi lai kae, rengpa kha aphebi reng-innpuia hmei hma le’n onga kae.

²³Jehudi’n arup 3 4 ateisō lim leh, rengpa khan chemcha kasintek inkhat vânga a-âttan heia hmeishunga ahlon manhlut jo hei. Lekha inze seng kha aro manvâm sō mak hma seng khang’khan aleitlo jo.

²⁴Tâk-kha rengpa achanga ṭōnkarônhei anchanga hiva ṭong kathei rakip ṭitna neimak hei khana malung dongna malârmak hei.

²⁵Elnathan, Delaiah, khana Gemariah he’n lekha inze kha rengpa’n aro makna sik a anngek ravâng, heite leidon mak.

²⁶Khava sōa ama’n rengsapa Jerahmeel hneng, Azriel sapa Seraiah leh Abdeel sapa Shelemiah leh inṭhōia, kei leh kalekha inzetpa Baruch kasur sik a ṭong aleipek hei. Kha’num RŌNGPU’n keini aleithup unga kae.

²⁷Ke’n Baruch hneng kahri pek a amazet lekha inze kha reng Jehoiakim in aro manvâm sōa khan RŌNGPU’n kahnenga

²⁸lekha inze inkhat lonôk a ahma inkeia a’nzet rakip kha avea mazet nôkna sik a amanthei eng.

²⁹RŌNGPU’n rengpa hnenga hri sik a amanthei eng, “Nang in lekha inze kha naro manvâm jo, khana Jeremiah’n heisa mo Babylon rengpa kha kahong sik a kha hiva ram hi asuk manset sik khana amihei leh ranhei athatna sik hei kha amazet, tia ahnenga nader.

³⁰Khava jâra tûn RŌNGPU ke’n, Reng Jehoiakim nahnenga kahri kae, David rengram a nang sōn inkhatbek in vai rônmak jo ning. Nang kalōng kha sûn leh kani tasat sik, jân leh kavur takatōm sik a hlonsōt sik kae.

³¹Ke’n nang leh nasōn-napâr hei khan chu naṭōn karônhei nankhenga setna nantlo jâra karâkna kapek sik chei kae. Nangni nanchanga Judah leh Jerusalem mihei anchanga tûte’n kagîkna chei hi heitea donmak chei, khava jâra kamaṭhitna chei ṭōnsehei kha nanchunga kamathlung sik jo kae.”

³²Khava pha ke’n lekha inze ahlop inkhat kaloa lekha inzet Baruch hnenga kapek jo, khana kahri rakip ama’n amazet manhlut joa kae. Ama’n ahma inkeia a’nzet kapōtak a ke’n kahri pek ṭong leh in-angtlinga amazet a kae.