Read Komrem EZEKIEL 17 Bible Online

EZEKIEL 17 - Komrem bible

EZEKIEL 17

¹RŌNGPU’n kahnenga ahri.

²Ama’n ati, “Akathithei mihring, Israelhei hneng ṭong tekâk inkhat manthei hei roh.

³Chunghnung RŌNGPU ke’n anhnenga kahri hi manhret hei rasoh: Amasong kaṭhatak amathla kalentak, akazer hmuvânlai inkhat leika-om. Ama’n Lebanon Tlâng heia kajōnga cedar thingpâr inkhat amathlek jo,

⁴khavakha invei tlona ram a atlen jo, khana invei katlohei khōpuia ada jo.

⁵Hivasōa ama’n thingkek dôn inkhat Israel ram a inphut atlena ram ṭhatna hmun a aling jo.

⁶Thing hi ajîk hong kadôna vomhrui theikung inhnem, abâk kasemsōttak hongkachang jo. Abâk-hei kha chungting injâma Marhmu hnengting anhnget. Vomhrui kha abâk leh abō he’n anmakhusia kae.

⁷“Marhmu kalentak ahlop inkhat amathla kalentak, ahme katamtak inkhat leika-om. Khana tûnchu vomhrui rajung leh abō hei khan aleihmôngna rahōn kanek a tui apekdet sik tia inhōrna aneia ahnengting anleihnget a kae.

⁸Tâk-kha vomhrui kha ralei thai tamna leh tui kaṭhadek a omna hleipuk a akahmông, abō leh athei inrator akalentak vomhrui akaesa jo kae.

⁹“Khava jâra Chunghnung RŌNGPU ke’n kader: hiva vomhrui hi kahring kakhang sik mo? Marhmu hma-inkei khan arajung leh akara phoisōt mak ning mo, abâk-hei intan sik a kha invōimak hei ning mo? Khava phoisōtna sik a rathahrat rangei mak ning khana torna kanei jât rangei mak ning.

¹⁰Kadik, hivahi akahmôngsa jo kae, kha’num akahringa akakhang sik mo? Nisō ting thli khan ahongsêm pha invōimak ning mo? Ahmôngna hmun a khan khavakha invōimak ning mo?”

¹¹RŌNGPU’n kahnenga ahri,

¹²“Re katlohei hneng ṭong tekâk kha heitina mo anmanhret mo der hei roh. Babylon reng kha Jerusalema kahonga aṭōnpui karônhei aṭhōisōt heia Babylon ting inle jo hei tia manthei hei roh.

¹³Ama’n rengpa innshunga mi inkhat aṭhōisōt a, ama leh inhnōmna asyema, ahnenga kajana kapek sik tia inhâksêrna amannei. Ama’n apui karôn mihei asura aṭhōi jo hei

¹⁴jât-hei hi anṭhōisōt nôk makna sik khana an-intepna kha anjuina sik atloa kae.

¹⁵Tâk-kha Judah reng in re dōina sik a atloa Egypt a shakor leh remi katamtak avakaṭhōi sik a palai atir hei. Ama hme asō sik mo? Khan vâng khan ama akatlânsōt tor sik mo? Inhnōmna syem kha phesōt tor mak ning khana karâk loa om mak ning!

¹⁶Chunghnung RŌNGPU’n ahri, “Kei akahring Pathen khet kachang jâra, hiva rengpa hi Babylona kathi sik ajârchu ama’n ama reng hmun kapek, Babylon reng leh an-intepna kha avōkkhōia kae.

¹⁷Babylon he’n mi katamtak thatna sik a ralei khur ancho pha Egypt remi kahrat hei kapha’num re dōina kha inthōpui tor mak hei ning.

¹⁸Ama’n a’ntepna leh aṭongkam kha asukkhōi jo. Ama’n hihei seng atlo jo, khana tûnchu inphesōt tor mak jo ning.”

¹⁹Chunghnung RŌNGPU’n ati, “Kei akahring Pathen khet kae jâra, kei rahming apanna jui sik a aṭongkam kha asukkhōi jo jâra ke’n ama karâkna kapek sik kae.

²⁰Ke’n sha kahnong hei châng kamazersōt sik, khana kasur sik. Ke’n Babylona kaṭhōi sik khana khan karâkna kapek sik, ajârchu ama kei hnenga taksenthei changmak a kae.

²¹Ama rekathem pen remihei kha rehmun a kathi sik hei, akahring senghei khan ramkei rakip a inchek sik hei. Khava pha khan chu RŌNGPU ke’n kahri jo kae tia nanhong manhret sik.”

²²Hivahi Chunghnung RŌNGPU tahri kae: “Ke’n cedar thing inshâng ajîk kadortan sik, adôn kacher kha kador thlek sik; khavakha tlâng inshâng chunga kaling sik,

²³Israel tlâng inshângpen chunga. Hivahi abâk adôn sik khana kara ahongnei sik cedar thing kalentak hong inchang sik. Va rakip khava chunga ka-om sik hei adaihlim hnōia in-ungna annei sik.

²⁴Ram shunga thingkung kahmông rakip in kei RŌNGPU eng kae tia anhong manhret sik. Ke’n thingkung inshâng hei kaphûr mathlûk hei khana thingkung kasintek kha kaman khang. Thingbō in-êm hei seng kamanvōi hei khana thing kachâr kha abō kaman-êm. RŌNGPU ke’n kahrisōt jo. Tlo sik a kati kha katlosōt sik kae.”