Read Komrem JEREMIAH 46 Bible Online

JEREMIAH 46 - Komrem bible

JEREMIAH 46

¹Jât-hlop hei chungchânga RŌNGPU’n kahnenga ahri,

²Egypt chungchânga ahei hri manphut. Jehoiakim in reng achangna kum 4 changna Euphrates Tuidung hnenga ka-om Carchemish a Reng Nebuchadnezzar in re aleitor jo Egypt Reng Neco remihei chungchânga ama tahri kha hi kae.

³“Egypt ṭōnkarônhei khan khōtlâng an-ôn, ‘Nanpho mantluk ruh, Hmating rehmunting injôk ruh!

⁴Shakor mantluk una chōng ruh! In-gôr una ngir ruh, lukhu inkhu ruh! Nankasei man ngei hei ruh! Nanrevon hei invon ruh!’

⁵“Tâk-kha ke’n heimo kahmu jo?” tia RŌNGPU’n ader eng. “Anmani anṭit reia hnung inle jo hei. Anremihei kha ankahnungting anheinam hei; ṭitna’n akatōm jo heia antor chenna katlân jo hei, ankahnung hei-en lopmak hei.

⁶Kayâng tak a akatlân hei kha inphesōt tor dekmak hei; remi he’m tlânsōt tor mak hei. Sak tinga Euphrates Tuidung hnenga, anmani inpai heia katlu jo hei.

⁷Nile Tuidung kapōa, tuidunga tuilen kapōa ahong kathōisōt so tu mo kae?

⁸Nile kapōa ahei kaketou, tuidunga tui ahonglen kapōa ahong kakhangtou so Egypt kae. Egypt in ati, ‘Kei katho sik eng, khana raleichung kamakhu pet sik; khōpui leh khana aka-om mihei kaman rampet sik hei.

⁹Shakorhei kha ansena sik, shakor gârihei an-inkhōn inthlana sik ṭong pek hei ruh! Remihei tirsōt hei ruh: Ethiopia leh Libya inphut pho kachoihei Lidya inphut the kachoi kathemhei kha tirsōt hei ruh.’”

¹⁰Hivahi Chunghnung RŌNGPU Akahratpen kani kae: tuning hin ama’n phu ahlo sik kae; tuning ama’n a’nrepuihei karâkna apek sik hei kae. Achemjâm khan avon akhop mak lai seng asâk sik hei, atuihre achim mak lai seng anthisen kha a-in sik kae. Tuning Akahratpen in ran inthoina kha atōk jo khava Euphrates hnenga sak tinga khan.

¹¹Egypt mihei, Gilead a vase ruh, khana hlei leh ai vajong ruh! Nanhlei leh ai rakip hnemna kase kachang jo hei; heite inkhat in amandam tor mak chei ning.

¹²Jât he’n inzak nanratōna kha anthei jo; mi rakip in nanṭajai suina rasa anthei jo. Remi inkhat in remi inkhat chunga ke achoia, an-inhnibât a raleia katlusap jo hei.

¹³Babylon rengpa Nebuchadnezzar in Egypt chunga buhluna sik ahong pha, RŌNGPU’n kahnenga ahri. Ama’n ati,

¹⁴“Egypt a khōpuihei, Migdol, Memphis khana Tahpanhe heia hivahi phôngpek hei roh: ‘Nanbinga inhrungna sik a intluk ruh, nantanei rakip re shunga suk manhmang sik jo kae!

¹⁵Heijâra mo nan-Pathen Apis kha akatlu? RŌNGPU’n avōk mathlûk a kae!’

¹⁶Nanremihei kha inpaihei khana katlu hei. Inkhat in inkhat hneng inti hei, ‘Inrang roh! Inna nimihei hneng se jo rih ani kadōihei chemjâma inphut inphesōt jo rih!’

¹⁷“Egypt rengpa kha rahming ther phō ruh, ‘Rasa katam Mi Inlensak Pha kaṭha inhmangpa,’ ti ruh.

¹⁸Chunghnung RŌNGPU kei, reng eng kae. Kei akahring Pathen eng kae. Tabor Tlâng in tlânghei chunga akhupsi hei kapōa Carmel Tlâng in tuipui chunga inshângtak a angir kapōa, nangni nankabuhlu mipa ratha hratna kha khanga kachang sik.

¹⁹Egypt mihei, khum mi kachang sik a ankeina sik chei intluk ruh! Memphis kha nêrdiram, mi om makna ram-inhmang manchang sik kae.

²⁰Egypt kha sehrat pui kaṭhatak sak tinga tûr kanei mathōi in abe kapō kae.

²¹Amanu’n atanek remihei kha’m sehratte kapōa ratha heite neimak hei. Anmani ngir tor mak hei inrepui tor mak hei; ankhenga anhmai anmahea katlân hei. An-inhmangna sik kani, an-insuk inramna sik pha kha hong katlung jo.

²²Ankadōi remihei kha anhong pha, Egypt in mari insôn kapōa katlân jo. Anmani’n hreicha vânga, mihe’n thing antatuk manphûr kapōa

²³khana ratu kahmang antasâm kapōa amanu kha anbuhlu jo. Anremihei kha anja intei tor mak; khai kanek a katam hei.

²⁴Egypt mihei kha inzakna anpek hei; anmani kha sak tinga mihe’n hmaimôk anpek jo hei. RŌNGPU ke’n kahri jo.”

²⁵Akahratpen RŌNGPU Israel Pathen in ahri, “Ke’n Thebe pathen Amon khana Egypt leh apathenhei khana arenghei leh inṭhōia karâkna kapek sik hei. Ke’n Egypt rengpa leh ama chunga taksenna kaneihei rakip kaṭhōisōt heia

²⁶anmani ankathat hnōm, Babylon Reng Nebuchadnezzar leh aremihei kut chunga kapek sōt sik hei. Tâk-kha hnunga chu, anmani’n Egypt a hma anleiom kapōa vaka-om nôk sik hei. RŌNGPU ke’n kahri jo kae.

²⁷“Kamihei ṭitmak ruh, Israel mihei inpir mak ruh. Nangni khuma nan-omna ram a inphut, khava ram kahlatak a inphut ke’n nangni kahuk sik chei. Nangni inna hong inle sik chei khana kamōng tak a ka-om sik chei. Nangni inhuktak a ka-om sik chei, tûte inkhat in maṭhitmak chei ning.

²⁸Kei nanhnenga kahong sik eng khana kahuk sik chei. Ke’n nangni kaman chek-chaina chei ram a jât rakip hei kha kasuk manram sik hei, tâk-kha nangni chu manhmang mak chei ning. Nangni karâkna pek loa damak chei ning, tâk-kha karâkna kapek chei pha, kadâitak a katlo sik. RŌNGPU, ke’n kahri jo kae.”