Read Komrem EZEKIEL 21 Bible Online

EZEKIEL 21 - Komrem bible

EZEKIEL 21

¹RŌNGPU’n kahnenga ahri.

²Ama’n ati, “Akathithei mihring, Jerusalem kha hrimaset roh. Mihei kamukna hmunhei hrimaset roh. Israel ram kha gîkna pek roh

³khachu RŌNGPU ke’n hing’hin kahri: Kachemjâm karadoksōt sik, nangni mikaṭha leh akaṭhamak nankhenga kathatsō sik chei.

⁴Thlanga inphut sak katlunga mi rakip dōina kachemjâm hi kahmang sik.

⁵RŌNGPU ke’n kachemjâm karadok jo khana avea apaia thōnmak ning ti hi mi rakip in anmanhret sik jo.

⁶“Akathithei mihring, lungdonga namalung akakōi jo kapōa inkōi roh.

⁷Heisa mo a’nkōi che tia ander che pha, hiva ṭong hi kathei jâra kae ti roh. Khavakha asōk pha, anmalung kha ṭitna’n kasip sik jo, ankut he’m kahngōisō sik jo hei, anmalung ngarna kha katlasam sik jo, anmarkhup innok sik jo. Khava pha kha hong katlung jo, hinahin ka-om jo.” Chunghnung RŌNGPU’n ahri jo.

⁸RŌNGPU’n kahnenga ahri,

⁹“Aka-thithei mihring, sânsōt roh. RŌNGPU kei tahri hi mipuihei manthei hei roh: Chemjâm inkhat, chemjâm inkhat kha katât manngeia, kanôt manvâr jo kae.

¹⁰Mithatna sik a katât man ngei jo kae, khō inphe kapōa kadi liplep a manvâr jo kae. Malung hōina omtheimak ning, ajârchu kami he’n gîkna leh karâkna rakip kha donmak heia kae.

¹¹Chemjâm kha kanôt manvâra, hmang sik joa mantluk jo kae. Hivahi katât manngeia kanôt manvâr jo, mikathat inkhat kut a pek sōt sik jo kae.

¹²Inrengtak a ông roh, mihringsa; hiva chemjâm hi kamihei sik mantluk jo khana Israel hlamkakeihei thatna sik a kae. Anmani thatsō sik jo hei kae kami ankhenga leh inṭhōia. Inreng pum a nan-ôp kaben ruh!

¹³Ke’n kamihei enmansinna kaneihei, anmani’n malung thleng sik anhnōm mak inchu, hihei rakip hi anchunga ahong kasōk sik kae.

¹⁴“Tûnchu, akathithei mihring, ṭong sânsōt roh. Nakut kaben roh, khana chemjâm kha ave-avea hong inlek sik jo. Hivahi mikathat chemjâm inkhat kae, ṭit-inpirna leh mi thatna chemjâm inkhat kae.

¹⁵Hivahin kamihei malung ngarna amanhmang khana amanpai manthlûk hei. Ke’n anmani khōpuihei kha khō inphe leh mikathat sik a a’ntluk jo chemjâm inkhat vânga kamaṭhit hei.

¹⁶Chemjâm kangei nang in changting leh veitinga tuk hei roh. Na-inlekna lang rakip a tuk hei roh.

¹⁷Ke’num kakut kakaben sik, kahnuk natna kha hivahin kadai sik jo. RŌNGPU ke’n kahri jo kae.”

¹⁸RŌNGPU’n kahnenga ahri.

¹⁹Ama’n ati, “Akathithei mihring, Babylon rengpa khan achemjâm leh inṭhōia ajōng theina hlam 2 kha merchîk hei roh. An-inhnibât a ram in-ang tinga inphut ahe’nphut sik hei kae. Hlam inbâkna khan ṭong mantheina târ roh.

²⁰Hlam inbâk inkhat khan rengpa hneng Ammonhei khōpui Rabbah sorna hlam kha amanthei sik khana hlam inkhat khan Judah sorna hlam, rape a’nkhârkhum Jerusalem tlungna amalârpek sik.

²¹Babylon rengpa kha hlamsō 2 inbâkna ṭongmanthei târna khan kangir. Khonting mo se sik tia amandona athe kha akanok a kae; ama’n ama limhei kha ader hei; inthoina ran mathin kha a-enmansin a kae.

²²Tûnchu! Achang tinga akut khan ‘Jerusalem’ kahnget the kha amatu jo! Khava khan ahnenga sena sik leh vōkkhōina thingpum makheina sik a, khana khavakha kekot sukkhōina sik mantluk sik a, re tloa ôngna sik a, ralei manbuk a, rekur tukna sik a amanthei jo.

²³Jerusalema mipuihei khan chu inhnōmtōna anneidek jo jâra hivahi taksen mak hei. Tâk-kha hiva ṭongsânsōt hi ansetna mandonsōtna sik a kae khana anmani ansur sik jo heitina gîkna kha kae.

²⁴Khava jâra hivahi Chunghnung RŌNGPU ke’n kahri kae: nangni setna kha malârsōt jo kae. Heituk a ṭhena kanei chei mo ti hi mi rakip in anmanhret. Nanṭōn tlosōt heirakip a nansetnahei kha nanmalâra kae. Demna pek sik a kangir ṭhak chei, khana ke’n nan-inrepuihei kut chunga kapek sik jo chei kae.

²⁵“Nangni mikaṭhamak, a’nthengmak Israel vaikarônhei, nangni kani, achaina nanṭong tanna kani kha kajōng jo.

²⁶Chunghnung RŌNGPU ke’n kahri jo. Nanlukhu leh nanlukôm kha losōt ruh. Hma kapōa neinâk avea om mak hei ning. Sarahei kha ratha kanei sik a kadom hei ruh. Vaikarônhei kha suk manhnem hei ruh!

²⁷Inhmangna, inhmangna! Kadik, ke’n khōpui kha kamanhmang sik. Tâk-kha ke’n kakadeisōt inkhat kha hiva khōpui karâkna sik a ajōng mak hma seng hivahi sōk mak ning. Khava sōa hivahi ahnenga kapek sōt sik.

²⁸“Akathithei mihring, ṭong sânsōt roh. Chunghnung RŌNGPU ke’n Israelhei inzakna akapek Ammonhei hnenga kahri ṭong hi phôngsōt roh. Anhnenga hinga hri roh: ‘Suk manhmangna sik a Chemjâm inkhat intluk jo; Hivahi mikathat sik a, khō inphe kapōa akavâr liplep sik a kanôt jo kae.

²⁹Nangni hmangtalâr hmu kha dikmak, khana hnungṭong sânsōt kha maleisei kae. Nangni ṭhamak chei khana nanmalung intheng mak, a’nchaina nanṭong tanna sik kani kha kajōng jo. Chemjâm kha nanrînga jōngkatla sik.

³⁰“‘Chemjâm kha apaia thōn ruh! Nan-intetna hmun a, nan-intetna ram a, ke’n nanṭong katan sik kae.

³¹Kahnuk natna kha nanchunga hmei kasûk kapōa kahei masō pha nangni’n nanmanhret sik jo. Khana ke’n nangni mikathat-hei, suksetna akathemhei kut a kapek sōt sik chei.

³²Hmei in akâng manhmang sik chei. Nanthisen kha nanram shunga katla sik, khana tûte inkhat in amandonsōt mak jo hei ning.’” RŌNGPU’n ahri jo.