Read Komrem EZEKIEL 19 Bible Online

EZEKIEL 19 - Komrem bible

EZEKIEL 19

¹RŌNGPU’n hiva inrengna hla hi Israel rengsa 2 hei sik a sak sik a amanthei eng.

²Nanu kha khong khova shabakkai pui mo kae! Atehei kha hnuk kase shabakkai ache hei kâra avei manhring hei.

³Ama’n ate inkhat kha amanhringa shahnong amanthem chuk a kae; ate khan mihring kasâk inchu jo.

⁴Jât he’n ama ṭong anthei jo khur kōk châng shunga anman-ôk jo. Kōikim vânga Egypt ramting ankei jo.

⁵Amanu’n a’nhōrna rakip a’nchaisō katlung ahngâk a kae. Khava sōa ama’n atehei kâra ahlop inkhat avei nôk, ama kha shabakkai kahrângtak hongkachang jo.

⁶Pui katluk shabakkai ahongchang jo pha, shabakkai ralak-hei leh kalôn lele hei, Ama kha’m shakahnong inchu jo khana mihring ahei sâk jo.

⁷Ama’n rekur amanset jo, khōpuihei asuk manhmang jo. Ama a’nhrâm akaia, Ram mihei inpir heia kae.

⁸Ama inrepuina sik a jât-hei kha intûp hei; Mipuihei kha ram rakip a inphut kahong hei. Ansha surna châng kha anzera anchâng vânga ansur jo.

⁹Anmani’n sharōnga ankhuma Babylon rengpa hneng anṭhōi jo. Anmani’n anhngâk a anda Israel tlâng heia ama inhrung kha anthei nôk makna sik a antlo jo.

¹⁰Nang nu kha kavadung panga antaling vomhrui thei ka-ang. Ajârchu khana khan tui katamtak ka-om, vomhrui kung kha abō leh akara’n akabuksia kae.

¹¹Abâk-hei kha kangar hei, reng khōnghre sik a kakhang hei. Vomhrui kha sumtuk kaphâk hrep sik a inshângtak a kakhang jo; mi rakip in heituk abō katam leh a’nshâng kha anhmu jo.

¹²Tâk-kha hnuk kana kut vânga arajung kha aphoisōt a raleichunga ahlon sōt jo. Nisōtinga thli khan akara asêm manchâr jo. Abâk-hei ador thlek jo; khahei kha kachâr jo hei khana hmeia inro jo hei.

¹³Tûnchu hivahi nêrdiram a anling jo, ram chârna leh tui omakna ram a.

¹⁴Vomhrui kung kha hmei hong kasûk jo; hmei khan abâk leh akara hei aro manhmang jo. Abâk-hei kha ngartor hêrmak jo ning. renghei khōnghre changthei hêrmak jo hei ning. Hivahi inrengna hla kae; hivahi ave-avea ansak jo.