Read Komrem JEREMIAH 47 Bible Online

JEREMIAH 47 - Komrem bible

JEREMIAH 47

¹Egypt rengpa’n Gaza re asōmak hma, Philistihei chungchânga RŌNGPU’n kahnenga ahri,

²Ama’n ati, “Enroh! Sak tinga tui kalen jo, tuilen laia tuidung inkhat kapōa jōng kalōng inhnak sik. Khava khan ram leh khana aka-om rakip khōpuihei leh ashunga ka-om mihei akachûm sik hei. Mihe’n an-inthōpui sik a mi anbek sik hei, raleichunga aka-om seng inhnaktak a kaṭap sik hei.

³Anmani’n shakor tlân ke-rasa anthei sik, shakor gâri inlik rasa kâng hei intlir rasa anthei sik. Nu leh pa he’n ansahei en lopmak hei ning; ankut hei antaksa sira anmakhei hnâm sik heia kae.

⁴Philistihei suksetna sik pha kajōng jo, Tyre leh Sidona inphut inthōpuina aleika-om rakip inkhâr sik. RŌNGPU ke’n Crete tuipanga inphut akahong hei, Philistihei kha kasukset sik hei.

⁵Gaza mihei chunga inrengna kalentak jōng katlung jo, khana Ashkelon mihei kadai hnger jo hei. Philisti mihei kha heituk kasôt mo akaṭap sik hei?

⁶Nang kapeng chea nati, ‘O RŌNGPU chemjâm! Heituk kasôt mo a’nlek sik che? Napaia inle ina va’nkhum roh, khan om ina inhnga hnâm roh!’

⁷Tâk-kha atlo sik a ṭōn kapek pha, heikhonga mo a’nhnga hnâm thei sik? Ashkelona re kasō sik, tuipui panga aka-om mihei chunga re asōna sik a ke’n ṭong kapek jo kae.”