Read Komrem JEREMIAH 41 Bible Online

JEREMIAH 41 - Komrem bible

JEREMIAH 41

¹Khava kum a thla 7 tlukna, Elishama tupa, Nethaniah sapa Ishmael, reng innshung mi, khana reng ṭōnpui karôn inkhat khan pase 10 leh inṭhōia Mizpah khōa Vaikarôn Gedaliah inhmupui sik kahong hei. Anmani ankhenga bu ansâklai,

²Ishmael leh pase 10 hei khan chemjâm anradok a Gedaliah kha anthatsōt jo.

³Ishmael khan Mizpah a ka-om Babylon remi seng leh Israel sa rakip anthatsōt jo hei.

⁴Abân kania, Gedaliah marûk a antathat kha tûte’n anmanhret mak hma,

⁵Shechem, Shilo khana Samaria inphut pase 80 heikatlung hei. Anmani’n anhnerhme anvoa, anpōn ankeihlera, antaksa an-ât mankôk heia kae. Hmuchi leh thai marim katui Bek-inna tōksōt sik a anheichoi hei.

⁶Khava jâra Ishmael in Mizpah a inphut heikasōk a avaratō heia, asepuma leikaṭap a kae. Anhnenga ama ahong pha ati, “Honghlut ina Gedaliah so hong-en ruh,” ati hei.

⁷Anmani’n khōpui shunga anhlut lim bât leh Ishmael leh ami he’n anthatsōt heia tuikhur inkhat shunga ankalōng hei kha anmathlâk jo hei.

⁸Tâk-kha anmani kâra mi 10 he’nchu Ishmael hneng anhri, “Lungset a keini athat mak roh! Keini gehu, bunim, olive thai, khana khōihning hleia kanthup hei.” Khava jâra anmani chu that mak jo hei.

⁹Ishmael in athat mihei kalōng ahlon manhlutna tuikhur kha akalen inkhat kae, khavakha Israel rengpa Baasha in Reng Asa’n re aleisō laia aleikhōr kae. Ishmael in tuikhur kha amithat kalōng vâng amansipphet a kae.

¹⁰Khana ama’n reng sanuhei leh alak Mizpah a ka-om rehlam kakeipa Nebuzaradan in Gedaliah ensuina thōia ada hei seng kha khum mi amanchang jo hei. Ishmael in aṭhōi heia Ammon ramkei kajōna akei jo hei.

¹¹Johanan leh a’nṭhōipui remi hlamkakei seng in Ishmael ṭōnse tlo kha anthei jo.

¹²Khava jâra anmani’n anmihei leh akahnung anthlura khana Gibeon tuikhur kalen hnenga anva phak jo.

¹³Ishmael khum mihei khan, Johanan leh remi rup hlamkakeihei kha anhmu pha inpâk jo hei,

¹⁴hong inhe heia anmani langting hong katlân jo hei.

¹⁵Tâk-kha Ishmael leh ami 8 hei khachu Johanan hnenga inphut inphesōt heia Ammon ramting katlânsōt jo hei.

¹⁶Khava sōa Ishmael in Mizpah a Gedaliah athatsōa, rehringa aleikei hei, remi, nuhmei, naipang khana ṭōnkarônhei seng kha rehlam kakeihei leh Johanan in anhrung jo hei.

¹⁷Babylon rengpa’n ram vaikarôn amanṭang Gedaliah kha Ishmael in aṭhat jâra hin, anmani’n Babylon mihei anṭit jo hei. Babylon heia inphut inphesōtna sik a Egypt ramting kase jo hei. Anmani ansena hlam a Bethlehem hnenga Chimham hmun a inhnga heia kae.