Read Komrem ṬAJAISUINA 1 Bible Online

ṬAJAISUINA 1 - Komrem bible

ṬAJAISUINA 1

¹Pha khat a mipui kasip a omna khōpui, Jerusalem kha heikhonga abinga ka-om jo! Pha khat a vânhnōi in kajana anta leipek kha, amanu kha, tunchu renghmei kapōa ka-om jo; Khōpui kâra akalenpen kha sōk changna hrep a katlu jo.

²Jân kathang ṭajai asui; akabeng heia ahmit rathli kalōng. Hmalaia aṭhōn rakip hei kâra, inkhatbek in amanu mathlem mak. amanu inthloppui he’n ama anhōn jo khana tunchu ankhenga ama andōi jo.

³Judah mihei inthōpui kaneimak sōk-hei kae, an-inna inphut anhnongsōt jo hei. Anram ti sik neiloa miram a ka-om jo hei. Antlânsōtna sik omloa, an-inre he’n ankakekhum jo hei.

⁴A’ntheng kani heia Bek-inna kamukna sik a tûte hongmak hei. Tûte inkhatbek hongmak jo hei. Khava khana hlakasak nuhngâk he’m inrim hei, khana thempu he’m kaṭap hei, khana khōpui kekot-hei kha karōk pet a kangir, khana Zion inrengna athōk jo.

⁵Aka-en kada he’n chung sōkna annei; anratha neina shunga anmatua kae. Atlo setna katamtak jâra RŌNGPU’n inrengna apek kae; asahei kha ansur heia anṭhōisōt jo hei.

⁶Jerusalem lûrje kha akathlengsa ṭong kachang jo. Amanu hlamkakeihei kha vonṭâm jâra akatlasam shakhi ka-ang jo hei, Sha kahnong heia inphut antlânsōtna khan anratha akatlang jo ka-ang hei.

⁷Binga ka-om a’nhmangsō jo Jerusalem in tunchu hmalaia alûrna kha amandonsōt jo. Aka-en kadahei kut a atlûk pha, ama inthōpui sik tûte leiom mak hei; amanu tlâksukna kha akator he’n anmanuisōa kae.

⁸Amanu kajana om mak jo; amanu akarōk a ka-om khana nōisetak a ansur jo. Amanu inkōia inhnaktak a ahmai amakhu jo. Jerusalem in ṭit ka-om tak setna vânga abibinga hnemna kase inchang jo.

⁹Amanu intheng makna kha kabeitak a inhmusōt, tâk-kha avâng setna kha heitea donmak a kae. Ama tlâksukna hi ṭit ka-omhêr; tute’num ama bômtor mak. Aka-en kada he’n antor jo, khana RŌNGPU hneng inthōpuina sik ka-ônga kae.

¹⁰Amanu inrepui he’n akarōi buk rakip anchomsō jo. Anmani’n Bek-inna anheihlut kha ahmu hei, RŌNGPU’n jât-hlop heihlut sik ahnōm makna hmun akhan.

¹¹Ami he’n heikhat sâk sik anjong pha inkōi hei; antak hringna sik a ankarōi kha bu leh anthleng hei. Khōpui khan ka-ônga ati; “Rōngpu, ajōng enroh, kei inrengna hi ajōng enroh.”

¹²Ahnenga akase rakip hei hneng kaṭap a ati, “Kei ajōng enroh.” Kei tade kapōa tûte’num natna hi demak hei, RŌNGPU’n ahnuknat pha kachunga hiva natna apek eng hi.

¹³Ama’n chunga inphut hmei ahei tir, khava hmei khan kamalung akâng. Ama’n kei man-ôkna sik châng inkhat akam, khava khan raleia akei mathlâk eng. Khava sōa ama’n kei adahlon eng khana nat kathok ṭhak sik a adahlon eng.

¹⁴“Ama’n asetna rakip amazet a ada, khahei kha akhōp manchuna ada; Ama’n karînga khahei kha aman-or eng, khana khava rônkahrik dena khan katlasam jo eng. Rōngpu’n ka’nrepuihei hneng apeksot eng, khana anmani dōina ratha nei hêrmak eng.

¹⁵“Rōngpu’n karemi kahrat hei seng kha amanōisō hei; Karether hei suk manhmang sik a remi rup inkhat ahei tir hei. Ama’n kamihei kha vomhrui thei ep-mannōi kapōhrep a akahnur hei.

¹⁶“Khava jâra kahmit a hmit-rathli kasiptak kalōnga kae. Tûte’num amathlem tor mak hei; tûte’num lungngam apektor mak hei. Ka-inrepui he’n kei antor jo eng; kami om hêrmak jo hei.

¹⁷“Kakut hei karajit hei, tâk tûte inkhat in a’nthōpui mak hei. RŌNGPU’n aram rakip a ka’nrepuihei abek jo hei; Anmani’n kei hi neinâk kachok kapōhrep a anlo enga kae.

¹⁸“Tâk-kha RŌNGPU chu akadik kae, ke’n aṭong kajuimak jâra kae. Hmuntina mihei kaṭong hi rangei ruh; kei inreng hi enruh, Kami rether leh nuhngâk-hei rehringa anṭhōi jo hei.

¹⁹“Kei inthloppui hei kabek hei, tâk-kha abôm hnōm mak hei. Thempuhei leh hlamkakeihei khōpui hlam a kathihei, Anhringna sik a bu kajonga anselai khan.

²⁰“O, RŌNGPU, enroh, kei inrengna hi, kamalung inkōina hi! Kasetna hei jâra kamalung hi kakōi jo. Hlam a mikathat ka-om hei; innshunga kapha thina kha ka-om.

²¹“Kei inkōina hi arangei pek roh; lungngamna anikapek sik tûte om mak. Nang in kachunga inrengna napek eng jâra ka-inrepui hei inpâk hei. Naṭong tepna kani kha heimatlung roh; kei kapōa khōdeng manthei hei roh.

²²“Anthat makna rakip jâra maset hei roh; Kaset jâra nakarâk eng kapōa anmani karâk hei roh. Inreng enga inkōi eng; khana kamalung hi kana jo.”