Read Komrem JEREMIAH 42 Bible Online

JEREMIAH 42 - Komrem bible

JEREMIAH 42

¹Khana remi rakip hlamkakeihei, Karea sapa Johanan khana Hoshaiah sapa Azariah inveina mi rup rakip kahong heia

²kahnenga anti, “Lungset a keini tader che hi tlo roh! Keini sik a RŌNGPU, ni-Pathen hneng derna nei roh. Akahring seng keini sik a der roh. Pha khat a eini hi leikatam me; nang in nahmu kapōa, tûnchu akatlômtek andahlon jo me.

³Eini’n khonting mo akase sik me, heimo nitlo sik ti kha RŌNGPU ni-Pathen in amanhmuna sik me der roh.”

⁴Ke’n kamasôn hei, “Khan chu kaṭha hranghra jo. Nangni’n nantangek eng dungjuia RŌNGPU ni-Pathen hneng kader sik, khana ama’n ahri rakip, kamanthei sik chei.”

⁵Khava pha anmani’n anhri, “RŌNGPU ni-Pathen in keini sik apek che ṭongpek seng kha keini’n kanjuimak inchu, keini kadōia RŌNGPU kha taksen ka-om leh akadik sâkhi chang rasoh.

⁶Kantlaina sik achanga khana kantlai makna sik achang inum, ahnenga aderpek roh kantati RŌNGPU ni-Pathen kha keini’n kanjui sik. Keini’n ama kanjui inchu heirakip kaṭhachôm sik.”

⁷Ni 10 sōa RŌNGPU’n kahnenga ahri;

⁸khava jâra ke’n Johanan leh a’nṭhōipui remi hlamkakeihei, khana mi ralak rakip hei kha kabek manchun jo hei.

⁹Ke’n anhnenga kahri, “RŌNGPU, Israelhei Pathen, nanta mander eng khan ahri,

¹⁰‘Nangni hiva ram a hin, hing’hin nan-omthang hnōm inchu; ke’n nangni kasyemsōt sik chei khana keihler mak chei ning; kaling sik chei khana phôisōt mak chei ning. Nanchunga suksetna kalei mathlung kha kamalung inrim hêr.

¹¹Babylon reng nantaṭit kha bâng jo ruh. Ke’n ka-ompui chei, ama ratha neina inphut kahuksōt sik chei.

¹²Ajârchu kei hi lungsetna kasip eng, ke’n ama kha nanchunga lungsetna kamannei sik a kha nan-innting amanle sik chei. RŌNGPU ke’n kahri jo kae.’

¹³“Tâk-kha nangni Judah ram a dahlona ka-om mi seng in, RŌNGPU, nan-Pathen ṭongpek juiloa aka-om mak sik chei kae khana hiva ram a om sik kha akada mak sik chei kae. ‘Dâng, keini kanse leh Egypt ram a vaka-om sik ung, khina khinchu re de nôk mak ning, re rasa theimak ning, ṭâm demak ning,’ nantati hêrmak sik kae. Nangni’n khanga nanti’nchu, Chunghnung RŌNGPU, Israel Pathen khan ati, ‘Nangni’n Egypt ram a nanse leh va-om sik nanmadu’nchu,

¹⁶nantaṭit re khan ahlō sik chei nantaṭit vonṭâm in ajui sik chei, khana Egypt a khan kathi sik chei.

¹⁷Egypt a akasea aka-om hnōmseng ankhenga rea, ṭâma, hrisea kathisō sik hei. Tûte inkhatbek akahringa om mak ning, anchunga inrengna kamathlung sik khana inphut tûte’n pesōt tor mak ning.’

¹⁸“RŌNGPU, Israel Pathen khan ahri, ‘Jerusalem mihei chunga kahnuk natna leh kahnuk inthakna kajōngsun mathlâk kapōa, nangni Egypt ram a nanse’nchu, nangni chunga kahnuk natna kajōngsun mathlâk sik kae. Nangni, mihring hmit ena mi inrimnatak kachang sik chei; mihe’n sem anmanlo sik chei khana nanrahming kha inhâksêrna anhmang sik jo. Nangni hiva hmun hi hmu nôk mak jo tin chei.’”

¹⁹Khava sōa kahri nôk a “Judah ram a dahlona ka-om mipui nangni Egypt ram a semak ruh tia RŌNGPU’n ahri pek jo chei. Khava jâra tûn ke’n karakôk chei kae

²⁰ti chu nangni’n thina theitak a nansukṭhe jo. Nangni’n RŌNGPU ni-Pathen hneng nansik a akader sik a nanleingek eng, khana ama ṭongpek rakip nanjui sik tia le’ntep chei.

²¹Tûnchu ke’n khavakha kamanthei jo chei, tâk-kha RŌNGPU, ni-Pathen in nangni manthei sik a ajōng tirna eng rakip kha nangni’n juimak jo chei.

²²Khava jâra tûnchu hivahi mandon ruh: nangni nanse leh nanva om hnōmna ram shunga khan rea, a-emak leh ṭâma, khana natsea akathi sik chei kae.”