Read Komrem EZEKIEL 20 Bible Online

EZEKIEL 20 - Komrem bible

EZEKIEL 20

¹Hivahi rehring sura kanva omna kum 7 tlukna thla 5 shunga ni 10 tluk ning kha kae. Israel hlamkakei ṭhahrep in RŌNGPU lungdo ani kader sik a kahnenga kahong hei, anmani kahmai kunga in-ong hei.

²Khava pha RŌNGPU’n kahnenga ṭong ahri.

³Ama’n ati, “Akathithei mihring, hiva hlamkakeihei hneng hri roh, Chunghnung RŌNGPU’n hinga ahri tia manthei hei roh: kei lungdo kader sik a kahong chei, changmak mo? Kei akahring Pathen kachang jâra, ke’n nangni kahnenga heite mander mak chei ning. Chunghnung RŌNGPU ke’n kahri jo.

⁴“Akathithei mihring, nang in anmani chunga ṭong tanna sik a’ntluk che mo? Khan chu khanga tlo jo roh. Anpu anpa he’n mater ka-om ṭōnse antatlo hei kha anmandonsōtna sik tlo roh.

⁵Heimo kahri kha hripek hei roh. Ke’n Israel hi kakadeisōt pha, intepna inkhat kamannei hei. Kei Egypt a anhnenga inlâr eng khana kamanthei hei: Kei hi nan-RŌNGPU Pathen eng kae kalei ti.

⁶Khava sōa ke’n Egypt ram a inphut anmani kaṭhōisōt sik a intep eng khana anmani pek sik a kakadei ram, haona leh ram thai omna, heirakip chunga ram kahōipena khan kaleiṭhōi hei.

⁷Anmani’n antamalungset mater ka-om limsyem anhlonsōtna sik khana Egypt a pathen kadikmak hei kamukna vânga anbinga an-inbōk makna sik a kamanthei hei, ajârchu kei hi RŌNGPU an-Pathen eng kae.

⁸Tâk-kha anmani’n kei dōina kangir hei khana ṭong rangei hnōm mak hei. Anmani’n anlim mater ka-om hei kha hlonsōt mak hei khana Egypt hei pathen inmuk bângmak hei. Egypt ram a kahnuk natna inhnaktak kha anmanhretna sik ṭōn tlo sik a kei le’ntluk eng.

⁹Tâk-kha ke’n tlomak jo eng, khavakha achang inchu karahming setna kachang sik jo, ajârchu anmani ta-ompui jât mihei hmaikunga Israelhei hi Egypt a inphut kaṭhōisōt sik hei kae tia kalei phôngsōt dek a kae.

¹⁰“Khava jâra ke’n Egypt ram a inphut anmani nêrdiram a kaṭhōisōt hei.

¹¹Tu enum akajui rakip in hringna antachen sik kadânhei kha kamanthei heia ṭong kapek hei.

¹²RŌNGPU ke’n anmani kaman theng hei ti hi mandonsōtna anneina sik a keini inhnōmna mêrchîkna kha Châmhngat kani nitna kamanchang.

¹³Tâk-kha anmani’n nêrdiram a kapha andōi eng. Akajui rakip hnenga hringna kapek sik kadânhei kha anvōkkhōia kae. Anmani’n Châmhngat kani um kajamak hei. Nêrdiram shunga kahnuk natna inhnak kha anmanhretna sik a tlo sik leh suk manhmangna sik a le’ntluk eng.

¹⁴Tâk-kha ke’n leitlo mak eng, ajârchu Egypt a inphut Israel kaheiṭhōisōt hei pha ankahmu jât-hlop hei kâra karahming setna kachang sik a kae.

¹⁵Khava jâra nêrdiram a an-omlai ke’n khava ram kahao leh ram thai omna, heirakip a akaṭhapen ram a khan anmani ṭhōi manhlut mak hei ning tia le’ntep jo eng.

¹⁶Ke’n khava intepna kha kasyem, ajârchu anmani’n kaṭong pek anhlonsōt, kadân anvōkkhōi, khana Châmhngat kani anmanbōk, anmani’n anlim hei kha kamuk sik a anmadu chet.

¹⁷“Tâk-kha anchunga lungsetna kanei. Ke’n khava nêrdiram shunga khan anmani that hnōm mak hei eng.

¹⁸Khava kanek a, ankâra khangdônghei hneng gîkna kapek hei: nanpu-nanpahei dân syem juimak ruh; anmani chôndân juimak ruh a-emak leh anmani limsyem vânga nanbinga inbōkna syem mak ruh kati hei.

¹⁹Kei RŌNGPU nan-Pathen eng kae. Kei dân leh kaṭong pek hei jui ruh.

²⁰Châmhngat kani kha a’ntheng kani manchang ruh, eini’n intepna nileisyem jo khava chîkna achang theina sik, khana kei hi RŌNGPU nan-Pathen eng kae ti hi mandonsōtna amannei sik chei.

²¹“Tâk-kha khava khangther he’num kei andōi jo eng. Akajui rakip hnenga hringna kapek sik kei dân kha anvōkkhōi khana kaṭong pek nitmak hei. Anmani’n Châmhngat kani anmanbōk. Khava nêrdiram a kei hnuknat inhnak kha anmanhretna sik leh thatpetna sik heia ṭōn tlo sik a kei le’ntluk eng.

²²Tâk-kha kei leitlo mak eng, ajârchu Egypt a inphut ke’n Israel kaheiṭhōisōt laia ani kahmu jât-hlop hei kâra karahming setna kachang sik.

²³Khava jâra nêrdiram a intepna ather kaleisyem. Raleichung hmun rakip a anmani kathek manchai sik heia le’ntep eng.

²⁴Hiva kaleitlo hi anmani’n kaṭong pek anhlonsōt a kadân anvōkkhōi khana Châmhngat kani kha anmanbōk jâra kae; khana anpu anpahei taleirazen limsyem kha ankamuk a kae.

²⁵“Khava sōa ke’n akaṭhamak dân khana hringna kapek mak sik ṭong kha kapek hei.

²⁶Anmani tōknahei vânga anbinga kamanbōk kamannim hei, khana ansa hma-inkeihei inthoina kamantōk hei. Hivahi anmani karâkna sik a leh kei hi RŌNGPU kachangna malârna sik a kae.

²⁷“Tûnchu akathithei mihring, Chunghnung RŌNGPU ke’n heimo kahri hi Israelhei hneng manthei hei roh. Hivahi anpu anpa he’n taksenthei anchangmak jâra inzak anpekna eng ahlam inkhat kha kae.

²⁸Ke’n anmani pek sik a kalei intepna ram a khan kaheiṭhōi hei. Anmani’n bung inshâng leh thingkung ka-êm anhmu pha, khahei rakip hnenga inthoina antōk a kae. Anmani inthoina tōkna leh inthoina sik a anju heichoi khan kahnuk anmannat a kae.

²⁹Ke’n kader hei: nansena hmun inshâng hei kha heimo kae hei? Khava jâra khava hmunhei kha ‘Hmun Inshâng’ anti heia kae.

³⁰Tûnchu Chunghnung RŌNGPU ke’n Israelhei hneng kahri hi manthei hei roh: Nanpusōn he’n anta leitlo setna kha heisa mo nantatlo nôk sik khana an-pathenhei kahnung nantalajui sik?

³¹Tuning katlung a’n-angtling kutchoi kha nanlapek ṭhak khana anhnenga nansahei kha hmeishunga inthoina nantōk a limsyem mama hei leh nanbinga inbōk innim chei. Khava sōa Israel nangni kei lungdo kader a kahong chei! Chunghnung RŌNGPU kei akahring Pathen kachang jâra, kahnenga heite mander mak chei ning.

³²Thing leh hlung inmuk ram hlop a ka-om hei, jât-hlop hei kapōa om sik nanmalunga insyem chei. Tâk-kha khachu changthei hêrmak ning.

³³“Chunghnung RŌNGPU kei akahring Pathen khet kachang jâra gîkna kapek chei kae, kahnuknat pum a kut kangar tak a, karatha neina rakip vâng nanchunga vai karôn sik kae.

³⁴Ke’n nankhenga kamantûp cheia nan-inchai kathekna ram rakip a inphut kaheiṭhōi male chei pha karathahrat leh kahnuk natna kha kamanhmu sik chei.

³⁵Ke’n nangni ‘Jât-hei Nêrdiram’ a kathōi sik chei, khana khan nanhmai hmutak a kadem sik chei.

³⁶Nanpu sōnhei Sinai Nêrdiram a anṭong kaleitan hei kapōa nangni’m tûnchu nanṭong katan sik chei kae,” tia Chunghnung RŌNGPU’n ati.

³⁷“Ke’n nangni ka’ntepna ratha thōia kada sik chei khana kaṭongkam kamanjui sik chei.

³⁸Nangni kâra racham kase leh setna katlohei kha kalosōt sik hei. Anmani tûnna an-omna ram a inphut kaṭhōisōt sik hei, khana Israel ram a heimanle nôk mak jo hei ning. Khava pha nangni’n kei hi RŌNGPU eng kae tia nanmanhret sik jo eng.”

³⁹Chunghnung RŌNGPU’n ati, “Tûnchu, Israel nankhenga malung katlâia om ruh! Se ina nanlimhei kha razen hei ruh! Tâk-kha ke’n kagîk chei kae khava sō leh kei ṭong nantajui sik eng kae khana nanlimhei hneng kutchoi tōkna nanneia kei rahming hmeset pekna nantatlo khachu akahai sik chei kae.

⁴⁰Sova ram a son, kei tlâng intheng, Israel tlâng inshâng chunga nangni Israel mi rakip in nantakamuk sik eng kae. Kei nanchunga katlai sik eng, akaṭhapen nantōkna hei kha leh a’ntheng nankutchoi hei, nan-inthoina kahnenga nata heichoi sik a kamadu sik.

⁴¹Nangni inchek a nan-omna ram rakip a inphut kaheiṭhōi chei sōa, khana kamanchun chei sōa, nangni ro-inthoinahei kha karahlâng sik, khana jât he’n kei intheng eng ti kha anhmu sik jo eng.

⁴²Nanpu sōnhei hnenga pek sik a ka’ntepna Israel ram a khan kaheiṭhōi male chei pha, khava sōa kei RŌNGPU eng kae tia nanmanhret sik jo eng.

⁴³Khava sōa nangni taleitlo hmaimôkna ṭōn rakip khana heikhonga nanbibinga a’nbōk innim chei mo ti kha nanmandonsōt sik jo. Ṭhatmak nanta leitlo rakip jâra nangni nanbinga inter sik jo chei.

⁴⁴Ke’n karahming setmakna sik katlo pha, nangni Israel he’n kei hi RŌNGPU eng kae tia nanmanhret sik jo eng, ajârchu nanṭhat makna dungjuia, nanrahōi kasōk ṭhatmak kha tlopek mak chei eng.” Chunghnung RŌNGPU’n ahri jo.

⁴⁵RŌNGPU’n kahnenga ahri.

⁴⁶Ama’n ati, “Akathithei mihring, thlang ting enroh. Thlang kadōia ṭonghri roh khana thlanga ratu kadōia ṭong sân roh.

⁴⁷Thlanga ratu khan Chunghnung RŌNGPU ṭong kha atheina sik hri roh: Enroh! ke’n hmei kamansûk jo, nashunga aka-om thing rakip akângsō sik, aka-êm leh akachâr akhenga. Hei-inkhat in khavakha thator mak ning. Hivahi thlanga inphut sak ting kase sik khana mi rakip in hmei kalum kha anmanhret sik.

⁴⁸Anmani ankhenga RŌNGPU ke’n hmei kha karo kae khana tûte inkhat in thattor mak hei ti kha anhong manhret sik jo.”

⁴⁹Tâk-kha ke’n kamakhe, “Chunghnung RŌNGPU hivahi kei amanhri mak roh! Ke’n ṭongsaia ahei tik a kahri tia mi rakip in inphinna antanei jo kae.”