Read Komrem JEREMIAH 7 Bible Online

JEREMIAH 7 - Komrem bible

JEREMIAH 7

¹Judah mipui he’n kamukna sik a ansena ri Bek-inn kekot a RŌNGPU’n kei atir eng. Khana khan kangirna sik khana Chunghnung RŌNGPU, Israel Pathen khan anhnenga ahri pek sik hei kha kava phôngsōtna sik a amanthei eng: “Nan-omje leh nanṭōn tloje hi thleng jo ruh, kha achang inchu hing’hin kaman omṭhak sik chei.

⁴Nangni’n ‘Eini inhuktak a ka-om me! Hivahi RŌNGPU Bek-inn kae, hivahi RŌNGPU Bek-inn kae, hivahi RŌNGPU Bek-inn kae!’ tia mihōn mathlâkna ṭong taksenna hi bâng jo ruh.’

⁵“Nan-omdân leh nanṭōn tloje hei hi thleng ruh. Nangni inkhat leh inkhat malung inthengtak a inzen ruh.

⁶Ramlak mi khōhmehei, nu leh pa kaneimak hei, khana renghmeihei chunga hnemna nantajong kha bâng ruh. Hiva ram shunga ṭhena kaneimak nantathat hei kha bâng ruh. Pathen ralak nantakamuk kha bâng ruh, ajârchu khava khan athat manram sik chei kae.

⁷Nangni’n nanmalung nanthleng inchu, nanpusōn he’n antachen ṭhak sik a kapek jo hei ram shunga kaman omṭhak sik chei.

⁸“Enruh, nangni’n mihōnna ṭonghei nantaksena kae.

⁹Nangni’n nanmaruk, mi nantha, kajông chei, inhâksêr cheia maleisei nanhri, Baal hneng inthoina nantōk, khana nanta leimanhret phungmak pathenhei nankamuk heia kae.

¹⁰Nangni’n kamater omchenhei hi nantloa, khana kabek-inn shunga kahong cheia kahma kangir cheia nanhri, “Keini inhuktak a ka-om ung!”

¹¹Kabek-inn hi inruhei inthupna hmun inkhat a nantamandon mo? Nangni tatlo hei kha ke’n kahmua kae.

¹²Shiloa se ruh, kei kamukna sik a ahma inkeipena kadeisōt hmun a khan, kami Israelhei set-tlo jâra ke’n heimo katlo kha va-en ruh.

¹³Nangni’n hiva setnahei hi nantlo jo, ke’n ave-avea nanhnenga kahri ravâng nangni’n rangei mak chei. Ke’n kabek chei pha, amasôn mak chei.

¹⁴Khava jâra ke’n Shilo chunga kaleitlo kha nangni tataksen kabek-inn chunga hin katlo sik jo kae. Hiva nanpu sōnhei leh nangni kapek jo chei hmun a hin Shiloa katlo kapōa katlo sik kae.

¹⁵Ke’n nan-innkō Israel mipui kalei hnongsōt hei kapōa, kahmit hmua inphut nangni kahnong sōt sik chei kae. RŌNGPU ke’n kahri jo kae.”

¹⁶RŌNGPU’n ahri, “Jeremiah, hiva mihei sik a ngekna neimak roh. Anmani kahlanga ôngmak roh khana dermak roh, anmani sik a kahnenga hripek mak hei roh, ajârchu naṭong kha rangei mak ning.

¹⁷Anmani’n Judah khōpui leh Jerusalem hlamdunga anṭōntlo heiso hmumak che mo?

¹⁸Naipang he’n thing anchom mantûp, pase he’n hmei ansêm, khana nuhmei he’n Marvân Rengnu antati pathennu sik a buhlom syemna sik a jâm ankahmet a kae. Kamalung mantônna sik a, anmani’n pathen hlop hei hnenga inthoina ju ansun mathlâk a kae.

¹⁹Tâk-kha kei rōk malung natna akachang mo? Changmak, anmani anbinga malung natna leh anbinga inzakna kha anta heichoisōt kae.

²⁰Khava jâra Chunghnung RŌNGPU ke’n hiva Bek-inn chunga kahnuk natna kha kasun mathlâk sik jo. Ke’n hivahi mipuihei leh ranhringhei chunga, khana thingkung leh hmuchihei chunga kapha’m kasun mathlâk sik kae. Kahnuknat hi hmei kasûk tûte’n athat tor mak kapō kha kachang sik.

²¹“Kamihei, nangni’n inthoina ṭhahrep chu maichâm chunga katluk a nanro manvâm, khana ṭhen khat chu nantasâk sik a hnōmpek chei kae. Tâk-kha RŌNGPU ke’n kahri khachu inthoina hme rakip nansâk theipet sik.

²²Ke’n nanpu sōnhei Egypt a inphut kaheiṭhōisōt hei pha khan, ro-inthoina leh inthoina ralak-hei chungchânga ṭong heite leipek mak hei eng.

²³Tâk-kha kei anmani Pathen kachangna sik khana anmani kei mipui anchang theina sik a, kaṭong anjuina sik a chu ṭong kaleipek hei. Khana anmani sik a ṭhatthei achangna sik a, kaṭong pek hei dungjuia an-omna sik a kamanthei hei.

²⁴Achang ravâng, anmani’n kaṭong rangei mak hei, anmalung um hlutmak a kae. Jui kanek a, anracham setna leh anmalung ṭhatmak khan tlo sik a amanthei hei jôk kha antloa, akaṭhachet sik hei kanek a akasechet kachang heia kae.

²⁵Nanpusōn he’n Egypt ram a anheisōk kania inphut tuning katlung, ke’n nanhnenga kasōk-hei, kasân kathemhei, kahei tir ṭhak hei.

²⁶Kha’num tûte’num rangei mak chei, khana donmak chei. Khava kanek a, nanpu-nanpahei kakhe chet a nanracham intak khana nankhe maṭang kasea kae.

²⁷“Jeremiah, khava jâra nang in kamihei hneng hiva ṭongseng hi nahri sik kae, kha’num anmani’n rangei mak hei ning; nabek sik hei, tâk amasôn mak hei ning.

²⁸Nang in anhnenga hripek hei roh, anjât in RŌNGPU an-Pathen ṭong juimak jo hei khana anchunga karâkna khana inphut inchûna neimak jo hei. Inhlamrinna om mak jo. Ahribek um inhrimak jo.

²⁹“Jerusalem mihei, ṭajai sui ruh; nansam vo una hlonsōt ruh. Hmebung chung heia kathi hrena hla sak ruh, ajârchu RŌNGPU kei kahnuk kana jo, khana kamihei kahlonsōt jo hei.

³⁰“Judah mihe’n ṭōnse kha antlo jo. Anmani’n kamater limhei kha, kabek-inn shunga anmatung heia anmanbōk jo.

³¹Anmani’n Hinnom Phaichama Topheth antia maichâm inkhat ansyem, ansapa ansanuhei hmeia roa inthoina antōk theina sik a antlo. Hiva antlona sik a ke’n ṭong pek mak hei eng, kamalung shunga’m mandon mak eng.

³²Khava jâra Topheth achangmak leh Hinnom tia antimakna sik pha, tâk-kha Mithatna Phaicham tina pha kha lakajōng sik a kae. Ajârchu anmani’n khana khan mi kathihei anhre sik hei, ajârchu anmani hrena sik hmun om mak ninga kae.

³³Ankathi kalōnghei kha va leh ramshahei thlaisâk kachang sik hei, ankahnong sōt sik tûte om mak ning.

³⁴Ram kha nêrdiram hongkachang sik. Judah khōpuihei leh Jerusalem hlamdunga, inpâkna leh hōina khana hmōiṭhōi rehōi rasa kamanbâng sik jo hei.