Read Komrem EZEKIEL 1 Bible Online

EZEKIEL 1 - Komrem bible

EZEKIEL 1

¹Kum 30 tlukna thla 4 changna, ni 5 tluk ning, Buzi sapa, thempu Ezekiel kei Babylona Chebar tuidung panga rehring sura aka-om Jehudihei leh leika-omsap ung. Marvân kot inhlânga, Pathen hmangtalâr kaleihmu.

²Reng Jehoiachin rehringa ankeina kum 5 tlukna kha kae.

³Babylon ram a Chebar tuidung panga RŌNGPU’n kahnenga ṭong ahri kha kathei khana aratha hratna kha kamanhret.

⁴Chungting kathlira sak tinga inphut thlipui ahong kha kahmu. Khō inphea sumtuk katamtak kâra khan jōng kavâr liplep, khana akimvea bōirōk kha hong kasûk jo. Khava khōjang pōkna avâr liplepna khan heikhat sum-êng kapōa hong inlâr.

⁵Thlipui alaitak a khan, mihring hme anpōa ranhring 4 kahmu hei,

⁶tâk inkha-khat in anhmai 4 et khana mathla 4 et annei.

⁷Anke kha intlunpet hei, ankepha kha sehrat hei kapōa, ke matin annei. Kheng mantheng jo sum-êng anpō.

⁸Anhmai 4 leh anmathla 4 kakhe nôk a, mihring kut 4 anneisa, anmathla hnōia inkhat et ka-om.

⁹Ranhring inkhat et in anmathla 2 et kha anmazer, anmathla hmor hei kha intôntō et hei, khana anjōng pha antaksa maheloa anrup a kajōngsōt hei.

¹⁰Ranhring inkhat et in anhmai ahlop et 4 sâm annei: hmating mihring hmai, changting shabakkai hmai, veiting sehrat hmai, khana kahnungting marhmu hmai anrôna kae.

¹¹Ranhring rakip in anmathla 2 et kha anmazer heia ahmor hei kha anhnenga ranhring mathla hei leh intôntō et hei, khana anmathla ahlop 2 hei khan antaksa ankatōmna heia kae.

¹²Ranhring inkhat et in ramkei 4 anhnget et, khava jâra hiva rup-hei hin antaksa inheloa anse hnōmna langting kase tor hei.

¹³Ranhringhei kâra hin heikhat hmeira-ê kapō akavâr, bângloa akalôn lele ka-om. Hmei kasuk kha hong kavâr rik-rak a khō inphea hmeivâr ajōng kâpsōt a kae.

¹⁴Ranhringhei kha khō inphe ayâng dungjuia hnung leh hmating vâr ankâpsōt heia kae.

¹⁵Ke’n ranhring 4 hei ka-en pha anhnenga et a gâri chaka 4 raleichunga akangir hei kha kahmu.

¹⁶Gâri chaka 4 hei kha in-angpet hei: hlung mankatam et anpō, gâri chaka inkhat et a khan ahlop chaka inkhat et kakopsa, inkhat leh inkhat kha anlaiṭimtak a inpetan hei,

¹⁷hivahi gâri chakahei khan ramkei 4 anlôn theina sik a kae.

¹⁸Gâri chakahei akekim kha hmit katamtak in akatōm

¹⁹Ranhringhei kha anse pha gâri chaka 4 hei kha’m kasesa hei, khana ranhringhei kha raleia inphut chungting anjōng phale’m chakahei kha’m kajongsōt hei.

²⁰Ranhringhei kha antamadu dunating kase hei khana chakahei kha’m khang hrep a anjui, ajârchu ranhringhei khan khahei kha antakhâm hei kae.

²¹Khava jâra ranhringhei sena, ngirna, bōirōk a anjōngna phatina chaka he’num khanga anjui hei.

²²Ranhringhei luchunga khan hlungvâr vânga insyem a’nke-koi phuchung kapō ka-om.

²³Hiva phuchung kapō thōia hin ranhringhei kha kangir hei, anmathla 2 et anmazera anhnenga inkhat mathla hmor kha anvatôn khana mathla 2 nôk he’n antaksa kha ankatōmna hei.

²⁴Anjōng pha leh anmathla rasa kha ke’n kathei; tuipui kalōng rasa apō, remi katamtak hei rasa kasōk apō, Chunghnung Pathen kare apōa kae. Anmani an-inhnga pha leh anmathla kha ankatōm,

²⁵tâk-kha anlu chunga bōirōk kâra rasa inkhat kajōng.

²⁶Phuchung kapō chunga khan sapphir hlung vânga a’nsyem reng in-ongna inkhat kapō ka-om, reng in-ongna chunga a’n-ong kha mihring hme apōa kae

²⁷Hiva hme hi hmeishunga sum-êng kavâr ka-ang. Vâr kadi rik-rak vânga akimve kha ara-ângsō

²⁸khava shunga khan saisûm rakip kakip a anei. Hivahi RŌNGPU ka-om ti malârna vâr akade liplep kha kae. Ke’n hivahi kahmu pha, kahmai raleia kamakhup a kae. Khava sōa ke’n rasa inkhat kathei.