Read Komrem EZEKIEL 18 Bible Online

EZEKIEL 18 - Komrem bible

EZEKIEL 18

¹RŌNGPU’n kahnenga ahri,

²khana ati, “Hiva ṭongchîk Israel ram shunga antahri ṭhak hi heimo kae? ‘Nu leh pa he’n vomhrui kathûr ansâk, Tâk-kha ansahei ha kakima kae.’

³Chunghnung RŌNGPU’n ati, “Kei hi akahring Pathen khet kachang jâra, hiva ṭongchîk hi Israel ram shunga nangni’n hri nôk mak jo tin chei.

⁴Mi rakip hringkhō, nu leh pahei khana sahei hringkhō rakip hi keita kae. Akathi sik kha setna katlo mi kha kae.

⁵“Mi kadiktak inkhat leika-om ti rih, mikadik leh malung intheng.

⁶Ama’n Israelhei limsyem kamuk mak khana kamukna mak sik hmun heia inthoina tōkna hme sâk mak a kae. Ama’n mi nuhmei vatônmak khana nuhmei apōn omlai tônmak a kae.

⁷Tûte inkhat hōnmak khana tu inkhat neinâk chom mak. Sêr kabat inkhat bandhop da kha apek male hei; von kaṭâm hei avei hei khana pōnsi kaneimak hei apek hei.

⁸Sêrthōia sêrpûk masō mak. Ṭhatmak tlo sik hnōm mak khana innâk-inse rakip a malung inthenga ṭong tanna anei.

⁹Khang khava mi khan kaṭong pek ajui khana insing theitak a kadân ajui. Ama kha mikadik kae, akahring sik kae,” Chunghnung RŌNGPU’n ati.

¹⁰“Kachanga hiva mipa hin inru mikathat, hinghiva katlo sapa inkhat,

¹¹apa’n atlo phung hêrmak ṭōnkatlo anei. Ama’n kamuk makna sik hmun a inthoina asâk hei khana mihei nuhmei atôn hei.

¹²Sarahei hneng maleisei ahri, achom hei, sêr kapûk he’n bandhop antada kha aloa kae. Ama Khōvelhei kamukna hmun heia vakase, mater ka-om limhei akamuk hei,

¹³khana sêrpûk aṭhōia amasō. Ama kahring sik mo? Changmak, hringmak ning. Ama’n hiva mater ka-om ṭōn rakip atlo jo, khava jâra ama kathi sik. Ama kha abinga thina sik a themmô pek sik kae.

¹⁴“Tûnchu hiva mi inhnina pa hin sapa inkhat anei ti rih. Ama hin apa setna tlo rakip kha ahmu jo, tâk-kha apa omchen chu juimak.

¹⁵Ama’n Israelhei limhei kha kamuk mak khana kamukna mak sik hmun heia inthoinahei kha sâk mak. Ama’n mihlop nuhmei vatônmak

¹⁶khana tûte inkhat suk manrim mak khana chom mak. Sêr kapûk he’n bandhop antada kha apek male hei. Von kaṭâm hei avei mankhop hei, pōn kaneimak hei pōn apek hei.

¹⁷Ṭōnse tlo sik hnōm mak khana sêrthōi sik sêr masō mak a kae. Ama’n kadân ajui khana kei ṭongpek ajui. Apa ṭōnse tlo jâra ama thimak ning, ama akahring nger sik kae.

¹⁸Ṭong inkhat a, apa khan maleisei ajôma minei achoma, ahei tik a mi rakip hneng ṭhatmak atlo jo. Khang’khan ama abinga setna tlo jâra ama akathi kae.

¹⁹“Tâk-kha nang in nati, ‘Apa setna jâra heisa mo asapa kha inrengna achen mak sik?’ Khava ṭong masônna khachu sapa khan akadik leh akaṭha atlo jâra kae. Ama’n kadân ajui khana insing theitak a ajui hei, khava jâra ama akahring nger sik kae.

²⁰Akathi sik kha setna katlo mi kha kae. Apa setna jâra asapa khan inrengna chenmak ning, khana asapa setna jâra apa khan inrengna chenmak ning. Mikaṭha kha ṭhatna atlo jâra tloman a’npek sik kae, mikaṭhamak kha ṭhatmak atlo jâra inrengna achen sik.

²¹“Ṭōnse katlo mi inkhat in aṭōnse tlo abânga, kei dân ajuia akadik leh akaṭha atlo’nchu, ama kha thimak ning; ama akahring nger sik kae.

²²Ama ṭōnse tlo rakip rangei mandam sik kae, ama kahring sik, ajârchu ama’n akadik atloa kae.

²³Mikaṭhamak inkhat thina kha aka-en hnōm sik a namandon eng mo?” Chunghnung RŌNGPU’n ader. “Kha changmak, ama’n amalung ahong thlenga akahring sik kha ka-enhnōm jôk kae.

²⁴“Tâk-kha mikaṭha inkhat in anṭōn kaṭha tlo abânga, mikaṭhamak-hei tatlo, mater ka-om akaṭhamak rakip tlo aphut inchu, akahring ṭhak sik mo? Changmak! akaṭha aleitlo rakip kha inkhatbek mandonsōtna om mak ning. Ama taksenthei achangmak jâra khana asetna jâra akathi sik kae.

²⁵“Tâk-kha nangni’n nanti, ‘RŌNGPU ṭōntlo hi dikmak.’ Israelhei kei ṭong rangei ruh. Kei ṭōn tloje hei hi dikmak tia nantamandon mo? Akadik mak khachu nangni hlam jôk kha kae?

²⁶Mikadik inkhat in aṭōn kaṭha tlohei kha ahai jo’nchu khana ṭhatmak tlo aphut inchu ama kha kathia kae, ama’n ṭhatmak atlo jâra akathi kae.

²⁷Mikaṭhamak inkhat in aṭōnse tlo abânga akadik leh akaṭha atlo’nchu, ama abinga ahringkhō ahuksōt.

²⁸Ama’n aleitlo hei kha amandona aset tlo kha kahai jo, khava jâra ama kha thihêr mak ning, kahringa ka-om sik.

²⁹Khana nangni Israel he’n nanti, ‘RŌNGPU ṭōntlo hi dikmak.’ Kei hlam hi dikmak tia nanmandon, Nanmandon mo? Akadik mak khachu nangni hlam jôk kha kae.

³⁰“Tûnchu, Chunghnung RŌNGPU ke’n Israel nangni hnenga kamanthei chei khachu nanṭōn tlo dungjuia nangni inkha-khat chunga ke’n ṭong katan sik. Nanṭōnse tlona rakip a inhesōt ruh, khana nansetna khan suk manhmang mak chei rasoh.

³¹Ṭhatmak nantatlo rakip kha bâng ruh, malung ther leh mandonna ther kha chen ruh. Heisa mo Israel nangni akathi hnōm chei?

³²Chunghnung RŌNGPU’n ati, “Nangni tûte inkhat akathi sik madu mak eng. Nansetna inphut hong inhe ruh khana hringna chen ruh.”