Read Komrem JEREMIAH 38 Bible Online

JEREMIAH 38 - Komrem bible

JEREMIAH 38

¹Mattan sapa Shephatiah, Pashhur sapa Gedaliah, Shelemiah sapa Jehucal, khana Malchiah sapa Pashhur he’n ke’n mihei hnenga kahri pek hei,

²khava RŌNGPU ṭonghri kha anleithei jo, khachu, “Tu achang inum hiva khōpuia ka-om mi kha rea, vonṭâma khana hrisea kathi sik. Tâk-kha tu achang inum akatlânsōt a Babylonhei hneng akahlut mi kha thimak hei ning; anhringkhō rōk chu inhuk sik hei.”

³Ke’n anmani hneng RŌNGPU ṭonghri kha kahri peksa hei, “Ke’n khōpui hi Babylon remihei kut chunga kapek sōt sik, khana anmani’n antahlō sik jo kae.”

⁴Khava pha ṭōnkarôn he’n rengpa hneng kase heia anhri, “Hiva mipa hi that nger sik kae. Ama’n hinga ahri jâra khōpuia remihei malung ngarsōna kha amanhmang jo, khana khōpuia aka-om mi rakip um malung tlâksamna amannei jo heia kae. Ama’n mipui inthōpui hei rong chu timak a, anmalung mantônna sik rōk kha amadua kae.”

⁵Reng Zedekiah’n amasôn hei, “kaṭha hêr jo, khan chu, nangni’n ama heimo nantamanlo hnōm, manlo ruh, ke’n kha’m theimak chei ning.”

⁶Khava jâra anmani’n anṭhōi enga rengsapa Malchiah tuikhur inkhat, reng-innpui sumpuk a aka-oma khan hrui vâng anmakhei mathlâk jo eng. Khana khan tui om mak, tâk bōnthlōk rōk kae, ashunga khan kahlut jo eng.

⁷Achang ravâng, reng-innpui shunga ṭōnkatlo Ethiopia mi Ebedmelech in, kei tuikhur shunga antakhum eng kha athei joa kae. Khava laitak khan rengpa’n, Benjamin Kekot a karôt ṭōn atloa leika-om.

⁸Khava jâra Ebedmelech kha rengpa hneng kasea avahri,

⁹“Reng Kalûr, hiva mihei tatlo hi dikmak. Khōpui shunga sâk sik a-om mak jo pha, Jeremiah hi vonṭâma akathi nger sik jo pha hin, anmani’n Jeremiah hi tuikhur kōk shunga ankhuma kae.”

¹⁰Khava pha rengpa khan Ebedmelech kha mi 3 aṭhōi heia, kei kha kathi mak hma anikeisōtna sik a ṭong apek jo.

¹¹Khava jâra Ebedmelech in mihei kha leh reng-innpui shunga karōi bukna den a kase heia, pōn marō hei avaloa hrui vânga ahei makheipek eng.

¹²Hrui in avîn makna sik eng, pōnse hei kha kakalâk thōia kadana sik heia amanthei eng. Ke’n khanga kaleitlo,

¹³anmani’n tuikhura inphut ankeisōt eng. Khava sōa sumpuk a anda jo eng.

¹⁴Pha khat nôk a Reng Zedekiah’n Bek-inn hlutna kot 3 tlukna hmun a ava manṭhōi nôk eng, khana ama’n ahri, “Ke’n nang ṭong kader sik che, akadiktak namanthei sik enga kamadu.”

¹⁵Ke’n kamasôn, “Ke’n akadiktak kahri pek che’nchu nathat sik eng, khana ke’n kamanse che’num, mankhôkdek mak tin che.”

¹⁶Khava jâra reng Zedekiah’n marûk a intepna aneia, “Hringna anikapek Akahring Pathen kapan a intep eng, nang ke’n that mak che ning, khan chu nang kathat hnōm hei kut chunga’m pek mak che ning,” ati.

¹⁷Khava pha ke’n Zedekiah hneng Chunghnung RŌNGPU Israel Pathen ṭonghri kha kamanthei, “Nang in Babylon rengpa ṭōnkarônhei hneng nahlut inchu nang kahring sik che, khana hiva khōpui hi romak hei ning. Nang leh na-innshung mi seng kahring sik chei.

¹⁸Tâk-kha nang in nahlutmak inchu, hiva khōpui hi Babylonhei kut chunga pek sōt sik kae, anro mathlâk sik, khana nang um anhnenga inphut tlânsōt mak tin che.”

¹⁹Tâk-kha Rengpa’n amasôn eng, “Ke’n nimi Babylona akatlân jo hei kha kaṭit hei. Anmani hneng kei anpek sōt sik enga kha ansuk manrim thei enga kae.”

²⁰Ke’n kahri, “Anmani kut chunga nang pek sōt mak hei tin. RŌNGPU ṭong kha najui sik a kangek che; khan chu heirakip nang sik a akaṭha kachang sik, khana nahringkhō huksōt kachang sik.

²¹Tâk-kha nang in nahlutmak inchu, RŌNGPU’n omchen ahong kasōk sik kha amanhmu jo eng.

²²Khana khan Judah innpuia aka-om nuhmeihei ankhenga Babylon rengpa ṭōnkarônhei hneng antakei hei kha kahmu hei. Anmani’n ansepum a antahri ṭong kha rangei roh, ‘Rengpa ṭhōn kaṭhapen he’n ama kha hlam kalet a anṭhōi jo, achunga vai anrôn jo. Khana tûnchu akehei bōnthlōk shunga kahlut jo, ama kha aṭhōn he’n andahlon jo.’”

²³Khava pha ke’n kahrisa, “Nannupui hei seng leh naipanghei ankhenga Babylon ting anṭhōisōt sik hei, khana nangkhet um anmani kut a inphut tlânsōt tor mak tin che. Nang Babylon reng in khum mi inkhat a akei sik che, khana khōpui hi ro manvâma ka-om sik.”

²⁴Zedekiah’n amasôn eng, “Hiva ni’nbekna hi tûte manthei mak roh, nahringkhō heite timak tin.

²⁵Ke’n nang ka’n bekpui che hi ṭōnkarôn he’n anthei inchu, anmani kahong sik heia kha heiṭong mo nihri tia ander sik che. Heirakip nahrisōpek he’nchu, anmani’n that mak che ni’ung tia intep sik hei.

²⁶Nang kurkhum a akathi sik a avea katir makna sik che, nang in kei nangek eng kae tia hri hnâm pek hei roh.”

²⁷Khava sōa ṭōnkarônhei seng kha kahong heia anhongder jo eng, kei tahri sik a rengpa tamantheitak eng kha kahri pek jo hei. Khava pha anmani’n heite tlotor mak jo hei, ajârchu tûte’n rengpa leh kan-inbekna kha theimak heia kae.

²⁸Khana Jerusalem kha anhlō mak kârseng kei kha reng-innpui sumpuk a anleikhum eng.