Read Komrem JEREMIAH 8 Bible Online

JEREMIAH 8 - Komrem bible

JEREMIAH 8

¹“Khava pha khan Judah renghei, ṭōnkarônhei, khana thempuhei, sânkathemhei khana Jerusalema aka-om mihei ru leh râng hei kha anthlâna inphut anlosōt sik hei.

²Anruhei kha mantûp heia vûm sik kanek a, anruhei kha ralei pi chunga ram thai kachang sik jo. Hiva mihei talungset leh tarazen hnōm hei khana anṭong jongsuina hei leh antakamuk hei kha kani, thla, khana ârsihei hmaikunga malârsōt sik hei kae.

³Hiva jât kaṭhamak mi alakahring hei hi, ke’n kakathek manchaina hmun a alaka-om hei hi, kahringa anka-om sik kanek a kathi hnōm chet sik heia kae. Chunghnung RŌNGPU ke’n kahri jo kae.”

⁴RŌNGPU’n amihei hnenga hri sik kha amanthei eng, “Tu inkhat atlûk pha, thōisōt phungmak mo? Mi inkhat in ahlam ahroṭhe inchu, ama he’nle phungmak mo?

⁵Kha achang inchu, kamihei, heisa mo kahnenga hong inle hêrlo cheia keia inphut a’nhesōt jo chei? Nangni’n nanlimhei nankakō tlit a, kei hnenga he’nle sik kha hnōm mak chei.

⁶Ke’n kaṭha nenga nanṭong karangei, tâk ṭongdik hrimak chei. Mi inkhatbek inum nanṭhat makna chunga malung inrimna neimak chei; nangni tûte inkhat in, ‘Ke’n akadik mak heimo kaleitlo jo,’ tia inder mak chei. Rehmun a shakor atlân inhlut kapōa, nangni inkhat et in nanhlam et a kase chei.

⁷Urôk bek inum inlena pha anmanhret; vaṭhu hei, pengler hei khana vakeng he’n hmun inthonna pha anmanhret. Tâk-kha kamihei nangni chu, nanchunga kavairôn dânhei kha manhret mak chei.

⁸Heikhonga mo akasing ung khana kadânhei kanmanhret nantati thei sik? Enruh, malung intheng mak lekha inzet he’n, kadânhei kha anthleng jo hei.

⁹Nanmi kasinghei kha inzakna anpek jo hei; anmani inhmak jo heia, châng vânga anman-ôk jo hei. Anmani’n kei ṭong lomak hei; hei singna mo tûnhin antalanei?

¹⁰Khava jâra anhleihei kha akapu ather hei hneng khana annuhmeihei kha pase ahlop-hei hneng kapek sik jo hei. Mi rakip, akalen leh akasin in malung intheng loa sêr jongna sik antlo jo. Sânkathemhei leh thempuhei kapha’num mi anhōn heia kae.

¹¹Anmani’n kamihei intônna takbi kha vun karittan kapōhrep a anlopek hei. Heirakip aṭhatmak jo pha, anmani’n ‘Heirakip kaṭha jo,” anti ri.

¹²Kamihei, hinghiva mater ka-om tak ṭōn hi nantlo jâra inzak chei mo? Changmak, inzak hêrmak chei; nanhmai sennabek kha’m manhret mak chei.! Khava jâra mihlop-hei katlu kapōa nangni akatlu sik chei kae; ke’n karâkna kapek chei pha khan chu, khavakha nan-inchaina kachang sik jo. RŌNGPU ke’n kahri jo kae.

¹³“Hlei kathlō inkhat in ahleia asâng akhôm mantûp kapōa, ke’n, kamihei kachom mantûp hnōm hei; tâk anmani kara kase vomhrui kung leh theichangkung ka-ang jo hei; anbōhei kapha kachâr jo hei. Khava jâra, vânga mihe’n aram kha antahlō sik a ke’n kaphe jo.”

¹⁴Pathen mihe’n ander, “Heisik a mo tûn katlung ala’n ong me? Hong ruh, khōpui kur a’ntuk khuma son tlân rih, sona son vathi rih.” RŌNGPU ni-Pathen in eini akathi sik a maset apek jo me kae, eini’n adōina setna nitlo jâra, thina sik a, in sik a tûr apek jo me kae.

¹⁵Eini damna sik leh lung mōngna sik a inhōr me, tâk ahnemna om mak; khava kanek a ṭit-inpirna kahonga kae.

¹⁶Nikadōi hei kha Dan khōpuia ka-om jo hei; anshakorhei hnar kakhông rasa eini’n nithei. Anshakorhei anhonghnai jo pha ram pumpui kaṭia innok jo. Nikadōi he’n niram leh ashunga ka-om seng, nikhōpuihei leh amipuihei seng suk mansetsō sik a kahong jo hei.”

¹⁷RŌNGPU’n ati, “En mathlip ruh, nankâra mari, sui mannem torlo tûr kaneihei kha kajōngtir sik hei, khahei kha’n anmachuk sik chei.”

¹⁸Kei malung inrim hi dam tor mak ning, Kei kamalunga akana eng kae.

¹⁹Rangei roh! Ram shung rakip a, kamihei ṭa rasa kha kathei, “RŌNGPU kha Ziona om mak jo mo? Zion rengpa kha khan om mak jo mo?” anti. RŌNGPU anrengpa khan ahei masôn hei, “Heisa mo nanlim kamuk a kahnuk nanta mannat khana hnemna kase ram hlop pathenhei hneng a’nkun chei.”

²⁰Mipui he’n heika-ông hei, “Khōlum kathleng jo, savōk inchai jo, tâk-kha keini chu huksōt changmak jo ung.”

²¹Kei kamalung kakōi jo, ajârchu kamihei kha suk mannōi kachang jo hei, kei inhngaisui eng, inhmakban jo eng.

²²Gilead a hlei leh ai om mak mo? Khana khan thempu om mak hei mo? Khan chu, heisa mo kamihei akadam mak jo hei?