Read Komrem JEREMIAH 9 Bible Online

JEREMIAH 9 - Komrem bible

JEREMIAH 9

¹Kalu hi tuikhur aleichanga, kahmit hei hin tuiripût anleichang inchu, kami antatha jo hei sik a, sûn leh jân leikaṭap sik eng.

²Kami heia inphut kasesōt a nêrdiram a omna sik hmun kahmu’nchu tia kamandon. Anmani ankhenga taksenthei kachangmak, mikahōn mipuihei kae.

³Ankhenga maleisei hrina sik a ahei tik a intluk hei; akadik kanek a malung intheng mak in anrama vai arôn. RŌNGPU’n ati, “Kami he’n akaṭhamak inkhat antlosō leh inkhat antlo nôk, kei hi an-Pathen inkhat a alo mak hei.”

⁴Mi rakip in anṭhōnhei dōina inhrung sik hei, tu inkhat in an-u annaihei kha taksen tor mak hei; ajârchu u leh nai rakip Jacob kapōa mikahōn rōk hei kae, khana mi rakip in anṭhōnhei anhrimaset hei.

⁵Anmani ankheng in anṭhōnhei hlamlea anṭhōi hei; tûte inkhat in akadik inti hrimak hei; maleisei hrina sik a anmalei kha anman themchûk, anset tlo kha haimak hei ning. Anmani’n innâk-inse inkhat bânna inkhat, mihōnna inkhatsō leh inkhat antloa kae. RŌNGPU’n atia ami he’n ama anhlonsōt jo.

⁷Hiva jâra hin Chunghnung RŌNGPU’n ati, “Ke’n kamihei thirkheng jo kapōa kaman theng sik hei, ka-enmansin sik hei. Kami he’n akaṭhamak antlo jo, ke’n anmani heimo kamanlo sik jo hei?

⁸Anmaleihei kha thinathei the kapō hei kae, ahei tik a maleisei rōk anhri. Mi rakip in anvena mihei hneng ṭhōn leh re ṭonga anrakôk hei, tâk adiktak a chu anmani sik a châng ankama kae.

⁹Hiva sik a karâkna pek mak hei ninga mo? Hiva kapō jât-hei chunga ke’n phu hlōmak hei ninga mo? RŌNGPU ke’n kahri jo.”

¹⁰Ke’n kati, “Tlânghei sik a ralûm dena kanei sik ramhâng hei sik a kaṭap sik eng, ajârchu khahei kha kachârsō jo hei, khana tûte’m khana khan sele mak jo hei. Ranhring rasa intheimak jo, vahei leh ranhringhei katlânsō jo hei.”

¹¹RŌNGPU’n ati, “Jerusalem hi sukset neinâk manbukna inkhat kamanchang sik, ram-uihei omna hmun kamanchang sik, Judah khōpuihei kha nêrdiram kachang sik hei, tûte inkhat omakna hmun kachang sik.”

¹²Ke’n kader, “RŌNGPU, heijâra mo ram hi a’nhmangsō jo khana nêrdiram kapōa akachâr jo, khana tûte’m khava khan se leh hong antatlo mak jo? Hiva inhret tor sik tu mo akasingdet aka-om? Tu hneng mo hivahi namanthei heia, khahei khan hiva ṭong hi milak hneng antahri pek tor sik hei?”

¹³RŌNGPU’n amasôn enga ati, “Hinga akasōk jo kae, ajârchu kami he’n kei mantheina hei kha anmasō jo. Anmani’n kaṭong juimak hei, khana kaman theinahei kha tlomak hei.

¹⁴Khava kanek a, anracham kasea anpu anpa he’n Baal limsyem kamukna sik antamanthei hei kha ankamuk jôk a kae.

¹⁵Kha achang inchu, Israel Pathen, Chunghnung RŌNGPU ke’n heimo katlo sik hi enroh: ke’n kamihei kha antasâk sik a thing kakha, anta-in sik a tûr kakha kapek sik hei.

¹⁶Ke’n anpu anpahei leh anmani’n anta leithei phungmak jât-hei kâra khan kachai kathek sik hei, khana ankhenga kaman hmangpet mak hei hma seng ankadōi sik a remi kahei tir sik hei.”

¹⁷Chunghnung RŌNGPU’n ahri, “Heimo akasōk jo ti hi mandon ruh! Ṭajai kasui hei kha, invûmna hlakasak nuhmeihei kha heibek hei ruh.”

¹⁸Mipui he’n anti, “Kanhmit hi hmit rathli’n asipmak kârseng, kanhmit vun hi kanṭap na’n achormak kârseng, ṭajai suina hla inranga anhong sakna sik a manthei hei roh.”

¹⁹Ziona ṭap rasa so rangei roh: “Keini inhmang jo ung! Keini katluk a inzak jo ung! Keini kanram kandahlon sik jo; Kan-innhei insetsō jo hei,” anti.

²⁰Ke’n kati, “Nuhmeihei, RŌNGPU ṭonghri rangei ruh, aṭong hrina chunga nanmalung manhlut pek ruh. Nansanuhei hneng heikhonga ṭajai sui sik mo, khana nanṭhōnhei hneng heikhonga invûmna hla sak sik mo ti kha manthei hei ruh.

²¹Thina’n ni-inn thlikot heia hongkahlut jo nireng-innpui hongkahlut jo; hlamlena naipanghei, khana jōrtlâng laia rether naihei atuk rachen jo hei.

²²Kathi kalōng in hmun rakip a inchai kathek jo hei, hlei laia ralei thai manbuk ka-ang jo hei, sâng ka-ât he’n an-âtsō leh antadahlon ka-ang jo hei, tûte’n antakhôm mantûp mak hmuchi kha ka-ang jo hei. RŌNGPU’n kahnenga amanthei eng hri sik ṭong kha hivahi kae.”

²³RŌNGPU’n ahri, “Mikasing he’n ansing jâra a’nlensak mak sik hei kae. Mikahrat he’n anratha hrat jâra, khana mikanei he’n annei anhao jâra a’nlensak mak sik hei kae.

²⁴Mi inkhat in a’nlensak hnōm inchu, anmani’n kei hi amanhretna eng leh kaṭong hri alothei jâra a’nlensak sik kae, ajârchu kei lungsetna chu inthlengtik neimak, khana akadik kha ke’n katloa kae. Hivahei hin kamalung anmantlaia kae. RŌNGPU ke’n kahri jo kae.”

²⁵RŌNGPU’n ati, “Egypt, Judah, Edom, Ammon. Moab, khana ansam kabongtek a kavo nêrdiram mihei karâkna kapekna sik pha kha lakajōng sik. Hiva mipui ankhenga anvun intan jo hei, tâk-kha intepna mêrchîkna khachu juimak hei. Hiva mi inkhatbek in, khana Israel mi inkhatbek inum kaṭong pek juimak heia kae.”