Read Komrem ṬAJAISUINA 3 Bible Online

ṬAJAISUINA 3 - Komrem bible

ṬAJAISUINA 3

¹Pathen in karâkna apek sik a’nhret kha ke’m inkhat eng kae.

²Ama’n kei hi inthimna inthûk chet-chet a amathlâk jo eng.

³Khana ave-avea lungsetna kasea avōk eng.

⁴Ama’n karavōi hi akei hlera ada eng, karu hei hi amathlek pek eng.

⁵Inreng khōdeng theina kurkhum a akhum eng.

⁶Ama’n rumhrat a kei hi akathi inthimpakna khan aman om eng.

⁷Ama’n hrui vâng kei akhōp eng; inphesōtna sik omlo khum mi kha kei eng kae.

⁸Ke’n kare inshângtak a inthōpuina sik a kapeng eng, tâk-kha Pathen in arangei pek mak.

⁹Kase pha leh kahek kahek a kase eng; kasena rakip a hlung bang he’n kahlam ankhâr pek êng.

¹⁰Kavom inkhat kapōa ahngâk eng; shabakkai kapōa akahman eng.

¹¹Hlamlena ama’n kei ahnong eng, ahar-ahak a akeihler eng, khana adahlon eng.

¹²Ama’n asai akam khana aṭhe kâpna aradin kha amanchang eng.

¹³Ama’n athe kha kataksa inthûktak shunga akâp manhlut a kae.

¹⁴Sûn nilun mihe’n anmanuisō eng; anmani seng sem tlona kachang jo eng.

¹⁵Ama’n kasâk leh ka-in sik a apek eng kha inrengna kakhôktak rōk hi kae jo.

¹⁶Ama’n kahmai hi raleia akarôtpek eng khana kahahei kha hlung chunga amathlek pek eng.

¹⁷Taksa kaṭha leh mōngna khana inpâkna hei kha heimo kae manhret mak jo eng,

¹⁸Kei akasôttak hringmak jo ning; RŌNGPU a ka’nhōrna kha om mak jo.

¹⁹Kei châmna hei, inn kasea ka-omna hei kamandona tûr kakhatak kae jo;

²⁰Hivahi kamandon ṭhak a kamalung hi hōithei mak.

²¹Kachang tâk-kha hiva inkhat hi kamandon pha chu inhōrna hi hong inle nôk:

²²RŌNGPU akatlasam mak lungset maritna kha tûn katlung injônṭhak,

²³Jîngkâr kapōa kather, kani kasōk kapōa sôimak a kae.

²⁴Kei tanei khachu RŌNGPU rōk kae, khana ka’nhōrna kha achunga kada.

²⁵RŌNGPU kha ama kataksen rakip hnenga akaṭha kae,

²⁶Khava jâra ahukna sik me thōk-hrat leh inṭhōia hngâk sik hi eini sik a akaṭhapen kae,

²⁷Khana ninaipang changlai thōk-hrat inthemchûk sik hi akaṭhapen kae.

²⁸Khōdeng nithei pha, sip tia thōk-hrat leh inṭhōia in-ong sik kae.

²⁹Insinsak a aka-om sik me kae, ajarchu tûn katlung inhōrna laka-om theia kae.

³⁰Anvōkna mea, inzakna anpekna mea, heirakip kha akahnōm sik me kae.

³¹Rōngpu chu mi inlungset thei kae, ahei tik a ahlon sōt mak min.

³²Ama’n khōdeng theina apekthei me, tâk-kha eini alungsetna me kha inchên khana kangar.

³³Eini khōdeng manthei sik leh natna pek sik kha ama’n kahōia asak changmak.

³⁴Nirathla kha kurkhum shunga suk rabun achang pha RŌNGPU’n amanhret pek me;

³⁵Ama’n apek me niratha neina kha nichanmak pha ama’n amanhret.

³⁶Ṭongtan hmun a akadik kha nam mathlâk a a-om pha, ama’n amanhret a kae.

³⁷Pha rakip a RŌNGPU lungdo rōk kha a’ntloṭhak kae.

³⁸Ama ṭongpek rōk a akaṭha leh akase hei hi akasōk kae.

³⁹Nisetna jâra karâkna nichen pha leh heijâra mo a’nphin ṭhak sik me?

⁴⁰Nihlam jōn kha en kaṭha me sona RŌNGPU hneng hong inhe rih.

⁴¹Marvâna Pathen hneng malung mahlang me sona derna nei rih.

⁴²“Keini kaset jo ung khana inphin jo ung, khana O RŌNGPU nang in arangei mandam mak che.

⁴³“Nang in nahnong unga nathat ung; nahnuknat khan nalungsetna kha athup joa kae,

⁴⁴Nahnuknat sumtuk kha insa reia kanderna hei che khan petan tor mak jo.

⁴⁵Nang in keini akachok manbukna raleia nasyem jo ung.

⁴⁶“Keini kan-inrepui rakip he’n inzak anpek ung khana anmanuisō unga kae.

⁴⁷Keini hi inhmangna leh inrengna shunga leika-om ung; keini ṭitna leh thina hmun a ka-om ung.

⁴⁸Kamihei inhmangna kahmu pha kahmit a hmit rathli’n tuidung kapōa kalōnga kae.

⁴⁹“Kahmit rathli hi kava tui bânglo kapōa kalōng sik,

⁵⁰RŌNGPU’n marvâna inphut ahong ena ahmu mak me kârseng.

⁵¹Khōpuia nuhmeihei chunga akasōk kha kahmu pha kamalung kana hêr.

⁵²“Anhōtna sik eng ajâr omloa inrepui he’n va kapōa chânga anman-ôk eng.

⁵³Anmani’n kahringpuma tuikhura anhlon mathlâk eng khana akhur kave kha hlung vânga ankamsi eng.

⁵⁴Tui in akachûm manphut eng, kathina sik pha hong katlung jo tia indon eng.

⁵⁵“O Rōngpu tuikhur athōia inphut nahnenga hong ka-ông eng,

⁵⁶Kaderna arangei pek roh tia kangek che pha nathei pek eng.

⁵⁷Nang in namasôn enga ṭitmak roh tia namanthei eng.

⁵⁸“Rōngpu, kei kahuk sik a kahong chea kahringkhō nahuk enga kae.

⁵⁹Kei ka-ôp a ṭong tan roh; kei chunga akadik mak a tlona eng kha namanhret.

⁶⁰Ka’nrepui he’n heikhonga antahōt eng mo khana kachunga heikhonga ṭōn mantlukna antanei mo nang in namanhret.

⁶¹“Kei inzakna antapek eng kha nathei hei, O RŌNGPU; nang in anmantlukna rakip namanhret a kae.

⁶²Kei chungchânga ṭong sûn nilun anmani’n anhri khana anmani’n ṭōn mantlukna annei.

⁶³Jîngkâra inphut khōhlei katlung, anmani’n kei anmanuisō eng.

⁶⁴“O Rōngpu! anmani antōntlo dungjuia karâk hei roh;

⁶⁵Hâksêr hei ina, malung hōimak in mansip hei roh!

⁶⁶Hnong manjâm hei ina raleichunga inphut losōt pet jo hei roh!”