Read Komrem EZEKIEL 11 Bible Online

EZEKIEL 11 - Komrem bible

EZEKIEL 11

¹Pathen rathla khan kei akeitou enga Bek-inn nisōtinga kot a khan amaṭhum eng. Khava kot kunga khan pase 25 kahmu hei, ankâra jât hlamkakei 2, Azzur sapa Jaazaniah leh Benaiah sapa Pelatiah kahmu hei.

²Pathen in kahnenga ati, “Akathithei mihring, hiva mihei hin ṭōnse anmantluk a khōpuia mihei hnenga akaṭhamak tinga mansena ṭong anpek hei.

³Anmani’n anti, ‘Inranga innhei nisak nôk sik jo. Khōpui hi an sōngna khângbe kapō kae, eini hi ashunga hme kapō me kae, tâk-kha khava khan hmeia inphut ajingbek chu ahrung me.’

⁴Achang jâra tûnchu, mihringsa, anmani themmô pek hei roh.”

⁵RŌNGPU rathla khan ahrung enga, RŌNGPU’n hiva ṭong hi mihei hnenga hrina sik a amanthei eng, “Israelhei nangni tahri leh ṭōn mantlukna kha ke’n kamanhret.

⁶Nangni’n khōpui shunga mi katamtak nanthat heia kathi kalōng in khōpui hlam kasip sō jo.

⁷“Khava jâra Chunghnung RŌNGPU ke’n hing’hin nanhnenga kahri kae. Hiva khōpui hi ansōngna khângbe kae, tâk-kha ahme kha heimo? Nangni tathat mi kalōnghei kha kae! Nangni hin om mak tin chei, khōpuia inphut kahlonsōt sik chei kae.

⁸Nangni chemjâm nanṭit mo? Ke’n nangni kabuhlu sik a chemjâm kachoi kaheiṭhōi sik hei.

⁹Khōpuia inphut kaṭhōisōt sik chei khana ram hlop hei hnenga kapek sōt sik chei. Thina karâkna kapek jo chei kae,

¹⁰khana nanram shunga re shunga that sik chei kae. Khan chu mi rakip in kei hi RŌNGPU eng kae tia anmanhret sik jo eng.

¹¹Khângbe’n ashunga hme akhar hei kapōa khōpui khan hukmak chei ning. Israel ram shunga khava hmun a nan-om inum ke’n kakarâk sik chei.

¹²Nangni’n kei hi RŌNGPU eng kae ti nanmanhret sik eng, khana nangni’n nankhō vena jât-hei dân nanjui pha, kei dân chu nanvōk khōi jo khana kei ṭongpek chu juimak jo chei.”

¹³Ke’n ṭong kasânsōt lai khan, Pelatiah kha kathihlon jo. Kei kabinga kahmai raleiting kamakhup a ka-ông eng, “Changmak, Chunghnung RŌNGPU! Israel shunga a’nhlei alakahring hei hi nathatsō sik hei mo?”

¹⁴RŌNGPU’n kahnenga ṭong ajōng hri.

¹⁵Ama’n ati, “Akathithei mihring, Jerusalema ka-om mipui he’n nang leh nasap rehring sura aka-om nangnihei chungchânga inbek hei. Anmani’n anti, ‘Rehring sura ka-om heiso RŌNGPU inmuk sik a kahla hêr jo hei. Hiva ram hi eini apek jo me kae.’

¹⁶“Tûnchu nasap rehringa antasur mihei hneng manthei hei roh. Hmun kahlatak a ka-om jât-hei hnenga ankatirsōt leh ram hlop a a’nchai kathek kha kei eng kae. Kha’num, pha khat sik a anleisena ramheia khan ka-ompui sik hei.

¹⁷“Khava jâra Chunghnung RŌNGPU ke’n kahri hi manthei hei roh. Ke’n kakathek manchaina ramheia inphut kakhôm mantûp sik hei, khan Israel ram kha kapek male sik hei.

¹⁸Anmani an-inle pha leh, akachok, mater ka-om limsyem anta leinei seng kha andahlon sik jo hei.

¹⁹Ke’n malung ther leh mandonna ther kapek sik hei. Hlung kapō malung kasak kalosōtpek sik hei khana ṭongpek kajui malung kapek sik hei.

²⁰Khava sōa kadân annit sik jo khana kaṭong pek rakip taksentak a anjui sik jo. Anmani kami kachang sik hei, khana kei an-Pathen kachang sik jo eng.

²¹Tâk-kha hnemna kase, mater ka-om limsyem inmuk mihei khachu karâkna kapek sik hei. Anṭōnse tlona jâra karâkna kapek sik hei kae.” Chunghnung RŌNGPU’n ahrisōt jo.

²²Ranhringhei kha akajōng anphut jo, khana gâri chakahei leh inṭhōi jo hei. Israel Pathen omna vâr khan anchunga aset manvâr jo hei.

²³Khava sōa vâr kadi rik-rak khan khōpui kha adahlona khava nisōtinga tlânga kase jo.

²⁴Hmangtalâra khan Pathen rathla’n akeitou eng Babylona rehring surna ram a aheiṭhōi male eng. Khava sōa hmangtalâr kha kabâng jo,

²⁵khana RŌNGPU’n amanhmu eng rakip kha rehringa antasurhei hneng kamanthei heia kae.