Read Komrem JEREMIAH 4 Bible Online

JEREMIAH 4 - Komrem bible

JEREMIAH 4

¹RŌNGPU’n ahri, “Israel mipuihei, nanhong inle hnōm inchu kahnenga hong inle jo ruh. Kahnenga taksenthei nanchang inchu ke’n kamater limhei kha hlonsōt hei ruh,

²karahminga ṭong nan-intep sik hi kadik sik. Khan chu jât rakip in vângṭhat anchenna sik a ander sik jo eng khana anmanpâk sik jo eng.

³ RŌNGPU’n Judah leh Jerusalem mipuihei hnenga ahri, “Nanta thlō mak nanhlei hei kha thlō hei ruh; nanhmuchi hei kha rahling kâr heia vormak ruh.

⁴Judah leh Jerusalem mihei, nan-RŌNGPU kei leh niṭong intepna kha nit ruh, khana kahnenga intōksōt ruh. Kha achangmak inchu, ṭhatmak nantlo jâra kahnuknat kha hmei kakâng kapōa kakâng sik. Kakâng sik, khava kathat tor tûte om mak hei ning.”

⁵Ram pumpuia pengkun tum ruh! Rahnaktak leh intheng senga khō ôn ruh! Judah leh Jerusalema mihei kha, rekur tukkhum khōpui heia antlânna sik hripek hei ruh.

⁶Ziona hlam kha khingpek hei ruh! Inhukna sik a tlân ruh! Sôt mak ruh! Sak tinga inphut insuksetna kalentak RŌNGPU’n inrengna kha ahei rôn sik.

⁷Shabakkai in a’nthupna hmun a inphut ajōng kasōk kapōa jât-hei kasuk inhmang sik kha heikasōk jo. Judah kasukset sik a ama kha kahong. Judah khōpuihei kha suk manhmanga ka-om sik hei, khana khan tûte inkhat om mak hei ning.

⁸Khava jâra bora pōnse kha insi ruh, ṭap ruh, inkōi ruh ajârchu RŌNGPU hnuk natna kha Judah inphut inhesōt mak a kae.

⁹RŌNGPU’n ahri, “Khava kani ning chu, renghei khana anṭōnpui karôn he’m an-in ngamna inhmang sik, thempuhei anmalung kana sik, sânkathem he’num andet-hla sik jo.”

¹⁰Khava sōa ke’n kati, “Chunghnung RŌNGPU, nang in Jerusalema mipuihei kha pui katluk a nahōn jo hei! Nang in mōngna ka-om sik naleiti, tâk-kha anrehrok a chemjâm khan ahngâk jo hei.”

¹¹Nêrdiram a inphut akalum thli kahrâng anhnengting ajōng kahrâng hi sik kae tia Jerusalema aka-om mihei hnenga hripekna sik pha kha alakajōng sik kae. Sarasi katlen thli kahrâng kadaineng kapō kha changmak ning.

¹²RŌNGPU ṭongpek a akahong thli khan chu khava kanek a inhnakchet sik a kae! Amihei chunga ṭong tanna kaphôngsōt kha RŌNGPU ama khet kha kae.

¹³Enruh, sumtuk kapōa inrepuihei kha kajōng hei. Anshakor gârihei kha thlisip ka-ang hei, khana anshakorhei kha marhmu kanek a inrang hei. Eini inhmang jo me! Eini inhmang thâm jo me!

¹⁴Jerusalem, nang inhuk theina sik a, namalung kabōk kha sôp jo roh. Heituk kasôt mo setna lungthim rōk namandon hi sik?

¹⁵Dân khōpuia leh Ephraim hmebung heia inphut ṭongkarônhei khan ṭong kahōimak kha thang anjōng kōi.

¹⁶Anmani kha jât-hei inkôk sik leh Jerusalem hnenga ram kahlatak a inphut inrepuihei kajōng jo hei tia akahri pek sik a kahong hei. Hina inrepuihei hin Judah khōpuihei kadōia khōtlâng an-ôn sik.

¹⁷Khana hleipuk inkhat mihe’n antakake khum kapōa Jerusalem kha ankakekhum sik, ajârchu ami he’n RŌNGPU kadōia re antlo. RŌNGPU’n ahrisōt jo kae.

¹⁸Judah, nabinga na-omchen leh naṭōntlo dungjuia hivahei hi nahei rôn manhlut kae. Naset na’n hiva khōdeng theina hi amasō kae; hivahin namalunga asun kathle jo kae.

¹⁹Lung natna! Lung nat hi kei thōktor mak eng! Kamalung! Kamalung hi invaia tuk-tuk ati jo! Kei sip katia om tor mak jo eng; ke’n pengkun rasa hei leh rekōnna anpeng rasa kathei.

²⁰Châmna inkhatsō leh inkhat in ajui; ram pumpui inhmangsō jo. Manhret manloa kanpōn-innhei insuk inhmang jo hei; pōnzâr hei ahar-ahak a inhler jo hei.

²¹Heituk kasôt mo re intukna hi ka-ena aka-om sik eng khan pengkun mahring hei karangei hi sik?

²²RŌNGPU’n ati, “Kamihei hi kamohei, amanhret mak hei. Anmani naipang kamo ka-ang hei; anmani manhretna neimak hei. Anmani ṭōnse tlona chu kathemhei, tâk-kha ṭōn kaṭha tlona chu them mak hei.”

²³Raleichung kaleithlir, inhmangna rōk kahmu; chungvân kaleithlir, vâr leiom mak.

²⁴Tlângbung heia kaleithlir, anmani kha innok hei, hmebunghei kha hmating, kahnungting innok heia kae.

²⁵Mihring inkhatbek um hmumak eng; vahei kapha’m kajōngsōt sō hei.

²⁶RŌNGPU hnuknat a’nhnakrei jâra ram kaṭha kha nêrdiram kachang jo; akhōpuihei kha inhmangsō jo hei. (

²⁷RŌNGPU’n ati jo khachu, ralei pumpui hi ramthip kachang sik jo, tâk-kha manhmang cherna chu changmak ning.)

²⁸Ralei in ṭajai asui sik; chungvân um inthim sik jo. RŌNGPU’n ahrisōt jo khana amandona kha thlengmak ning. Ama’n intepna anei jo, akahnung inlemak jo ning.

²⁹Shakor remihei leh the kakâp mihei peng rasa khan mi rakip katlânsō sik jo hei. Ṭhen khat in ramthip a katlân sik hei; alak he’n hlungkare kâra kake sik hei. Khōpui rakip andahlona kadairip sik, khana khan tûte inkhatbek um om nôk mak jo hei ning.

³⁰Jerusalem, nang inhmang jo che! Heisa mo pōnsen vâng ala’nret che? Heisa mo rangkachek vâng a’nret chea khana nahmit-hei nalamandum? Heite kahnemmak sik a nahme ṭhatna sik a inret che! Nalungset mihe’n enhnōm mak jo hei che khana anthat hnōm jo che.

³¹Naiha kaphu kapōa nuhmei kaṭap rasa, nuhmei inkhat in sa ahma kakei amatet a a-inkōi rasa kapōa kathei. Khavakha akaphuk sântor lo Jerusalem rasa kae, akut arazit a ati, “Kei inhmang jo eng! Anmani kei kathat sik a kahong jo hei.”