Read Komrem JEREMIAH 40 Bible Online

JEREMIAH 40 - Komrem bible

JEREMIAH 40

¹Rehlam kakeipa Nebuzaradan in Rama khōa kei aleimasō eng pha khan RŌNGPU’n kahnenga ṭong aleihri pek eng. Jerusalem leh Judah ram a khum mi sik a Babylona antakei hei leh inṭhōia thirhrui vânga ankhit enga anleiṭhōisap ung.

²Rehlam kakeipa khan hlampanga aṭhōisōt enga ahri, “RŌNGPU, nan-Pathen khan hiva ram hi sukset sik a aleimaṭhit,

³khana tûn ama’n atlo sik a ahri kha atlosōt joa kae. Nanmipui he’n RŌNGPU dōina setna antlo jâra hiva rakip hi akasōk jo kae.

⁴Tûnchu, ke’n nakut chunga a’nkhitna hrui kasōtpek chea kamasō jo che. Nang in kei leh inṭhōia Babylona nahong hnōm inum kahong thei che, ke’n ka-ensui sik che. Tâk-kha nahong hnōm mak inchu, hong rangei mak. Nang in namaduna hmun chenna kasethei che, nakadei sik a ram pumpui hi ka-om jo.”

⁵Ke’n kamasôn mak pha, Nebuzaradan in ahri, “Babylon rengpa khan Judah khōpui heia vai karôna amanṭang Shaphan tupa, Ahikam sapa, Gedaliah hneng inle roh. Nang ama leh namihei kâra ka-om thei sik che, khana nase hnōmna hmun rakip a kasethei sik che.” Khava pha ama’n kutchoi ṭhahrep leh bu leh thlai kachoi sik a apek eng, khana kahlam amanhro jo eng.

⁶Khana kei Mizpah khōa Gedaliah leh ram shunga mi antadahlon hei leh avaka-omsap sik a kase jo eng.

⁷Judah ṭōnkarôn ṭhahrep leh remi ṭhahrep Babylonhei thōia alakahlut mak ka-om hei. Anmani’n Gedaliah kha Babylon rengpa’n Judah ram a sara khōdeng katheia antadahlon hei chunga vai karôna amanṭang jo ti ṭong antheia kae.

⁸Khava jâra Nethaniah sapa Ishmael, Kahrea sapa Johanan, Tanhumeth sapa Seraiah, Netophah khōa Ephai sahei khana Maacah ram a inphut Jezaniah leh anmihei Mizpah khōa Gedaliah hneng kase hei.

⁹Gedaliah khan anhnenga ahri, “Babylonhei thōia nangni nanhonghlut sik hi ṭit sik a heite om mak tia ṭong kapek chei hi kae. Nangni hiva ram a khō chōn ruh, Babylon rengpa sepa tlo ruh, nangni sik a heirakip ṭhatna kachang sik.

¹⁰Kei Mizpah a ka-om sik eng, Babylonhei anhong pha nangni kahlâng kathleng kha kachang sik eng. Tâk-kha nangni ju, theikara, olive thai nanman khôma nanbuk thei sik, khana nanta hlō khōhei khan ka-om thei sik chei.”

¹¹Khava pha Israelhei Moab, Ammon, Edom leh ram hlop heia aka-om hei khan Babylon rengpa’n, Israel mi ṭhahrep Judah ram a an-om sik ahnōm pek jo hei khana Gedaliah kha vaikarôn amanṭang jo tia anthei jo.

¹²Khava jâra inchek-chaia an-omna ramhei kha anhei dahlona Judah ram a he’nle jo hei. Mizpah ram a Gedaliah hnenga kahong hei khana khan anmani’n vomhrui ju leh theikara katamtak anlōk a anmanbuk a kae.

¹³Hivasōa Johanan leh rehlam kakei ṭhahrep Babylonhei hneng alakahlut mak hei kha Mizpah a Gedaliah hneng kahong hei

¹⁴khana ahnenga anhri, “Ammon reng Baalis in Ishmael kha nang kathat sik a ahei tir ti hi manhret mak che mo?” Tâk-kha Gedaliah’n leitaksen mak.

¹⁵Khava sōa Johanan in marûk katia ahnenga ahri pek, “Kei se eng sona Ishmael vathatsōt rong, khana tûte’num tu tatlo mo ti kha manhret mak hei ning. Heisa mo ama’n athatsōt sik che kha nihnōm pek sik?”

¹⁶Tâk-kha Gedaliah’n amasôn, “Khavakha tlomak roh! Ishmael chungchânga nahri kha dikmak!”