Read Komrem JEREMIAH 50 Bible Online

JEREMIAH 50 - Komrem bible

JEREMIAH 50

¹Babylon khōpui leh amihei chungchânga RŌNGPU’n apek eng ṭong kha hi kae:

²“Ṭong hi jât-hei hneng manthei hei roh! Phôngsōt roh! Ṭong hi amerchîkna pek roh khana phôngsōt roh! ip a damak roh! Babylon katlu jo! Apathen Marduk kha suk mathlâk a ka-om jo. Babylon limhei kha anhmai manjûm jo hei kae; amanu mater ka-om limhei kha suk rabun jo hei kae!

³“Sak tinga ka-om jât inkhat, Babylon kabuhlu sik a kajōng, khana hleichi nêrdiram amanchang sik. Mihei leh sahei katlânsō sik hei, khana khan tûte om mak jo ning.”

⁴RŌNGPU’n ahri, “Khava pha kha ahong pha, Israel leh Judah mihei, an-Pathen, kei kajonga anṭap pum a kahong sik hei.

⁵Anmani’n Zion jōnna hlam ander sik a kha khava kajōna kase sik hei. Anmani’n ahei tik a sukkhōi hêrmak sik intepna kei leh annei sik khana sukkhōi hêrmak jo hei ning.

⁶“Kamihei kha kemōng kakhempa’n ram thōia amanhmang kemōng kapō hei kae. Anmani hlam invai heia hmebung inkhat a inphut inkhat a kalôn vaithâm hei, khana an-inn omna anmahngi joa kae.

⁷Anmani intōpui hei rakip in anbuhlu hei. An-indōipui he’n anhri, ‘Anmani’n RŌNGPU kadōia setna antlo, khava jâra anchunga nimanlo hei hi ṭhemak me. Anpu anpa he’n RŌNGPU kha anleitaksen, khana anmani hei hi’m ahnenga taksenthei ankachang ṭhak sik hei hi ahlam kasōk kae.’

⁸“Israel mihei, Babylona inphut tlânsōt ruh! Ram kha dahlon ruh! Akadahlon hma-inkei chang ruh!

⁹Ke’n sak tinga jât kangar rup khat anmani kabuhlu sik a kahei kachok mathok sik hei. Anmani Babylon ram kadōia in-gôr sik heia kha re anhong buhlu sik, khana antor sik. Anmani shachâng kaleng kathem, anradinna anthe kâp mansôi phunglo hei kha kae.

¹⁰Babylonhei kha anchom sik hei, mikachom hei khan antamadu seng kha an-inrôn sōt sik jo. RŌNGPU ke’n kahri jo kae.”

¹¹RŌNGPU’n ahri, “Babylon mihei, nangni’n kajât-hei nanchom hei. Nangni inpâk chei khana kahōi chei, hmuchi akachōn rachi inthla sehratche kapōa khana hur inthok a inhrâm shakor kapōa kalônle chei,

¹²tâk-kha nangni khet khōpui kalen khachu suk mannem sik jo khana hmesetna aratō sik jo kae. Babylon kha jât-hei kâra akasin pena ka-om sik; tui om makna nêrdiram kachâr hongkachang sik.

¹³Kei kahnuk anat jâra Babylona tûte om mak ning; inhmanga andahlonsō sik, khana ahneng vena akase rakip in anmalung atôn sik khana inlak ansak sik a kae.

¹⁴“The leh sâi kachoihei, re sō sik a Babylon kha um ruh. Babylon hnenga nanthe rakip kâp hei ruh, ajârchu RŌNGPU kei dōina ama’n setna atloa kae.

¹⁵Khōpui kimvea hranhla ôn ruh! Tûnchu Babylon insira heikahlut jo. Akur rape bang kachim jo khana inset jo. Ke’n Babylonhei chunga phu kahlō kae. Khava jâra anchunga nanphu kha hlō ruh, anmani’n mihlop hnenga antatlo kapōhrep a anchunga tlo ruh.

¹⁶Khava ram a khan hmuchi mankekmak ruh, khana kara mankhôm mak ruh. Khava hmun a aka-om ram hlop mihe’n, re ahong kasō remihei kha anṭit hei sik, khana an-innting inle sik heia kae.”

¹⁷RŌNGPU’n ahri, “Israel mihei kha, shabakkai in ahnong kachek kemōng kapō hei kae. Hmapena, Assyria rengkalen in abuhlu hei, khava sōa Babylon Reng Nebuchadnezzar in anru asekhōi pek hei.

¹⁸Hiva jâra hin, Chunghnung RŌNGPU, Israel Pathen ke’n Assyria rengkalen kakarâk kapōa Nebuchadnezzar rengpa kha kakarâk sik kae.

¹⁹Ke’n Israelhei anram kamanhlō nôk sik hei. Anmani’n Carmel Tlânga kakek, khana Bashan tinga bu leh thlai ansâk sik khana Ephraim leh Gilead ram a akakek sachi hmuchi rakip antamadu chen a ansâk sik.

²⁰Khava pha kha ahong pha, Israel shunga setna inti inhmu mak jo ning khana Judah shunga ṭhatmak om mak jo ning, ajârchu ke’n hringkhō kaṭhen pek jo mihei kha karangei mandam sik jo hei. RŌNGPU ke’n kahri jo kae.”

²¹RŌNGPU’n ahri, “Merathaim leh Pekod mihei buhlu hei ruh! Anmani that hei una suk manram hei ruh. Ke’n ṭong kapek chei rakip kha tlo ruh. RŌNGPU ke’n kahri jo kae.

²²Ram shunga re intuk rasa inthei, khavakha suk inhmangna inhnaktak kae.

²³Babylon in vânhnōi ralei ahar-ahak a ahemkhōi, tûnchu asakbung kha ahar-ahak a kakōi jo! Khava ram a omchen kasōk chunga khan jât rakip in anmandon-hla a kae.

²⁴Babylon, nang in kei dōina re natlo, namanhret mak inum na’n-ôkna sik châng kadoa khan inkhit jo che.

²⁵Ke’n, kare hmangchâk-hei kamanbukna hmun kha kamahlanga, kahnuknat pum a kalosōt jo hei, ajârchu Chunghnung RŌNGPU ke’n, Babylon chunga ṭōn tlo sik kaneia kae.

²⁶Arakir rakip a inphut buhlu ruh, asâng bukna sasōrhei kha sukkhōi ruh! Nantachomsōt hei kha sabuk a manbuk ruh! Ram kha suk manhmang ruh! Heite inkhat dahlon mak ruh!

²⁷Aremi rakip thatpet hei ruh! Thatsōt hei ruh! Babylon mi inhmang jo hei! Ankarâkna sik pha kha jōng katlung jo!” (

²⁸Babylona inphut rekatlânhei Jerusalema kahong hei, khana RŌNGPU ni-Pathen in a-Bek-inna Babylonhei taleitlo kha heikhonga mo phu ahlō ti kha anmani’n anhria kae.)

²⁹The leh sai kachoihei kha Babylon anbuhluna sik a manthei hei ruh. The leh sai kathem mi rakip tirsōt hei ruh. Babylon khōpui kha ûmsi ruh, tûte masō mak hei ruh. Aleitlona kha ahnenga tlo male ruh, milak arazen hei kapōa ama razen ruh, ajârchu Israelhei A’ntheng Inkhat, kei dōina inlensaktak a omchen atloa kae.

³⁰Khava jâra aretherhei khōpui hlampuia that sik hei kae, khana khava ning khan anremihei seng that manram sik hei kae. RŌNGPU ke’n kahri jo kae.

³¹“Babylon, nang inlensakna kasip phet che, khava jâra Chunghnung RŌNGPU ke’n nang kadōi che kae! Ke’n nang karâkna kapekna sik che pha kha jōng katlung jo.

³²A’nlensak najât kha inpai sik a kha katlu sik, khana tûte’n nang mathōtor mak hei tin. Ke’n nakhōpuihei hmei karo mathlâk sik, khana ahneng vena neinâk rakip kasuk manhmangsō sik.”

³³Chunghnung RŌNGPU’n ahri, “Israel leh Judah mihei kha anvōk rachi jo hei. Ankasur hei seng khan anhnengtak a anhrung hei, vânga mansesōt tor mak hei.

³⁴Tâk-kha anmani kahuk sik inkhat kha aratha kangar, ama rahming kha Chunghnung RŌNGPU kae. Amatak in an-inrengna kha ajōngsōt sik khana raleichunga chamna ajōng rôn manhlut sik, tâk Babylon mihei sik a chu khōdeng theina ahei rôn sik.”

³⁵RŌNGPU’n ahri, “Babylon sik a thina! Amihei sik a, avaikarônhei sik a, akasing amipuihei sik a thina kae.

³⁶Malei kasei asânkathemhei sik a thina — anmani heituk a akamo jo hei mo! Aremihei sik a thina — heituk a a’npir jo hei mo!

³⁷Ashakor leh agâri sukset hei ruh! Antanêk remihei sik a thina — heituk a akadôi hei mo! Akarōi bukna kha sukset hei ruh; chom hei ruh, marûk hei ruh.

³⁸Aram shunga khō mansûr mak ruh, khana tuidunghei manchâr ruh. Babylon hi ṭit ka-om limhei ram kae, khahei khan mihei kha amanmo heia kae.

³⁹“Khava jâra Babylon hi rathla-ravai akaṭhamak he’n, khana va intheng mak he’n antahlō sik kae. Khana khan mihring tûte om nôk mak jo hei ning, akahong sik pha rakip a om mak hei ning.

⁴⁰Sodom leh Gomorrah khana anhneng vena khōpuihei, ke’n kasukset hei pha, omchen akasōk kapōa, Babylon chunga in-angtlinga kasōk sik a kae. Mihring tûte khava hmun a om nôk mak jo hei ning. RŌNGPU ke’n kahri jo kae.

⁴¹“Sak tinga ram inkhat a inphut mi kajōng sik hei, akahlatak a inphut ratha kahrattak jât inkhat; reng katamtak re katu sik a intluk hei.

⁴²Anmani’n ansai leh chemjâm an-inhrut; anmani lungsetna kase leh êngkase hei kae. Anshakorhei anchōng pha, anmani rasa tuipui in-nông ka-ang. Anmani Babylon kadōia re kasō sik intluk hei.

⁴³Babylon rengpa’n ṭong kha athei jo, khana akut kha amakheia kazeng jo. Nupui naiha kaphu kapōa malung nat in asur jo.

⁴⁴“Jordan tuidung panga, ratu kahmanga inphut shabakkai inkhat, phidông kekna ram a ahei kasōk kapōa, RŌNGPU kei kajōng sik eng, khana Babylon mihei kha ankhōpuia inphut sōkphutrōia katlân sik hei. Khava pha ke’n kakadeisōt hlamkakei inkhat khan jât chunga vai arôn sik jo. Tu’n mo kei ate tor sik eng? Tu’n mo kei adōingam sik eng? Tu vaikarôn inmo kei ating tor sik eng?

⁴⁵Khava jâra Babylon khōpui chunga leh amihei chunga tlo sik a kamantluk kha rangei ruh. Ansa naipanghei kapha rehringa ankei sik hei, khana mi rakip ṭit a inpir sik hei.

⁴⁶Babylon kha atlûk pha, ralei akimve akanok mantlir rasa hong kasōk sik, khana inrima pengna rasa kha jât-hlop he’n anthei sik.”