Read Komrem EZEKIEL 12 Bible Online

EZEKIEL 12 - Komrem bible

EZEKIEL 12

¹RŌNGPU’n kahnenga ṭong ajōng hri.

²Ama’n ati, “Akathithei mihring, nang hi re indu hei kâra ka-om che. Anmani’n hmit chu annei, tâk heite hmumak hei; kōr chu annei, tâk heite theimak hei, ajârchu anmani anrahe kase.

³“Tûnchu, akathithei mihring,” rekatlânhei kapōa naphur bôm mantluk roh, khana jân achangmak lai se phut jo roh. Nasesōt kha mi rakip in hmu hei che rasoh. Rahe kase mihei kha’num hmu hei che rasoh.

⁴Sûn kani vâra, rehringa antasur mi inkhat kapōa naphur bôm mantluk roh, anmani’n anhmuna sik che, nang kha rehring sur akase sik che kapōa khōhlei ting nasesōt kha en hei rasoh.

⁵Khanga an-en chelai khan na-inn banga akhur inkhat manve roh khana inphut naphur bôm kha losōt roh.

⁶Nadâr chunga naphur bôm na’nṭen leh pōnlu na’nkhua, nahlam hro sik manhret lo chea inthim kâra nasesōt kha hmu hei che rasoh. Khanga natlo kha Israel sik a gîkna inkhat akae sik kae.”

⁷RŌNGPU’n tlo sik a amanthei eng kha kaleitlo jo. Khava ning rekatlân inkhat kapōa kaphur bôm kamantluk jo, khava ning khō ahong inthim pha bang kha kakut vâng akhur kamanvea kasōksōt eng. Mi rakip in anlei en eng pha, kaphur bôm kha kadâr chunga inṭen enga kase jo eng.

⁸Ajînga jîngkâra RŌNGPU’n kahnenga ṭong ajōng hri.

⁹“Akathithei mihring, sova Israel rahe kajōng he’n nang in heimo natlo tia ander che,

¹⁰Chunghnung RŌNGPU ke’n anhnenga kahri hi manthei hei roh. Hiva ṭong hi Jerusalema rengsahei leh khana aka-om mipuihei sik a kae.

¹¹Nang in natlosōt hei hi anhnenga akasōk sik mêrchîkna kae tia manthei hei roh, anmani rea akatlân loi leh antakhum mi akachang sik hei kae.

¹²Anmani vaikarôn rengsa khan inthim kâra aphur bôm adâra inṭen sik a kha, ama sik a kur rape antavit a khan katlânsōt sik. Pōnlu inkhua khontinga akase sik hmumak ning.

¹³Tâk-kha ke’n kalen kha kaheivor sik khana kakhum sik. Khana ke’n Babylon khōpuia kaṭhōi sik, khana khan ahme hmuloa kathi sik jo.

¹⁴Ama reng inna ṭongkarônhei, ama mansena kapek hei khana akahrung hei kha kachai kathek sik hei, mihe’n that sik a anjong sik hei.

¹⁵“Anmani jât-hlop hei kâra leh ram hlop heia kachai kathek hei pha, anmani’n kei hi RŌNGPU eng kae tia anmanhret sik jo eng.

¹⁶Anmani jât-hlop hei kâra an-omlai hmalaia anṭōn leitlo hei kha heituk a mater ka-om mo tia anhong manhretna sik khana kei hi RŌNGPU eng kae tia anhnōmna sik, anmani ahlek chu rea, ṭâma, nat leh sat heia inphut kamanhring sik hei.”

¹⁷RŌNGPU’n kahnenga ṭong ahri.

¹⁸Ama’n ati, “Akathithei mihring, thlai nasâk pha innok roh, tui na-in pha ṭittak a inthing roh.

¹⁹Tûn katlunga anram shunga alaka-om hei Jerusalem mipuihei hnenga hivahi Chunghnung RŌNGPU ṭong kae tia jât mihei seng hnenga manthei hei roh: thlai ansâk pha a’nnok sik hei kae khana tui an-in pha ṭitpum a a’nthing sik hei kae. Anram kha chom manthengreng sik kae, ajârchu khana aka-om rakip dân kase hei kae.

²⁰Tûna mi siptakna khōpuihei kha suk manhmang sik hei kae, khana ram kha ramhâng manchang sik kae. Khan chu kei hi RŌNGPU eng kae tia anmanhret sik jo.”

²¹RŌNGPU’n kahnenga ajōng hri.

²²Ama’n ati, “Akathithei mihring, heisa mo Israel mipui he’n ṭongchîk hi antahri ṭhak: ‘Pha kathleng jo, hnungṭong le’nhri khachu heite sōk mak’?.

²³Tûn khava chunga Chunghnung RŌNGPU ke’n kahri sik hi manthei hei roh. Ke’n ṭongchîk kha kamanbâng sik jo. Israel shunga khavakha avea inhrimak ning. Khava kanek a hinga manthei hei roh: pha kha kahong jo, khana ṭongsânsōt kha hongkadik jo!

²⁴“Israelhei kâra hmangtalâr kadikmak khana hlamlea ani kaṭhōi ṭongsân om mak jo ning.

²⁵RŌNGPU ke’n anhnenga kahri sik khana ke’n kahrisōt kha intlosōt sik. In-êng mak jo ning. Rahe kase hei, nangnihei hringkhō shunga, tlo sik a kei gîkna chei kha katlosōt sik kae. Ke’n kahri jo kae,” tia Chunghnung RŌNGPU’n ati.

²⁶RŌNGPU’n kahnenga ṭong ahri.

²⁷“Akathithei mihring, Israel mihe’n nang hmangtalâr leh naṭongsân hei kha hnunga pha kasôttak sik a kae tia anmandon.

²⁸Khava jâra Chunghnung RŌNGPU ke’n kahri kae tia manthei hei roh: pha kha in-êng mak jo ning. Ke’n kahrisōt kha intlosōt sik jo. Chunghnung RŌNGPU ke’n kahri jo kae!”