Read Komrem EZEKIEL 14 Bible Online

EZEKIEL 14 - Komrem bible

EZEKIEL 14

¹Israel hlamkakei ṭhahrep RŌNGPU lungdo chungchânga akajongsui sik kahnenga kahong hei.

²Khava pha RŌNGPU’n kahnenga ahri.

³Ama’n ati, “Akathithei mihring, hiva mihei hin anlim chunga anmalung anpek sōt khana limsyem khan set shunga ṭhōi manhlutna anei hei. Ke’n ṭong masônna kapek sik hei tia antamandon mo?

⁴“Tûn anhnenga ṭong vahri roh khana Chunghnung RŌNGPU ke’n anhnenga kahri kha manthei hei roh: Israel rakip limsyem chunga amalung kapek sōt jo, khava khan setna shunga aṭhōi manhlut jo, khana sânkathem hnenga ṭong kajongsuia akahong mi ama kha kei hnenga inphut masônna athei sik, khava asyem milim katamtak hei sik a rahōi kasōk masônna kha kapek sik kae!

⁵Khava limsyem rakip in Israelhei kha kei hnenga inphut aṭhōitsōt jo hei,; tâk kei masônna vânga khan anmani ṭong juina kha kachen male sik tia inhōr eng.

⁶“Tûnchu Chunghnung RŌNGPU ke’n Israel hnenga kahri hi manthei hei roh: hong inle ruh khana mater ka-om nanlimsyem hei kha dahlon hei ruh.

⁷“Israel kâra tu mo inkhat achangmak leh ankâra ka-om khōhme inkhat in kei hnenga inphut a’nhesōt a limsyem akamuk inchu, khana sânkathem hnenga ṭong kajongsuia ase’nchu, Chunghnung RŌNGPU ke’n aṭong masônna kha kapek sik.

⁸Ke’n kadōi sik. Ke’n ama kha mihei tekhing sik a kasyem sik. Nangni’n kei RŌNGPU kae tia nanmanhretna sik eng, ke’n kami rup-hei kâra inphut ama kha kalosōt sik kae.

⁹“Sânkathem inkhat akadik mak ṭong masônna kahri sik a hōnmathlâk jo achang inchu, khavakha RŌNGPU ke’n kahōn jâra kae. Israel mipuihei kâra inphut kalosōt sik kae.

¹⁰Thempu leh aṭong kader sik a akahongpa kha in-anghrep a karâkna anchen sik.

¹¹Khang’khan Israel he’n kei andahlon enga anbing setna khan antasuk mannim hei kha tingna sik a hivahi katlo sik kae. Anmani kami akachang sik hei kae khana ke’n anmani Pathen akachang sik eng kae.” Chunghnung RŌNGPU’n ahri jo.

¹²RŌNGPU’n kahnenga ahri.

¹³Ama’n ati, “Akathithei mihring, ram inkhat in setna atloa khana kei hnenga taksenthei achangmak inchu, ke’n kakut kating sik khana sâk leh in anpekna kha kakhâr sik. Vonṭâm kajōngtir sik khana mi leh sha ṭhenloa kathat sik hei.

¹⁴Mi 3 hei Noah, Danel khana Job, khava hmun a an-om inum, anmani ṭhatchômna khan anbing hringkhō rōk kha ahuk sik hei. Chunghnung RŌNGPU’n ahri jo.

¹⁵“Achangmak leh ke’n ram a sha mikathat sik kajōngtir sik hei, ram kha thi leh inhmangna kasyema tûte inkhat in petan tor mak hei ning,

¹⁶khana mi 3 hei kha khana khan anleiom inum, Chunghnung RŌNGPU kei akahring Pathen kachang jâra, asahei kapha huk tor mak hei ning. Anbing hringkhō rōk inhuk sik hei, khana ram khachu ramhâng kachang sik jo.

¹⁷“Achangmak leh ram shunga khan ke’n re kahei rôn manhlut sik khana inhmang theina re hmangchâk, mihring leh shahei inramna sik a kahei tir sik,

¹⁸khana mi 3 hei kha khana khan anleiom inum, Chunghnung RŌNGPU kei akahring Pathen kachang jâra, ansahei kapha huk tor mak hei ning, tâk anbing hringkhō rōk chu inhuk sik hei.

¹⁹“Khava ram a hrise kahei tira khana kahnuknat a hringkhō katamtak kalosōt a, mi leh shahei kathat inchu,

²⁰Noah, Daniel khana Job khana khan anleiom inum, Chunghnung RŌNGPU kei akahring Pathen kachang jâra, ansa heibek um huk tor mak hei ning. Anṭhatchômna khan anbing hringkhō rōk chu inhuk sik hei.”

²¹Hivahi Chunghnung RŌNGPU’n ahri kha kae: “Ke’n akaṭhamak tak karâkna 4 Jerusalem chunga kajōngtir sik: re, vonṭâm, ramsha, khana hrise, mihring leh shahei kasuk inhmang sik a.

²²Tu mo inkhat kahringa asahei ahuk he’nchu, nahnenga anhong pha en hei roh. Heituk a akaṭhamak hei mo en hei roh, Jerusalema ke’n karâkna kahei rôn sōt hi kadik tia hnōm roh;

²³khan chu kei ṭōntlo rakip hi aṭhatchômna ka-om tia namanhret sik jo.” Chunghnung RŌNGPU’n ahri jo.