Read Komrem EZEKIEL 10 Bible Online

EZEKIEL 10 - Komrem bible

EZEKIEL 10

¹Ranhringhei luchunga phuchung kapō a’nkhâr kha ke’n ka-en khana khahei chunga hlung mankatam vânga ansyem reng in-ongna kapō inkhat ka-om.

²Pathen in rōipōn kasipa hneng ahri, “Ranhringhei thōia gâri chakahei kâra hlut roh khana hmeira-ê kakâng nakut maja mansip roh. Khava sōa khōpui chunga kathek manchai roh.” Ama kase kha kalei-en.

³Ama kha ase inhlut pha, ranhringhei kha Bek-inn thlâng ting leikangir hei, khana ashungtinga sumpuk kha sumtuk in kasip sō jo.

⁴RŌNGPU omna vâr kadi rik-rak kha ranhring heia inphut hong kaketou khana Bek-inn hlutna kotting insôn jo. Khava sōa sumtuk khan Bek-inn kha kasip sō jo, khana sumpuk kha vâr in ara-ângsō jo.

⁵Ranhringhei mathla mahring kha sumpuk vângting katlunga hei-inthônga kae. Khavakha Akahratpen Pathen karesō apō.

⁶Ranhringhei thōia gâri chaka 2 kâklak a hmei ajing lona sik a RŌNGPU’n rōipōn kasi pase hneng ṭong ahei pek pha, ama gâri chaka inkhat hnenga kangir jo.

⁷Ranhring inkhat in ankâklak a ka-om hmeishunga akut akapora hmeira-ê ahlek alo, rōipōn kasipa hneng apek jo. Mipa khan hmeira-ê kha aloa kase jo.

⁸Ranhring inkhat et in anmathla hnōia mihring kut kapō antanei kha kaleihmu.

⁹Ke’n ranhring inkhat et sira khan gâri chaka 4, a’n-angtling hei, kahmu hei. Gâri chakahei kha hlung mankatam hei anpō, inkhat et alaiṭima chaka inkha-khat inkhang heia khat leh khat intlunhrek a inpetan hei.

¹¹Ranhringhei khan anlôn pha, inhejen loa ramkei rakip a kase tor hei. Inhe vângvei omloa anse hnōmna ramkeia ankhenga insônhei.

¹²Antaksa, ankhôn, ankut, anmathla, khana gâri chakahei kha hmit rōk in akatōm hei.

¹³Aka-ông rasa inkhat kathei, “A’nlik gâri chaka” tia.

¹⁴Ranhring rakip in anhmai 4 et annei. 1na kha sehratche hmai, 2na kha mihring hmai, 3na kha shabakkai hmai, 4na kha mârhmu hmai kae.

¹⁵(Chebar Tuidung panga kaleihmu ranhringhei kha kae.) Ranhringhei khan bōirōk a ajōngsōt pha,

¹⁶khana anlôn pha, gâri chakahei kha’m anjōngpui hei. Ranhringhei khan anmathla anheizer inchu chakahei kha’m kajōngsap hei.

¹⁷Ranhring he’n an-inhnga pha chaka he’m inhnga hei, khana ranhring he’n anjōng pha chakahei kha leh kajōngsap hei, ajârchu ranhring he’n anmani kha anrachama anda hei.

¹⁸Khava sōa RŌNGPU omna vâr kadi rik-rak khan Bek-inn hlutna kot kha adahlon jo, ranhringhei chunga hmun khat a vaka-om jo.

¹⁹Ke’n khanga ka-enlai hei anmathla anzera raleia inphut kajongsōt jo hei, khana gâri chakahei kha’m kajōngsap hei. Bek-inn nisō kekot a khan bongkhat inhnga hei, khana vâr kadi rik-rak khan aser manvâr hei.

²⁰Chebar Tuidung panga kaleihmu Israel Pathen hnōia ka-om ranhringhei kha kae tia kamanhret hei.

²¹Inkhat in hmai 4, mathla 4, khana mathla ṭhōi heia mihring kut kapō annei hei.

²²Anmani hmai kha Chebar Tuidung panga kaleihmu hei hmai leh in-angtling hei. Ranhring rakip ankhenga intlunhrek a kase hei.