Read Komrem JEREMIAH 6 Bible Online

JEREMIAH 6 - Komrem bible

JEREMIAH 6

¹Benjamin mihei, nan-inhukna sik a tlân ruh! Jerusalema inphut tlânsōt ruh! Tekoa khan pengkun tum ruh khana Beth Haccherema khan mêrchîkna hmei inkhat syemsōt ruh. Inrengna leh insuksetna sak tinga inphut jōng kasōkbei sik jo.

²Zion khōpui hi kaṭha hranghra, tâk suk manset sik kae.

³Reng he’n anremihei leh khava hmun a khan rephōr ansyem sik. Khōpui kimvea anmani’n anpōn-inn, anmaduna hmun a anmatung sik hei.

⁴Anmani’n anhri sik, “Jerusalem buhluna sik intluk jo ruh. Intluk ruh! Eini’n sûnṭima nibuhlu sik kae!” anti. Tâk-kha anmani’n anhri, “Tûn hi kasôt rei jo, sûn pha um kathlengvet jo, khōhlei inthimna kha kasôt hlok jo.

⁵Jân pha eini’n nibuhlu sik; khōpui kurbang kha nisuk manchim sik.”

⁶Chunghnung RŌNGPU’n khava renghei kha Jerusalem kekhumna sik a thing hei antuktan heia anmanbukna sik a ṭong apek hei. Ama’n ati jo, “Ke’n hiva khōpui hi karâkna kapek sik ajârchu hivahi suk manrimna kasiptak joa kae.

⁷Tuikhur in atui kha insimrenga ada kapōa, Jerusalem in aṭhatmak kha adaṭhak. Khōpui shunga innâk-inse, suksetna hei kha katheihei; natna leh intônna bi kahmu hei.

⁸Jerusalem mihei, hiva inrengna seng hi nanhnenga gîkna chang rasoh, kha achang ma’nchu ke’n nangni kadahlon sik chei kae; nankhōpui hi tûte om makna nêrdiram kamanchang sik jo kae.”

⁹Chunghnung RŌNGPU’n kahnenga ati, “Israel hi vomhrui theikara ṭhōtsō pet kapōa vōk mathlâk sik kae. Khava jâra apha omlai hin torchena nahuksōt sik hei kae.

¹⁰Ke’n kamasôna, “Anhnenga ke’n kahria kamanse he’num, tu’n mo arangei pek sik eng? Anmani anracham kase, naṭong manrôn rangei hnōm mak hei; hri sik a namanthei eng ṭong kha anmanuisōa kae.

¹¹Anmani chunga nahnuk natna khan ke’m atôn eng, RŌNGPU, ke’n, khavakha detor mak eng.” Khava sōa RŌNGPU’n kahnenga ahri, “Hlampuia naipanghei leh rether intûp hei chunga kahnuknat kha sun mathla roh. Sanghram hei, annuhmei leh anpuisehei kha ṭhōisōt sik hei kae, akaterber hei kapha’m ṭhōisōt sik jo hei kae.

¹²An-innhei kha milak hneng inpek sik hei, khana anhleihei leh annuhmeihei kha’m inpek sik heia kae. Ke’n hiva ram mihei hi karâkna kapek sik hei kae.

¹³Anmani akasin leh akalen ankhenga malung intheng loa sêr hlona antlo; thempuhei leh sânkathemhei kapha’num mipui anhōn hei.

¹⁴Anmani’n kamihei sungbi rôn kha vun karit mankhok hrep a anlopek hei. Anmani’n heite inkhatbek aṭhatmak jo pha kha’num, “Kaṭha jo,” anti ri.

¹⁵Anmani’n hiva mater ka-om omchen antlo pha hin inzak hei mo? Inzak mak hei, inzak hêrmak hei; anhmu kapha anhmai senmak. Khava jâra anmani milak-hei tlûna kapōa katlu sik hei; ke’n karâkna kapek hei pha, khavakha an-inchaina kachang sik jo. RŌNGPU ke’n kahri jo kae.”

¹⁶RŌNGPU’n amihei hneng ahri, “Hlam inbâkna hmun a ngir una enruh. Hlam kaṭhapen, hlam marō kha inder ruh. Khana khan se ruh, nangni kamōnga ka-om sik chei.” Tâk-kha anmani’n anhri, “Dâng, keini semak ning.”

¹⁷Khava pha pengkun gîkna rasa inngei sik a RŌNGPU’n khō kahngâk akadei hei. Tâk-kha anmani’n, “Rangei mak ning,” anti.

¹⁸Khava jâra RŌNGPU’n ahri, “Rangei ruh, jât-hei, kamihei chunga heimo ahong kasōk kha manhret ruh.

¹⁹Raleichung, rangei roh! Anṭōn mantlukna rakip sik a karâkna inkhat a, hiva mihei chunga inhmangna hi kapek hei kae, ajârchu kaṭong juimak hei khana kaman theina lomak heia kae.

²⁰Anmani’n Sheba a inphut marim katui khana ram kahlatak a maru-marâng kahnenga anta heichoi kha katei sik mo? Anmani neitōknahei rahlâng mak ning khana an-inthoina hei chunga tlaimak ning.

²¹Khava jâra hiva mihei hi kamanpai mathlûk sik hei kae. Nu leh pa, sahei, ṭim leh re hei, khana khō leh ven hei kathisō sik hei.”

²²RŌNGPU’n ahri, “Sakram tinga mipui kahong jo hei, ram kahlatak a ratha kaneitak jât-hei re sik a intluk jo hei.

²³Anmani anthe leh anchem anmatu jo; anmani an-êng kase, lungsetna neimak hei. Anmani anshakorhei anchōng pha, tuipui kapōa inhrung hei. Anmani Jerusalem re kasō sik a intluk jo hei.”

²⁴Jerusalem mihe’n anti, “Ṭong kha keini’n kanthei, kankut kangōi jo, nupui naiha kaphu a’nkōi leh akana ka-ang jo ung.

²⁵Keini ram thōia sengam mak jo ung, hlampuia lônngam mak jo ung, ajârchu kan-inrepui he’n revon invon heia ṭitna’n anikake bit jo.”

²⁶RŌNGPU’n amihei hneng ahri, “Borapōn insi una ravut chunga inkhōn ruh. Sapa sangkhat thina chunga malung kana tak a ṭap kapōa ṭap ruh, ajârchu nankasuk inhmang sik a akajōng inkhat khan manhret manloa abuhlu sik chei.

²⁷Jeremiah, thir enmansin kapōa kamihei enmansin hei roh, heimo aka-ang heijongsōt hei roh.

²⁸Anmani racham kasea inphin hei, sum-êng leh thir kapōa kangar hei. Anmani ankhenga ṭhamak hei, kalônle heia mi anhrimaset a kae.

²⁹Ratap a inhnaktak a hmei insûk, kha’num thîr-ek hei kha jor mak hei, tlamak hei. Kamipuihei sukmantheng sik hi hnemmak jo, ajârchu mikaṭhamak-hei kha losōt mak heia kae.

³⁰Anmani kha hnemna kase thir-ek inti sik hei, ajârchu RŌNGPU ke’n kahlonsōt jo hei kha kae.”