Read Komrem EZEKIEL 13 Bible Online

EZEKIEL 13 - Komrem bible

EZEKIEL 13

¹RŌNGPU’n kahnenga ṭong ahri.

²Ama’n ati, “Akathithei mihring, anbinga ṭong sânna kanei Israel sânkathemhei so themmô pek hei roh. RŌNGPU ṭong anrangeina sik manthei hei roh.”

³Chunghnung RŌNGPU’n hing’hin ahri: “Hiva akamo sânkathemhei hi inhmang jo hei! Anmani tamadu dungjuia anhrisōt khana anbinga hmangtalâr ansyemsōt.

⁴Israel mihei, nansân kathemhei kha heite ṭhatchômna ka-om mak khōpui karam a aka-om ram-ui kapō hei kae.

⁵Kurbang kasetsa kha hrungmak hei, abang kha’m syem manther mak hei, khava jâra RŌNGPU kani ning re tuk ahong pha Israel hi inhuksōt tor mak ning.

⁶Anmani hmangtalâr kha dikmak, khana hnungṭong antahri kha maleisei kae. Anmani’n kei ṭong antahri kae anti, tâk ke’nchu tir mak hei eng. Kha achang inum anṭong kha akadik sik a inhōr hei!

⁷Ke’n kamanthei hei: nantahmu hmangtalâr kha dikmak, hnungṭong nanhrina kha maleisei kae. Khahei kha kei ṭong kae nanti, tâk ke’nchu nanhnenga ṭong hritet mak eng!”

⁸Khava jâra Chunghnung RŌNGPU’n anhnenga ahri, “Nanṭong hei kha dikmak, khana nanhmangtalâr hei kha maleisei kae. Kei nangni kadōia ka-om eng.

⁹Hmangtalâr kadikmak leh hlamlea ṭhōi theina hnungṭong kahri sânkathem nangni ke’n karâkna kapek sik chei. Kami he’n inbektōna annei pha nangni chu khan leiom mak tin; Israelhei ram mi changna lekharabu shunga nanrahming inveisa mak ning; nangni nanrama inle hêrmak tin. Khan chu nangni’n kei hi Chunghnung RŌNGPU eng kae tia nanhong manhret sik eng.

¹⁰“Heirakip kaṭhapet antia kamihei sânkathem he’n hlamlea anṭhōi hei. Heirakip akaṭhapet chu chang hêrmak! Kami he’n hlung kaṭha inmat loa bang kha ansyem khana sânkathemhei khan sunu vânga ankano makhu.

¹¹Sânkathemhei bang kha katlu sik jo tia manthei hei roh. Ke’n khōsûr inhnaktak kajōngtir sik. Kahre achunga katla sik, khana thlipui in asem manhnak sik.

¹²Bang kha kapûr sik, khana mi rakip in ander sik chei, sunu kano kha heimo ahnemna tia.”

¹³Tûnchu hivahi Chunghnung RŌNGPU tahri kha kae, “Kahnuknat a nanchunga thlipui kamanhrâng sik, khō kamansûr sik, bang kha suk manhmangna sik kahre kamathlâk sik.

¹⁴Anmani’n sunu antakano bang kha kasuk mathlâk sik, kavōk manchim sik, khana innhmuna hlung kha akarōk a dahlon sik a katlo kae. Khavakha katlu sik a kha athatsō sik chei. Khan chu mi rakip in kei hi RŌNGPU eng kae tia anmanhret sik jo eng.

¹⁵“Bang leh khava chunga sunu inno hei khan kei hnuknat rathahrat hi anmanhret sik jo. Hivasō leh bang kha leh khava chunga sunu inno hei kha om mak jo hei tia kamanthei sik chei,

¹⁶heirakip akaṭhapet achangmak lai, Jerusalem hnenga heirakip kaṭhapet tia aleikahri khava sânkathemhei kha!” Chunghnung RŌNGPU’n ati jo.

¹⁷RŌNGPU’n ati, “Tûnchu mihringsa, nanmihei kâra ṭong kasânsōt nuhmei heiso en hei roh. Maset hei roh

¹⁸khana Chunghnung RŌNGPU’n heimo ahri kha manthei hei roh: “Nuhmei nangni inhmang jo chei! Mi rakip kut a dôi nankhit pek heia anlukôma dôi nanrabek pek hei, khahei khan mihlop-hei hringkhō chunga ratha annei torna sik nantlo. Nangni’n kamihei hringkhō leh thina ratha neina sik nanmadu khana nangnihei hnemna sik a nanhmang.

¹⁹Nangni’n bunim kutsip khat leh buhlom her khat maduna jâra kamihei hmaikunga kajana apek mak chei. Akathi sik rahōi kasōkmak hei kha nanthat hei. Khava jâra kamihei hneng maleisei nanjôm, khana anmani’n antaksen cheia kae.”

²⁰Tûnchu hivahi Chunghnung RŌNGPU’n ahri kae, “Nangni’n hringna leh thina tingtorna sik a nankut a dôi nantakhit hei kha kahōt. Nankut hei kha kakeitan sik khana mipui nantating hei kha kamasō sik hei.

²¹Nangni lukôm kha kahliksōt pek sik chei khana nangnihei ratha neina inphut kamihei vōi khat masōa kamasō sik hei. Khava pha leh kei hi RŌNGPU eng kae tia nanmanhret sik jo.

²²“Nangni maleisei hrina khan ke’n malung nat kapek hnōm mak hei, mikaṭhahei malung nanmathlâk pek hei. Mikaṭhamak he’n akaṭhamak tlona kha bâng sik leh anhringkhō inhuk sik kha nankhârpek hei.

²³Khava jâra tûnchu nangni hmangtalâr kadikmak leh ṭongsânsōt hei kha inchai jo. Nangni’n kei hi RŌNGPU eng kae tia nanmanhretna sik a nangnihei ratha neina inphut kamihei kahuksōt sik hei kae.”