Read Komrem JEREMIAH 49 Bible Online

JEREMIAH 49 - Komrem bible

JEREMIAH 49

¹Hivahi RŌNGPU’n Ammon chunga ahri kha kae: “Israel pasehei khon mo aka-om jo hei? Anram kahrung sik tûte om mak jo hei mo? Heisik a mo anmani’n Molech kabek hei Gad phunghei kha ram antamanhlō hei khana khō antamathlâk hei?

²Kha’num apui karôn khōpui Rabbah mihei kha re innok rasa kaman theina sik hei pha kha kahong jo, inhmanga dahlona ka-om sik hei khana ankhō kasinhei kha hmei in akâng mathlâk sik hei. Khava sōa Israel in aram kha ahnenga inphut aleikalo heia inphut alomale nôk sik.

³Heshbon mihei, pengsōt ruh! Ai kha sukset kachang jo! Rabbah nupuihei, ṭajai sui ruh! Bora pōnse insi una inhngaisui ruh. Inhmak una tlân ruh! Nan-pathen Molech kha athempuhei leh arengsa hei leh rehringa ankei sik hei.

⁴Heisa mo taksenthei kachangmak mihei a’nlensak chei? Nanratha hratna kha katlang jo. Heisa mo nanratha hratna chunga a’nngam cheia, tûte’n abuhlu tor mak ning tia nanta taksen?

⁵Arakir rakip a inpirna nanchunga kamasō sik. Nankhenga katlân sik chei. Inkhat khat in ahringna sik a katlân sik, khana nanremihei manchunna katlo sik tûte om mak ning.

⁶“Tâk-kha hnunga chu Ammonhei kha kalamanhao nôk sik hei. RŌNGPU ke’n kahri jo kae.”

⁷Chunghnung RŌNGPU’n Edom chungchânga ahri kha hi kae: “Edom mihe’n anṭongtan kaṭha kha antamanhmang jo mo? An-inse he’n antatlo sik kha manthei tor mak jo hei mo? Ansingna rakip a’nhmangsō jo mo?

⁸Dedan mihei, inle una tlân ruh! Inthup ruh! Ke’n Esau sōn leh pârhei kasukset sik hei ajârchu anmani karâkna kapekna sik pha kha hong katlung jo.

⁹Mihe’n vomhrui thei anṭhōt pha ṭhahrep chu akunga andahlon, khan chu inru mikachom he’n jân a anhong pha, antamadu rōk kha anlo ri.

¹⁰Tâk-kha kei chu, Esau sōn leh pârhei khachu kamajuireng sik hei, khana an-inthup tor makna sik a, an-inthupna kapha’m kahliksōt pek sik hei. Edom mi rakip suk manhmanga ka-om sik hei. Inkhatbek um inṭhen mak ning.

¹¹Nu leh pa kaneimak hei kha kahnenga dahlon hei ruh, ke’n ka-ensui sik hei. Nanhmeithai hei kha kei hnenga inhngaithei sik hei.

¹²“Karâk sik a rahōi kasōkmak hei kapha’m, karâkna kōklei kha anta-in sik achang inchu, nangni’n karâkna kasea ka-om sik ung tia nantamandon mo? Ethei mak ning, kōklei kha nata in nger sik kae.

¹³Kei khet a’ntep eng kae, Bozrah khōpui kha enngam mak nêrdiram inkhat kachang sik; mihe’n sem tlona annei sik khana arahming kha inhâksêrna inkhat a anhmang sik. Ahneng vena khōhei seng kha’m ahei tik chenna sukset kachang sik hei. RŌNGPU ke’n kahri jo kae.”

¹⁴Ke’n kahri, “Edom, ke’n RŌNGPUa inphut ṭong kathei. Ama’n jât-hei hneng anremihei anmantûpna sik khana nangni kasō sik a an-intlukna sik, ṭongkarôn inkhat atir jo.

¹⁵RŌNGPU’n nangni amantlâksam sik chei, tûte’n kajamak chei ning.

¹⁶Nan-inlensak in ahōn mathlâk jo chei. Nangni mi’n antaṭit sik cheia nantamandon kapōtak a tûte’n ṭitmak jo chei. Nangni hlung karea tlâng inshâng bilik a ka-om chei; hmuvânlai kapōa nangni chung inshângtak a nan-om inum, RŌNGPU’n akei mathlâk sik chei kae. RŌNGPU’n ahri jo kae.”

¹⁷RŌNGPU’n ahri, “Edom suksetna ajōng katlung sik kha inhnak hêr sik, ahneng vena akase mihei kha, ṭitna leh inpirna annei sik.

¹⁸Sodom leh Gomorrah khana ansir anpanga khōpuihei suksetna asōk pha omchen aleikasōk kapōhrep a, Edom chunga akasōk sik kae. Khava hmun a khan ahei tik a tûte om nôk mak jo ning. RŌNGPU ke’n kahri jo kae.

¹⁹Shabakkai inkhat Jordan panga ratu hmanga inphut a, phidông kekna ahei kasōk kapōa, kei kahong sik eng, khana Edomhei kha anrama inphut sōkphutrōia kamanphut sik hei. Khava pha ke’n hlamkakei inkhat kakadeisōt khan jât-hei chunga vai arôn sik kae. Kei leh tetor sik tu mo aka-om? Tu’n mo kei adōingam sik eng? Vaikarôn tu’n mo kei adōitor sik eng?

²⁰Khava jâra ke’n Edom dōina ṭōn kamantluk leh Teman khōpui chunga tlo sik a kamandon hi rangei ruh. Ansa naipanghei kapha rehringa ankei sik hei, khana mi rakip kaṭi sik heia kae.

²¹Edom apur pha, raleichung pumpui akatlir mannok rasa inkhat kasōk sik, khana ṭit-inpir ông rasa kha Tuikekâk Aqaba katlunga inthei sik.

²²Hmuvânlai inkhat in amathla azera ajōng inthla kapōa indōipuihei khan Bozrah chunga anjōng buhlu sik. Khava kani ning khan Edom remihei kha, nupui naiha kaphu kapōa, ṭit-inpirna annei sik.”

²³Hivahi Damascus chungchânga RŌNGPU ṭonghri kha kae: “Hamath leh Arpad khōpuia mihe’n, ṭong kahōimak anthei jâra anmalung inrim jo. Tuipui kapōa, madu rangei khan anchunga in-nông inlet a inhnga tor mak hei.

²⁴Damascus mihei kha kadôi hei khana anṭit kasea katlân hei. Nupui naiha kaphu kapōa anmani natna leh inrengna ande jo.

²⁵Khōpui inthang kahōitak a aka-om kha andahlon pet jo.

²⁶Khava ning khan anrether hei kha hlampuia anthat sik hei, khana anremihei kha anthat manramsō sik hei.

²⁷Ke’n Damascus kur bâng hmeia karo sik khana Reng Benhadad innpuihei kakângsō sik hei. Chunghnung RŌNGPU ke’n kahri jo kae.”

²⁸Hivahi Cedar phunghei leh Babylon reng Nebuchadnezzar tahlō ram shunga Hazor vairônna ramhei chungchânga RŌNGPU tahri kha kae: “Cedar mihei kha re buhlu hei ruh khana nisōtinga mihei kha suk manhmang hei ruh!

²⁹Anpōn innhei, anranhei, anpōn rabuk pindenhei khana anpōn-inna annei rakip chom hei ruh. Ansharîngsei hei inlo una, mihei hneng khan, ‘Ṭitna’n akakursi jo chei!’ tipek hei ruh.

³⁰“Hazor mihei, RŌNGPU ke’n kagîk chei kae, tlânsōt una inthup ruh. Babylon Reng Nebuchadnezzar in nangni dōina ṭōn amantluk jo, khana ama’n hing’hin ahri,

³¹‘Hong ruh! Eini’n sova kahōitak a leh inhuktak a aka-om mihei so, nibuhlu sik hei! Ankhōpui so sōngkot leh akhârna neimak hei, inhrungna omtet lo kae.’

³²“Ansharîngsei leh anranhei akhenga lopek hei ruh! Sova sam katôitek a kavo mihei so hmun rakip a kahnong kachek sik hei khana rakir manlia khōdeng theina anchunga kamasō sik.

³³Hazor hmun ahei tik a nêrdiram, ram-uihei rōk omna kamanchang sik. Tûte inkhatbek um khana khan avea om mak hei ning. RŌNGPU ke’n kahri jo kae.”

³⁴Zedekiah’n Judah reng achang sōlima, Elam chungchânga Chunghnung RŌNGPU’n kahnenga ahri.

³⁵Aman ahri, “Elam ratha hratna kapek, saikâp kathemhei seng kathatsō sik hei.

³⁶Elam dōina sik hmun rakip a inphut thli kajōng manhrâng sik, khana ami, rekatlânhei semakna hmun omaknaleo katlunga, anmani hmuntina kaman chek-chai sik hei.

³⁷Ke’n anmani kathat hnōm hei, an-inrepuihei kha Elam mihe’n kamanṭit sik hei. Kahnuknat inhnak vâng Elam mihei kha kasuk manhmang sik hei khana kaman ramsō mak hei kârseng remi kajōngtir sik hei.

³⁸Ke’n anrenghei leh anhlam kakeihei kha kasuk manhmangsō sik hei, khana khava hmun a khan kalen in-ongna kamatung sik kae.

³⁹Tâk-kha hnung leh chu, Elam mihei kha avea kamanhao nôk sik hei. RŌNGPU ke’n kahri jo kae.”