Read Komrem JEREMIAH 48 Bible Online

JEREMIAH 48 - Komrem bible

JEREMIAH 48

¹Moab chungchânga Chunghnung RŌNGPU tahri kha hi kae: “Nebo mi lungset ka-om hei, ankhōpui suk manset kachang jo! Kiriathaim sura ka-om jo, arekur rape kahnet kha suk manchima ka-om jo, khana amihei kha inzakna anchen jo;

²Moab lûrna lenna kha katlang jo. Inrepui he’n Heshbon ansur jo khana Moab jât-hei suksetna sik anmantluk jo. Madmen khōpui kha mandai hnger sik kae; akadōia remihei injôk sik hei.

³Horonaim mihei kapeng heia anti, ‘Invōkna rōk! Suksetna rōk!’

⁴“Moab kha sukset a ka-om jo; naipanghei ṭa rasa rangei ruh.

⁵Luhith katlunga hlampuia an-inhnuk rasa, Horonaim jōnna hlamdunga, inrima anṭap rasa kha rangei ruh.

⁶Anmani’n anti, ‘Inrang roh, nahringna sik a tlân roh! Ram a shakōrtung kapōa tlân roh!’

⁷“Moab, nahratna leh nahaona chunga nang inngam che, tâk-kha tûnchu nang kapha antor sik jo che; na-Pathen Chemosh kha areng sapahei, athempuhei leh inṭhōia rehringa ankei sik hei.

⁸Suk mansetna inphut khōpui inkhatbek inpesōt mak ning; Hme leh dâm suksetsō sik kae. RŌNGPU ke’n kahri jo kae.

⁹Moab sik a thlânhlung kam roh; inrangtak a sukset sik jo kae. Akhōpui sukset a dahlon sik hei kae, khana khan tûte om nôk mak hei ning.” (

¹⁰RŌNGPU ṭōn kha malung pumpuia akatlomak mi kha hâksêr chen rasoh! Achemjâm inlek a mikathat mak mi kha hâksêr chen rasoh!)

¹¹RŌNGPU’n ahri, “Moab hi kahōia hong ka-om ṭhak, rehringa tûte’n keiphung mak hei. Moab hi jube shunga kachokloa aka-om ju inhlei, jube inkhat a inphut inkhat a sun manrōk loa aka-om kapō kae. Amarim kha lase phung hêrmak, khana atui um katui ṭhak a kae.

¹²“Khava jâra tûnchu, Moab kha ju kapōa akaleisōt sik a mi kajōng tirna sik pha kahong jo. Anmani’n jube anmanrōk sik, khana ahar-ahak a anvōkkhōi sik jo hei.

¹³Khava pha Israel he’n antataksen pathen, Bethel a inphut hmit vârna antamannei hei kapōa, Moab he’n an-pathen Chemosh a inphut hmit vârna mannei sik hei kae.

¹⁴“Moab mihei, heisa mo nangni rekahrâng ung a’nti chei, remi kahrânga a’ntei chei?

¹⁵Moab leh akhōpuihei sukset kachang jo hei, arether kaṭhapen hei kha anthat manram hei. Chunghnung RŌNGPU, reng kha kei eng kae, khana ke’n kahri jo kae.

¹⁶Moab inhmangna sik hong kahnai jo; ama suksetna kha inranga kahong jo.

¹⁷“Khava jât sik a, ahnenga ka-om seng nangni, arahming inthangna inhret nangni seng in ṭajai sui ruh. Ti ruh, ‘Arathahrat vairônna kha insukkhōi jo; alûrna leh ahratna om mak jo.’

¹⁸Dibona ka-om nangni, nanlûrna hmun a inphut jōng ṭum ruh, vaiphin chunga in-ong ruh; Moab kasuset kha hin ka-om arekur kha insetsōa adahlon jo.

¹⁹Aroer a ka-om nangni, hlamlen panga ngir una hngâk ruh; akatlânsōt hei kha der hei ruh, hei omchen mo akasōk jo jongsōt ruh.

²⁰Anmani’n anmasôn sik chei, ‘Moab katlu jo, ama sik a ṭap ruh, hmaimôk inpek jo. Arnon Tuidung panga khōtlâng ôn ruh, Moab sukset kachang jo vati ruh.’

²¹“Hme lônjâl a khōpuihei chunga ṭong tanna kahong jo: Holon, Jahza, Mephaath,

²²Dibon, Nebo, Beth Diblathaim,

²³Kiriathaim, Bethgamul, Bethmeon,

²⁴Kerioth khana Bozrah hei seng chunga. Moab khōpui akahla leh akahnai rakip chunga ṭong tanna jōng katlung jo.

²⁵Moab ratha hratna suk manchip kachang jo; aratha neina sukset jo kae. RŌNGPU ke’n kahri jo kae.”

²⁶RŌNGPU’n ahri, “Moab kha ju manrui ruh, ajârchu ama’n adōi enga kae. Moab in amalōk chunga inkhōn sik, khana mihe’n anmanui sik.

²⁷Moab, nang in Israel naleimanuisō hei kha mandonsōt mak che mo? Nang in anmani kha mikachomloi tasur hei kapōhrep a naleitlo heia kae.

²⁸“Moab ram a ka-om nangnihei, nankhōpuihei dahlon ruh! Hlungkare chunga va-om ruh! Hlung panga vaṭhu rabu kachom kha va-ang ruh.

²⁹Moab kha inlensak hranghra! A’nlensakna, a’n-êng setna, khana heituk a ersōna kahrok mihei mo, khana heituk a anbinga a’ndon hei mo ti kha katheisō jo.

³⁰RŌNGPU ke’n an-êng setna kha kamanhret. An-inlensakna kha heite hnemmak ning, khana anṭōn tlohei kha akasôttak om mak ning.

³¹Khava jâra kei Moab ram a aka-om rakip leh Kir Heres a mihei sik a kaṭap sik eng.

³²Sibma mihei sik a, kakhe chet a Jazer mihei sik a kei kaṭap sik eng. Sibma khōpui, nang, vomhrui jâm abâk injâm in Dîr kathi Tuipui arakan khana Jazer katlunga akasei kha ka-ang che. Tâk-kha tûnchu khōluma nathei kara leh vomhrui hei kha suk manset kachang jo.

³³Moab ram a ralei ṭhatna inphut hōina leh inpâkna kha inlosōt jo. Ke’n vomhrui thei-epna inphut ajōng kalōng theiju kha kamanhai jo; theiju kasyem sik leh inpâk a aka-ông sik tûte om mak jo.

³⁴“Heshbon leh Eleale mihei kha kapeng hei, ankapeng rasa kha Jahaz katlunga inthei; khana Zoar mihei kapha’num antheitor, khana Horonaim leh Eglath Shelishiya katlunga intheia kae. Nimrim Kavadung kapha’m kachâr jo.

³⁵Ke’n Moab mihei kamukna hmun a ro-inthoina khana an-pathenhei hnenga ran inthoina kha kamanbâng sik hei. RŌNGPU ke’n kahri jo kae.

³⁶“Annei rakip a-om mak jo jâra, mi inkhat in kathi hrena hla bunglir vâng amanjui kapōa, Moab-hei sik a leh Kir Heres mihei sik a kei kamalung in ṭajai asui.

³⁷Anmani ankhenga anlu anvo, anhnerhme an-epsō. Ankhenga ankut ankarittan hei, khana ankhenga bora pōnse an-insi.

³⁸Moab inn chung rakip leh mipui tetlânga ṭapna teilo alak om mak, ajârchu ke’n Moab kha tûte tamadumak bephu inkhat kapōa, kavōk khōi jo.

³⁹Moab kha kakōidâk jo! Kaṭap jo! Moab hmaimôkna inpek jo. Inset a ka-om jo, khana akimvea ka-om jât he’n anmanuisō jo. RŌNGPU ke’n kahri jo kae.”

⁴⁰RŌNGPU’n ṭong atep, ti chu marhmu’n amathla azera ajōng inthla kapōa, Moab chunga jât inkhat jōng kachu sik,

⁴¹khana akhōpuihei leh arekur hei kha anhlō sik. Khava kani ning khan Moab remihei kha nupui naiha kaphu kapōa inpir sik hei.

⁴²Moab kha sukset a ka-om sik, jât inkhat chang nôk mak jo ning, ajârchu ama’n adōi enga kae.

⁴³Inpirna, khur kōk hei, khana châng hei khan Moab mihei kha anhngâk hei. RŌNGPU’n ati jo.

⁴⁴Tu achang inum ṭit-inpirna inphut tlânsōt sik inrei kha khur kōk a katla inhlut sik, khana khur kōk a inphut akakesōt kha chânga in-ôk sik, ajârchu Moab suksetna sik pha kha RŌNGPU’n atepsa jo kae.

⁴⁵Inthōpui kase rekatlânhei kha pha khat a Reng Sihon vai leirônna khōpui Heshbona inhrungna sik a anjong, tâk khava kha’m hmei kakâng jo. Re indu Moab mihei kur rape khana hmebung chunga heikakâng inthlut jo hei.

⁴⁶Moab mi lungset ka-om hei! Chemosh inmuk mihei sukset a ka-om jo hei, ansapa ansanuhei rehringa ankei jo hei.

⁴⁷Kha’num akahong sik pha chu RŌNGPU’n Moab-hei alamanhao nôk sik hei. RŌNGPU tahri rakip hi Moab-hei chunga alakasōk sik kae.