Read Komrem EZEKIEL 16 Bible Online

EZEKIEL 16 - Komrem bible

EZEKIEL 16

²Ama’n ati, “Akathithei mihring, Jerusalem hneng heituk a mater ka-om omchen mo atlo kha hripek roh.

³Chunghnung RŌNGPU’n Jerusalem hneng heimo ati kha hripek roh: “Nang Canaana inphut jōng inte che. Napa kha Amor mi kae, nanu kha Hit mi kae.

⁴Nang na’nte pha, tûte inkhat in namalai hrui tanmak hei khana rasi mantheng mak hei khana chi vânga nataksa akano pek mak hei khana pōn vâng akasûn mak hei.

⁵Tûte inkhat in hihei seng tlopekna sik che lungsetna katluk a neimak hei. Nang na’ntet lai tûte inkhat in lungset mak hei che. Ramhânga hleipuk heia anleihlonsōt che.

⁶“Ke’n nahnenga kahei jōn a kahong pha, nathisen kâra a’nlet vângvei che kha kahmu che. Thisen in aleikatōm che, tâk ke’n nang manthi mak che ning.

⁷Thingkung kapōa kaman khang che. Kangar tak leh inshângtak a kakhang jo che khana nuhngâk hong katluk che. Nane kaṭha hong insyem jo, nasam heikasei jo, tâk nang pōn invei mak che.

⁸“Nahneng kahei hro nôk pha, nang sik a mi leh induna pha hong katlung jo. Ke’n kazakkō kasei vâng kamakhu chea kalungset sik che tia intep eng. Kadik, nang leh luhông sik a intepna kanei, khana nang keita hongkachang che.” Hivahi Chunghnung RŌNGPU tahri kae.

⁹“Khava sō leh tui kaloa nathisen kha kasôppek che. Natak a olive thai kakano che.

¹⁰Ret kabek zakkō kasei kamansi che, shavun kaṭha kekōk kamannei che, pōn inne vâng nalu kakhit pek che, kaprang pōn kamansi che.

¹¹Natak chunga sana kamannei che, nakut a zakser leh har, nahrak a maṭhi,

¹²nahnara hnarton, nakōr a kōrton, nalua lukhu kaṭhatak kamankhu che.

¹³Nang in sana leh dangka ret naneihei, khana ahei tik a kaprang pōn leh pōn innem ret insyem vânga invon che. Jâmdi kaṭhapena insyem buhlom nasâk khana khōihning leh olive thai sâk sik naneihei. Nahmeṭhat kha kadi rik-rak che, khana nang rengnu hongkachang che.

¹⁴Nahmeṭhat jâra jât rakip hnenga inthang jo che, ajârchu nahme lungset ka-om tak a akasyem kha kei eng kae.” Hivahi Chunghnung RŌNGPU’n ahri kha kae.

¹⁵“Tâk-kha nahme ṭhatna leh najai inthang kha hnemna najongpuia akahong rakip najepui hei.

¹⁶Napōn ahlek chu nang kamukna hmun a ret syemna sik nahmang hei, khana noti inkhat kapōa, nabinga mi rakip hnenga inpek sōt che.

¹⁷Ke’n kapek che sana dangkahei kha nalosōt a pase lim nasyema khavahei kha leh kajông ri chea kae.

¹⁸Ke’n kapek che pōnsi hei naloa limhei chunga namanvon heia kae, khana ke’n kapek che olive thai leh marim katui hei kha limhei hneng tōkna naneia kae.

¹⁹Ke’n thlai kapek che — jâmdi kaṭhatak, olive thai, khōihning, tâk khahei kha limhei lungsetna chentheina sik a inthoina natōk hei.” Hivahi Chunghnung RŌNGPU’n ahri kha kae.

²⁰“Khan chu kei sanu leh sapa namatet pek eng hei kha nang in limhei hneng inthoina natōksōt hei. Kei hnenga taksenthei nachang makna hi ṭhatmak akatluk set kha changmak ning mo

²¹kasahei chu inlo lo hei chea, limhei hneng inthoina natōksōt hei mo?

²²Noti nachangna mater ka-om tak nahringkhō shunga vōi khatbek um nanaipang changlai kha mandonsōt mak che, pōn na’nveimak leh nathisen kâra a’nlet vângvei che kha.”

²³Chunghnung RŌNGPU’n ati, “Nang inhmang jo che! Inhmang che! Akaṭhamak rakip natlo jo, khana,

²⁴hlamsir rakip a limsyem kamukna hmun nasyem hei khana noti kachang che.

²⁵Nahme ṭhatna kha dôp shunga na’nbepui. Hlam kahro rakip hnenga nataksa inpek sōt che khana ani tina noti omchen natlosa chet-chet a kae.

²⁶Nakhō navena mi kahurtak, Egypt hei kha jekhum na’nchunpui hei, nang noti changna khan kei kahnuk namannat a kae.

²⁷“Tûnchu nang karâkna sik leh kei vângpek che kha losōtna sik a kakut kakalâng jo. Ke’n nang kahōt hei leh na-omchen kaṭhamak ṭōn inter hei, Philistihei kut chunga kapek sōt jo che kae.

²⁸“Ajârchu mi ralak-hei leh nang chimmak che, nang in Assyriahei najong hei. Nang anmani noti leikachang che, tâk anmani’m nang leh chimdek mak hei.

²⁹Nang invei katlo jât, Babylonhei noti’m leikachang che, tâk anmani’m nang leh chimdek mak hei.”

³⁰Hivahi Chunghnung RŌNGPU tahri kha kae: “Nang in inzak inhret mak noti kapōa hiva rakip hi natlosō jo.

³¹Hlamdung rakip a limsyem kamukna hmun nasak hei khana noti omchen natlo jo. Tâk noti lak kapōa chu sêr hlōna sik a vânga sōk mak che.

³²Apuise lungset rôn sik kanek a nang hi khōhmehei leh akajônglele nuhmei kapō che kha kae.

³³Noti inkhat chu sêr a’npek kae, tâk nang chu na’nlungsetpui rakip hnenga kutchoi napek hei khana hmun rakip a anhong leh nang anjepuina sik che marûk a sêr napek hei.

³⁴Nang chu ahlopdet noti che kae. Tûte inkhat in khanga changna sik a nahnenga rumhrat tlomak hei. Nang sêr inpek mak che; nang jôk in napek hei! Kadik, nang chu ahlop che kae.”

³⁵Tûnchu, Jerusalem, mikajôngnu! RŌNGPU’n heimo ahri rangei roh.

³⁶Hivahi Chunghnung RŌNGPU’n ahri kha kae: “Nang napōn nahlik a, notinu kapōa, na’nlungsetpui hei leh mater ka-om nalim hei hneng nabinga inpek sōt che, nasahei kha limhei hnenga inthoina natōksōt hei.

³⁷Hivahei jâra hin hmalaia na’ndupui hei kha kabek mantûp sik hei, nang tamadu hei leh namater hei ankhenga. Nakimvea kaheiṭhōi sik hei, khava sō leh napōn kahlikpek sik che khana karōk pet a na-om kha hmu hei che rasoh.

³⁸Ke’n najông jâra leh mi nathat hei jâra kadem sik che, khana kahnuknat a thina karâkna kapek sik che.

³⁹Nang anmani ratha neina thōia kada sik che, khana nang noti changna leh limsyem kamukna hmunhei kha anṭhōtsō sik. Anmani’n napōn leh sanahei kha anchoisōt a nakarōkpet a andahlon sik che.

⁴⁰“Anmani’n nang hlung vânga denghlonna sik a mipui anmathok sik hei, khana anchemjâm vâng ahar-ahak a antuktan sik che.

⁴¹Anmani’n na-inn hei kha hmei vâng anro sik khana nang karâkna kha nuhmei rup he’n anhmu sik. Nang noti changna kha kamanbâng sik che khana na’nlungsetpui hei hnenga marûk sêr napek hei kha’m kamanbâng sik che.

⁴²Khava sōa kahnuk natna kha kachim sik jo eng. Kei avea kahnuk natnôk mak jo ning khana kathang tômmak jo ning.

⁴³Nang nanuhngâk changlai heikhonga karazen che ti kha namahngi jo, khana naṭōntlo rakip a khan kahnuk namannat jo. Khava jâra khahei rakip kha kaman pek male che kae. Mater ka-om naṭōn tlona rakip chunga khan heisik a mo hiva jông leh kîk omchen hi nahapsa nôk?” Chunghnung RŌNGPU’n ahri jo.

⁴⁴RŌNGPU’n ati, “Jerusalem, mihe’n hiva ṭongchîk hi nang chungchânga anhong hmang sik: ‘Anu kapō asanu.’

⁴⁵Nang nanukhet sanu che kae. Amanu’n apuise leh asahei adahlon hei. Nang nasōpuinu hei, anpuise leh ansa kahōt hei kha napō hei. Nang leh nasōpui khōpuihei kha annu Hit mi khana anpa Amor mi annei hei.

⁴⁶“Na-unu kha sak tinga ka-om Samaria leh akhōhei hi kae. Nanainu kha thlâng tinga ka-om Sodom leh akhōhei hi kae.

⁴⁷Anmani chônna kha kajui sik a leh mater ka-om anṭōntlo majôm sik a akatlai che mo? Changmak, naṭōntlo rakip a, pha bongkhat shunga anmani kanek a akaṭhamak chet omchen atlo jo.

⁴⁸Chunghnung RŌNGPU’n ati, “Kei akahring ṭhak Pathen eng kae, nanainu Sodom leh akhō he’n nang leh nakhōhei tatlo kapōa setna leitlo hêrmak hei.

⁴⁹Amanu leh asanuhngâk he’n sâk leh inn katamtak annei jâra inlensak hei khana kamōnga kadaia ka-om hei, tâk sara leh heite kaneimak hei chu donmak hei.

⁵⁰Anmani inlensak hei, anracham kase khana kei tamater ṭōn antlo, khava jâra nang in namanhret jo kapōa, anmani kasuk manhmang heia kae.

⁵¹“Samaria’n nang set-tlo aṭimbek um tlomak. Amanu tatlo kanek a nang in akakhe chet a mater ka-om kha natlosōt jo. Nang ṭōnse tlo leh tena ninei inchu nanainu kha ṭhena neilo amanchang jo.

⁵²Tûnchu nang in inzakna kha nade sik jo kae. Nasetna kha nasōpuihei kanek a ṭhachet mak jo khana nang kanek a chu ṭhena kaneimak ka-ang jo hei. Tûnchu na’nzakna kha inlâr senga rôn jo roh, ajârchu nang in nasōpuihei kha a’nthengseng naman-ang jo heia kae.”

⁵³RŌNGPU’n Jerusalem hneng ati, “Ke’n anmani kaman khang nôk sik hei, Sodom leh akhōhei khana Samaria leh akhōhei. Kadik, ke’n nang um kaman khang hi sik che.

⁵⁴Nang nabinga inzakna nanei sik, khana nahmai môkna khan nasōpuihei kha heituk mo akaṭha hei ti amalâr sik hei.

⁵⁵Anmani vōi khat hong kahao nôk sik hei, khana nang leh nakhōhei kasyem male nôk sik chei.

⁵⁶Nang na-inlensaklai, naṭhatmak tlo kha a’nlârsōt mak lai

⁵⁷Sodom chunga hnōisena leinei mak che mo? Tûnchu nang anmani kapō jo che kae, Edomhei, Philistihei, nang ani kahōt ven leh sirhei sem tlona kachang jo che.

⁵⁸“Nang ṭōnse tlo leh mater ka-om omchenhei rakip jâra a’nreng sik che kae.” RŌNGPU’n ati jo.

⁵⁹Chunghnung RŌNGPU’n ahri, “Nang rahōi sōkna dungjuia karazen sik che, ajârchu nang in na’ntepna donmak che khana intepna kha navōkkhōi jo.

⁶⁰Tâk-kha naipang nachang laia nang leh ni’ntepna kha kei chu kakaja sik, khana ahei tik a aka-om ṭhak sik intepna inkhat kaneipui sik che.

⁶¹Nang in na-unu leh nanainu nahmu nôk hei pha, heikhonga mo aleika-om chen che nahong mandonsōt sik. Niṭong intepna shunga ale’nveimak inum, anmani kha nang sanu kapōa kaman om sik hei.

⁶²Nang leh ni-intepna kha kamanther sik, khana nang in RŌNGPU kachangna hi nahong manhret sik.

⁶³Nang in akadik mak natlo rakip karangei mandam sik che, tâk nang chu khahei rakip namandonsōt a inzakrei chea nabei kapha mahlang tor mak tin che.” Chunghnung RŌNGPU’n ati jo.